საქართველო დამოუკიდებლობის დღეს აღნიშნავს - ტრამპის წერილი და მოკრძალებული ზეიმი
საქართველო წელს მოკრძალებით აღნიშნავს დამოუკიდებლობის 29-ე წლისთავს.
ტრადიციულად ეს დღე საქართველოში პომპეზურად აღინიშნება.
პარლამენტის წინ იმართება ქართული წარმოების სამხედრო ტექნიკის დემონსტრაცია და სამხედრო ფიცს დებენ ახალწვეულები, გადაკეტილია თბილისის ცენტრალური ქუჩები – აქ იმართება კონცერტები, წარმოდგენები, სპორტული შეჯიბრებები, ქართულ კომპანიებს გასაყიდად გამოტანილი აქვთ თავიანთი პროდუქცია. იგივე ამბები ხდება საქართველოს თითქმის ყველა ქალაქში.
თუმცა წელს, კორონავირუსის გამო ზეიმი “ვიწრო წრეში”, ეპიდემიოლოგთა რეკომენდაციების გათვალისწინებით შედგა.
მაგალითად, ვაზიანის სამხედრო ბაზაზე მისულ საქართველოს პრეზიდენტს პირბადე ეკეთა.
მთავარი ღონისძიებები სწორედ ვაზიანის სამხედრო ბაზაზე შედგა. პრეზიდენტთან ერთად იქ პრემიერ-მინისტრი, პარლამენტის თავმჯდომარე, თავდაცვის მინისტრი და დედაქალაქის მერი იმყოფებოდნენ.
პრეზიდენტმა ძირითადად, უხილავ მტერზე – კორონავიურსზე ისაუბრა.
სალომე ზურაბიშვილმა თქვა, რომ ურთულესი კრიზისის დროს საქართველომ მსოფლიოს მისცა გამძლეობის და წარმატების მაგალითი.
თუმცა, კორონავირუსთან ომი არ დასრულებულა და ბრძოლა გრძელდება, თქვა მან.
“მთავრობამ დროულად და ეფექტიანად აამოქმედა მართვის ყველა ბერკეტი, ეპიდემიოლოგებმა და ექიმებმა სწორად დასახეს დაავადებასთან ბრძოლის სტრატეგია, ჯარისკაცებმა ყველგან, სადაც საჭირო იყო მაღალ დონეზე შეასრულეს თავისი მოვალეობა და რაც მთავარია, საზოგადოებამ გამოავლინა თავისი სიმწიფე და ქვეყნისა და მოყვასის სიყვარული“, აღნიშნა პრეზიდენტმა.
ზურაბიშვილმა აღნიშნა, რომ რადგან საქართველო წარმატებით უმკლავდება კორონავირუსს, საპარლამენტო არჩევნების ჩატარება შემოდგომაზე არ დაგვიანდება.
პრეზიდენტის თქმით, საზოგადოება ასევე უნდა მოემზადოს ეკონომიკური და სოციალური გამოწვევების დასაძლევად.
„ასეთი მასშტაბის კრიზისების დროს, აუცილებელია გარკვეული დონის პოლიტიკური კონსოლიდაცია. ისიც აუცილებლად უნდა გვახსოვდეს, რომ ასეთ კრიზისში საზოგადოების დაუცველ ფენებს სჭირდებათ მეტი მხარდაჭერა, რადგან ასეთ დროს ისინი ყველაზე მეტად ზარალდებიან. ჩვენი წარმატება ამ პირველ ბრძოლაში გვიხსნის ახალ შესაძლებლობებს“, – განაცხადა პრეზიდენტმა.
პრემიერმა თავის სიტყვაში “აფხაზ და ოს ძმებსაც” მიულოცა საქართველოს დამოუკიდებლობის დღე და თქვა, რომ “ჩვენ ერთად შევძლებთ ჩვენი ქვეყნის მშენებლობას, წარმატებული სახელმწიფოს შექმნას.
“102 წლის წინ ეროვნულმა საბჭომ მიიღო დამოუკიდებლობის აქტი და ამ ნაბიჯით გადადგა უმნიშვნელოვანესი ნაბიჯი ქვეყნის შემდგომი განვითარებისთვის. საქართველოს ისტორიაში ეს არის უაღრესად მნიშვნელოვანი დღე და მაშინ, სწორედ 26 მაისს პირველმა რესპუბლიკამ განსაზღვრა ჩვენი ქვეყნის შემდგომი ორიენტაცია,” – აღნიშნა პრემიერმა.
ტრამპის წერილი. საქართველოს უცხოელი მეგობრები ულოცავენ
საქართველოს დამოუკიდებლობის დღე საერთაშორისო მეგობრებმაც მიულოცეს.
პრემიერმა გახარიამ აშშ-ის პრეზიდენტი დონალდ ტრამპის და ინგლისის დედოფლის მისალოცი წერილები მიიღო.
დონალდ ტრამპი თავის წერილში წერს, რომ აშშ-ი აგრძელებს საქართველოს ურყევ მხარდაჭერას ნატოსკენ მიმავალ გზაზე”.
აშშ-ის პრეზიდენტი ხაზს უსვამს, რომ მისი ქვეყანა მტკიცე მხარდაჭერას უცხადებს საქართველის სუვერენიტეტს და ტერიტორიულ მთლიანობას საერთაშორისოდ აღიარებულ საზღვრებში.
„ამერიკის შეერთებული შტატები დიდად აფასებს და პატივისცემით ეპყრობა საქართველოს თავდაცვისუნარიანობის გაძლიერებისკენ მიმართულ ძალისხმევას, მათ შორის, მნიშვნელოვან წვლილს ნატოს მისიაში, ავღანეთში, სადაც ქართველი მებრძოლები ამერიკული და ნატოს ძალების მხარდამხარ მსახურობენ,” – წერია წერილში.
წერილში ასევე ხაზგასმულია საქართველოში დემოკრატიული ინსტიტუტების გაძლიერების, კანონის უზენაესობის და პლურალიზმის მნიშვნელობა:
“ჩვენ მტკიცედ ვუჭერთ მხარს საქართველოს დემოკრატიულ და ეკონომიკურ განვითარებას, რაც არსებითად მნიშვნელოვანია ევროატლანტიკურ ინტეგრაციასთან დაკავშირებით ქართველი ხალხის მისწრაფებების განსახორციელებლად. ველი თქვენთან თანამშრომლობას, რათა დავეხმაროთ საქართველოს დემოკრატიული ინსტიტუტების კონსოლიდაციასა და პოლიტიკური პლურალიზმის განმტკიცებაში, კანონის უზენაესობის გაძლიერებაში, რომლის საყრდენს წარმოადგენს დამოუკიდებელი სასამართლო. ასევე ეკონომიკის დივერსიფიკაციაში. გულითადად ვულოცავ ქართველებს, ვუსურვებ კეთილდღეობას, ნაყოფიერ და უსაფრთხო მომავალს“.
საქართველოში აშშ-ს საელჩო ასევე ავრცელებს აშშ-ის ელჩის კელი დეგნანის ვიდეომიმართვას.
დიპლომატი აღნიშნავს, რომ საქართველოსა და აშშ-ს მტკიცე მეგობრობა აკავშირებს, რომელიც საერთო ღირებულებებს ეფუძნება – თავისუფლებას, დემოკრატიას, ტოლერანტობასა და დაუღალავ შრომას.
საქართველოს დამოუკიდებლობის დღე Google-მაც მიულოცა.
ამ საძიებო სისტემის მთავარ გვერდზე საქართველოს მოქალაქეებმა 26 მაისს საკუთარი დროშა ნახეს. გუგლის ლოგო კი თეთრ-წითელ ფერებში იყო გადაწყვეტილი:
_________________
საქართველოში საგანგებო მდგომარეობა 23 მაისს, ორი თვის თავზე მოიხსნა. ქვეყანაში 26 თებერვლიდან დღემდე 732 კოვიდ-ინფიცირებული გამოვლინდა. მათგან 70 პროცენტზე მეტი – 537 გამოჯანმრთელდა, გარდაიცვალა – 12.
15 ივნისიდან საქართველო შიდა ტურიზმის განახლებას გეგმავს, 1 ივლისიდან კი საზღვრების გახსნას და უცხოელი ტურისტების მიღებას.
