კორონავირუსი, ქრონიკა. რუსეთში, მედიკოსთა შორის სიკვდილიანობის ძალიან მაღალი მაჩვენებელია

სომხეთში, პანდემიის დაწყებიდან, სულ 17 489 ადამიანი დაინფიცირდა. მათგან 293 გარდაიცვალა, 6 571 – გამოჯანმრთელდა.

პრემიერ-მინისტრი ნიკოლ ფაშინიანი Facebook-ის საკუთარ გვერდზე, ხანგრძლივი პირდაპირი ეთერით გამოვიდა და საუბრობდა იმის შესახებ, რომ ნიღბის ტარება, სიცოცხლის გადარჩენას ნიშნავს:

«ადამიანები ნიღბებს არ ატარებენ და ეს არის ვირუსის გავრცელების მთავარი მიზეზი».

• ვირუსის აფეთქება სომხეთში – მიზეზები და დასკვნები საქართველოსთვის

რუსეთში, „ხსოვნის სიაში“, რომელშიც კორონავირუსით გარდაცვლილი მედიკოსები შეჰყავთ, უკვე 413 სახელი და გვარია. ეს დაღუპული ექიმებისა და მედდების ყველაზე მაღალი მაჩვენებელია მსოფლიოში, კორონავირუსის პანდემიის დაწყებიდან.

მართალია, რუსეთში, პანდემიის მწვავე ფაზა მარტში დაიწყო, ივნისშიც კი ქვეყნის საავადმყოფოების უმეტესობაში, მედპერსონალს ძირითადად მხოლოდ პლასტიკური საწვიმრები და ქირურგიული ნიღბები აქვთ, რომელსაც მედიკოსები თვითონ რეცხავენ და რადიატორებზე აშრობენ. მათ, ვინც ჩივილს იწყებს – როგორც წესი ათავისუფლებენ ან აჯარიმებენ „ყალბი ამბების გავრცელებისთვის“.

ეს ინფორმაცია Human Rights Watch-მა 2020 წლის მაისსა და ივნისში, რუსეთის 11 რეგიონში, მათ შორის მოსკოვსა და სანქტ-პეტერბურგში ჩატარებული კვლევის შედეგად მიიღო. ქალაქ კოროლიოვის სასწრაფო დახმარების ექიმი, ევგენია ბოგატირევა ადგილობრივ დამოუკიდებელ პროფკავშირს ხელმძღვანელობს მოსკოვის ოლქში. მან Human Rights Watch-ს განუცხადა, რომ სინამდვილეში, ამ რეგიონში, მედპერსონალის 50%-ზე მეტი დაინფიცირდა.  

«სასიკვდილო დარღვევების გამოვლენისთვის დასჯა უნდა აიკრძალოს კანონით, ეს გამოხატვის თავისუფლების პირდაპირი დარღვევაა», – ხაზს უსვამს Human Rights Watch-ი.

• კორონავირუსის უცნაური სტატისტიკა რუსეთში: კარგი მედიცინა თუ პუტინის ხელისუფლებაში დარჩენის სურვილი?

 ფოტო: REUTERS/Shamil Zhumatov

სომხეთში, კორონავირუსის 397 ახალი შემთხვევა დაფიქსირდა, სულ, პანდემიის დაწყებიდან 17 064 ადამიანი დაინფიცირდა. მათგან 285 გარდაიცვალა, 6 276 – გამოჯანმრთელდა.

ჯანდაცვის მინისტრმა არსენ ტოროსიანმა განაცხადა, რომ კორონავირუსის პანდემიის შემოდგომაზე გააქტიურების საკითხი კვლავ აქტუალური რჩება, როგორც სომხეთისთვის, ისე სხვა ქვეყნებისთვის:

 «ვაფართოებთ ჩვენს შესაძლებლობებს და ვემზადებით შემოდგომისთვის, მიუხედავად იმისა, რომ ახლაც საკმარისად გვაქვს პრობლემები».

• კორონავირუსი ბიზნესის წინააღმდეგ. ვიდეო ერევნიდან

სოციალურ ქსელებსა და მედიაში გავრცელებული ინფორმაციით, კორონავირუსისგან გამოწვეული პნევმონიით გარდაიცვალა რამზან კადიროვის სიმამრი – მუსა აიდამიროვი.

ასევე, გარდაიცვალა გროზნოს პოლიციის ყოფილი უფროსი, აბუშეიხ ვისმურადოვი – ჩეჩნეთის პარლამენტის ვიცესპიკერის, აბუზაიდ ვისმურადოვის ალალი ძმა, რომელიც ცნობილია თავისი მეტსახელით „პატრიოტი“ და კადიროვის უახლოესი თანამებრძოლია.

• კადიროვი, რომელიც სავარაუდოდ კორონავირუსით არის ინფიცირებული, ტელეეთერში გამოჩნდა

ოფიციალური ინფორმაციით, ჩეჩნეთში, პანდემიის დაწყებიდან 1 464 ადამიანი დაინფიცირდა, გასული 24 საათის განმავლობაში, 23 შემთხვევა გამოავლინეს.

18 ადამიანი დაიღუპა, 1 123 გამოჯანმრთელდა.

აქტივისტები და ჟურნალისტები ამტკიცებენ, რომ სინამდვილეში, ჩეჩნეთში, ბევრად მეტი ადამიანი დაინფიცირდა და გარდაიცვალა, თუმცა, ინფიცირებულთა დიდ ნაწილს ეშინია ან რცხვენია ამის აღიარება და ამიტომ ტესტირებას არ იტარებენ.

• კავკასიაში, კორონავირუსის პანდემიასთან დაკავშირებული წინა მოვლენების ქრონიკა