გურამ როგავასა და ზვიად მაისაშვილზე თავდასხმისთვის დაკავებულ სპეცრაზმელებს 5-5 წლიანი პატიმრობა მიესაჯათ
გურამ როგავას და ზვიად მაისაშვილის საქმე
2024 წლის ნოემბერ-დეკემბერში მიმდინარე საპროტესტო აქციების დროს ჟურნალისტ გურამ როგავასა და მოქალაქე ზვიად მაისაშვილზე ფიზიკური ძალადობისთვის დაკავებულ სპეცრაზმელებს სასამართლომ ხუთ-ხუთი წლით თავისუფლების აღკვეთა მიუსაჯა.
ტელეკომპანია „ფორმულას“ ჟურნალისტ გურამ როგავაზე თავდასხმისთვის მსჯავრდებულ სპეცრაზმელს ასევე სამი წლით საქმიანობის უფლება შეეზღუდა. განაჩენის შესახებ როგავას საქმის ახალმა პროკურორმა, ლაშა გამყრელიძემ ჟურნალისტს სატელეფონო ზარით შეატყობინა.
„ფორმულას“ ინფორმაციით, როგავა საქმის განხილვისას დაზარალებულის სტატუსით გამოკითხვას ელოდა, თუმცა პროკურორის განმარტებით, სასამართლომ და დაცვის მხარემ წარდგენილი ბრალდება უდავოდ ცნეს და მისი გამოკითხვა მიზანშეწონილად არ მიიჩნიეს. თავად ჟურნალისტი მიიჩნევს, რომ მისი რეალური თავდამსხმელი ამ დრომდე თავისუფალია.
ხუთ-ხუთი წლით პატიმრობა შეეფარდათ ზვიად მაისაშვილზე თავდასხმისთვის დაკავებულ ორ სპეცრაზმელსაც. ინფორმაცია „ტაბულას“ ადვოკატმა დიმიტრი მჭედლიშვილმა დაუდასტურა.
მაისაშვილს სპეცრაზმელებმა 2024 წლის 30 ნოემბერს, დილის დაახლოებით 06:30 საათზე, რუსთაველის გამზირზე მიმდინარე აქციის დროს, სახეში წიხლი ჩაარტყეს. დარტყმის შედეგად მან გონება დაკარგა. მისი ცემის ამსახველი კადრები სოციალურ ქსელებში გავრცელდა.
საქართველოს პროკურატურამ როგავას, მაისაშვილისა და ოპოზიციონერი პოლიტიკოსის, ლევან ხაბეიშვილის მიმართ ძალადობის საქმეებზე ხუთი პირის იდენტიფიცირებისა და დაკავების შესახებ 2026 წლის 7 მაისს განაცხადა. უწყების ცნობით, დაკავებულთაგან ოთხი სპეცრაზმის ყოფილი და მოქმედი თანამშრომელი იყო, ერთი კი შინაგან საქმეთა სამინისტროს დაცვის პოლიციის დეპარტამენტის მოქმედი თანამშრომელი. მათგან ორი დაკავების მომენტისთვის უკვე სასჯელს იხდიდა.
პროკურატურის ინფორმაციით, გურამ როგავაზე 2024 წლის 29 ნოემბერს, რუსთაველის გამზირზე მიმდინარე აქციის დროს, შინაგან საქმეთა სამინისტროს განსაკუთრებულ დავალებათა დეპარტამენტის თანამშრომელმა იძალადა. ჟურნალისტი თავდასხმის მომენტში პროფესიულ მოვალეობას ასრულებდა.
დაკავებულებს ბრალი სისხლის სამართლის კოდექსის 333-ე მუხლის მესამე ნაწილით წარედგინათ, რაც სამსახურებრივი უფლებამოსილების ძალადობით გადამეტებას გულისხმობს. როგავას ეპიზოდზე დაკავებულ პირს დამატებით ჟურნალისტისთვის პროფესიულ საქმიანობაში უკანონოდ ხელის შეშლის ბრალდებაც წაუყენეს. პროკურატურის თავდაპირველი განცხადების თანახმად, წარდგენილი ბრალდებები ხუთიდან რვა წლამდე თავისუფლების აღკვეთას ითვალისწინებდა.
მაისაშვილის განცხადებით, მის საქმეზე დაკავებულმა ორივე სპეცრაზმელმა დანაშაული აღიარა და მას ბოდიში მოუხადა.
წინაისტორია
გურამ როგავასა და ზვიად მაისაშვილზე თავდასხმა 2024 წლის ნოემბერ-დეკემბერში თბილისში მიმდინარე პროევროპული საპროტესტო აქციების დროს პოლიციის მხრიდან ძალადობის რამდენიმე გახმაურებულ შემთხვევას შორის იყო.
პროტესტი 2024 წლის 28 ნოემბერს დაიწყო, მას შემდეგ, რაც პრემიერ-მინისტრმა ირაკლი კობახიძემ განაცხადა, რომ ხელისუფლება 2028 წლის ბოლომდე ევროკავშირთან გაწევრიანების მოლაპარაკებების გახსნის საკითხს დღის წესრიგში აღარ დააყენებდა.
მომდევნო დღეებში რუსთაველის გამზირსა და პარლამენტის მიმდებარე ტერიტორიაზე სამართალდამცველებმა აქციის მონაწილეების წინააღმდეგ წყლის ჭავლი, ცრემლსადენი გაზი და სხვა სპეციალური საშუალებები გამოიყენეს. დემონსტრანტების, ჟურნალისტებისა და უფლებადამცველების მიმართ ფიზიკური ძალადობის არაერთი შემთხვევა დაფიქსირდა.
აქციების დროს დაშავდნენ როგორც დემონსტრანტები, ისე მედიის წარმომადგენლები. განსაკუთრებული ყურადღება მიიპყრო ჟურნალისტ გურამ როგავაზე თავდასხმამ: 2024 წლის 29 ნოემბერს, რუსთაველის გამზირზე, პირდაპირი ჩართვის დროს მას სპეცრაზმელი ფიზიკურად გაუსწორდა. თავდასხმის შედეგად ჟურნალისტმა მძიმე დაზიანებები მიიღო.
თავდასხმის ფაქტზე გამოძიების დაწყებას მედიის წარმომადგენლები და უფლებადამცველი ორგანიზაციები ითხოვდნენ. ეუთოს დემოკრატიული ინსტიტუტებისა და ადამიანის უფლებების ოფისმა 2024 წლის 30 ნოემბერს განაცხადა, რომ პოლიციის მიერ წყლის ჭავლის, წიწაკის სპრეისა და ხელკეტების გამოყენება, მათ შორის მშვიდობიანი დემონსტრანტებისა და ჟურნალისტების წინააღმდეგ, არაპროპორციული იყო.
საქართველოს სახალხო დამცველის 2024 წლის ანგარიშის მიხედვით, 2024 წლის 15 აპრილიდან 2025 წლის 1 მარტამდე სახალხო დამცველისა და მისი წარმომადგენლების მიერ აქციებზე დაკავებული ან დაშავებული 624 ადამიანი მოინახულეს. მათგან 360-მა არასათანადო მოპყრობის შესახებ განაცხადა. ანგარიშში ასევე აღნიშნული იყო, რომ ამ პერიოდში სამართალდამცველთა მხრიდან ჩადენილი ძალადობისთვის პასუხისმგებლობა არცერთ პოლიციელს არ ჰქონდა დაკისრებული.
პროკურატურის 2026 წლის 7 მაისის განცხადების თანახმად, ზვიად მაისაშვილის, ლევან ხაბეიშვილისა და გურამ როგავას საქმეებზე გამოძიების ფარგლებში 550-ზე მეტი მოწმე გამოიკითხა და ათასობით საგამოძიებო და საპროცესო მოქმედება ჩატარდა. უწყების განცხადებით, გამოძიება სხვა შესაძლო მონაწილეების იდენტიფიცირებისა და პასუხისმგებლობის დაკისრების მიზნითაც გაგრძელდებოდა.
