კომენტარი: ადამიანის დაპატიმრება 34 წლის წინანდელ ომზე გაკეთებული მოსაზრების გამო, არის სამართლებრივი აბსურდი
გიორგი ბარამიძის დაპატიმრება
“სოციალური სამართლიანობის ცენტრის” დირექტორი თამთა მიქელაძე “ნაციონალური მოძრაობის” ერთ-ერთი ლიდერის, გიორგი ბარამიძის დაკავებას ეხმაურება და ამბობს, რომ ადამიანის დაპატიმრება 34 წლის წინანდელ ომზე ისტორიულ გადაცემაში გაკეთებული მოსაზრების გამო, რომელზეც მან ბოდიშიც მოიხადა, არის სამართლებრივი აბსურდი.
11 სექტემბერს თბილისში დააკავეს “ნაციონალური მოძრაობის” ერთ-ერთი ლიდერი და თავდაცვისა და შინაგან საქმეთა ყოფილი მინისტრი, გიორგი ბარამიძე.
საქმე ეხება, ბარამიძის მიერ იაგო ხვიჩიასთვის მიცემულ ინტერვიუს გადაცემაში “საქართველოს დაბადება”, სადაც მან თქვა, რომ აფხაზეთში ომის დასაწყისში ქართულ მხარეს ტყვეები არ ჰყავდა იმიტომ, რომ მათ “ხვრეტდნენ.”
პროკურატურის ცნობით, გიორგი ბარამიძე დაკავებულია სამშობლოს ღალატის, კერძოდ საბოტაჟის ბრალდებით.
თამთა მიქელაძე: “გიორგი ბარამიძემ რა თქვა ამის შინაარსობრივი და ისტორიული განხილვა ახლა გვერდზეა გადასადები.
ადამიანის დაპატიმრება 34 წლის წინანდელ ომზე ისტორიულ გადაცემაში გაკეთებული მოსაზრების გამო, რომელზეც მან ბოდიშიც მოიხადა, არის სამართლებრივი აბსურდი.
პროკურატურის მხრიდან აპელირება, რომ ამ განცხადებამ საქართველოს საერთაშორისო ავტორიტეტი და იმიჯი შელახა, ასევე შექმნა საქართველოს წინააღმდეგ საერთაშორისო საინფორმაციო კამპანიის საფუძველი და შელახა ვეტერანების ღირსება, არ არის სამართლებრივი კატეგორიის საკითხი. შეეძლოთ კონკრეტულ პირებს სამოქალაქო დავის ფარგლებში ცილისწამებისთვის ეჩივლათ ბარამიძისთვის. აპელირება იმაზე, რომ ამ განცხადების გამოყენება მოხდება საერთაშორისო იურიდიული პროცედურების დონეზე ასევე დაუსაბუთებელია. აფხაზეთის ომთან დაკავშირებით არანაირი საერთაშორისო იურიდიული პროცედურები არ მიმდინარეობს და იმ დროს ბარამიძე არ იყო გადაწყვეტილების მიმღები ფიგურა, რომ მის სიტყვას ასეთი წონა ჰქონდეს, რომ სამართლებრივი შედეგები შეცვალოს.
ამიტომ აზრის, თუნდაც უსაფუძვლო, სულელური, შეურაცხმყოფელი, მიუღებელი აზრის გამო ადამიანის დაპატიმრება არის წარმოუდგენელი გადახვევა სამართლებრივი ჩარჩოდან.
თან, ნახეთ, რა არის საბოტაჟის შემადგენლობა:
პირველი ელემენტი: საქართველოს დასუსტების მიზნით სახელმწიფო ან სხვა საწარმოს, დაწესებულების, ორგანიზაციის ან სამსახურის ნორმალური ფუნქციონირებისათვის ხელის შეშლა.
მეორე ელემენტი: საქართველოს დასუსტების მიზნით საწარმოს, სატრანსპორტო, კავშირგაბმულობის ან მასობრივი მაუწყებლობის საშუალების, გზის, ნაგებობის, ტექნიკის, დოკუმენტის, დიდი რაოდენობით სტრატეგიული ნედლეულის, მასალის ან პროდუქციის, აგრეთვე მოსახლეობისათვის სასიცოცხლო მნიშვნელობის დაწესებულების ან ორგანიზაციის ნორმალური ფუნქციონირებისათვის აუცილებელი, საზოგადოებრივი უშიშროების ან წესრიგის დაცვისათვის განკუთვნილი ან სხვა განსაკუთრებული დანიშნულების ობიექტის დაზიანება, მწყობრიდან გამოყვანა ან განადგურება.
მესამე ელემენტი: იგივე ქმედება ჩადენილი აფეთქებით, ცეცხლის წაკიდებით ან სხვა საყოველთაოდ საშიში საშუალებით, აგრეთვე ბირთვული ენერგიის კონტროლიდან გამოყვანა, ეპიდემიის ან ეპიზოოტიის გავრცელება, მასობრივი მოწამვლა ანდა სხვა ქმედება, რომელმაც ადამიანის სიცოცხლის მოსპობა ან მისი ჯანმრთელობის დაზიანება გამოიწვია
რომელი ამ შემადგენლობიდან შეიძლება იყოს სახეზე, თეორიულადაც კი განსახილველ საქმეზე?
აღარაფერს ვიტყვი იმაზე, რომ „საქართველოს კონსტიტუციური წყობილებისა და უშიშროების საფუძვლების წინააღმდეგ დანაშაულებს“ პროპაგანდისტულად „სამშობლოს ღალატი“ დაარქვეს 2025 წლის აპრილს, რომ სისხლის სამართლის მართლმსაჯულების კიდევ უფრო მეტი პოლიტიზაცია და პროპაგანდისტული ექსპლუატაცია მოხდეს.
როგორი ირონიულია და დაუჯერებელი, რომ ამას აკეთებს პოლიტიკური მმართველობა, რომელმაც საპარლამენტო კომისიის ფარგლებში თავად გადააფასა ჩვენი უახლესი ისტორია და ომის საკითხი და ინსტიტუციონალიზება გაუკეთა საკუთარი სახელმწიფოს ბრალეულობის აღიარებას.”
