კენტი და ლუწი ნომრების სისტემა ან ფასიანი ზონები: კალაძე ავტომობილების მოძრაობის შეზღუდვის შესაძლებლობას განიხილავს
საცობები თბილისში
თბილისის მერი კახა კალაძე დედაქალაქში საცობების პრობლემის მოგვარების შესაძლო გზებად ავტომობილების მოძრაობის შეზღუდვას, კენტი და ლუწი სანომრე ნიშნების მიხედვით გადაადგილების დაშვებასა და ქალაქის ცალკეულ უბნებში ფასიანი შესვლის დაწესებას ასახელებს.
მისი თქმით, ავტომობილების რაოდენობის ზრდა თბილისის ერთ-ერთი მთავარი გამოწვევაა, რომლის მოგვარებაც მხოლოდ ინფრასტრუქტურული პროექტებით, მათ შორის ესტაკადების მშენებლობით, შეუძლებელია.
კალაძეს არ უთქვამს, რომ რომელიმე ამ ღონისძიების შემოღების შესახებ გადაწყვეტილება უკვე მიღებულია, თუმცა მან აღნიშნა, რომ პრობლემის მოსაგვარებლად კონკრეტული შეზღუდვების დაწესება შესაძლოა საჭირო გახდეს და ასეთ შემთხვევაში საზოგადოებამ გადაწყვეტილება უნდა მიიღოს.
11 ნოემბერს, პროსახელისუფლებო ტელეკომპანია „იმედის“ ეთერში საუბრისას, კალაძემ განაცხადა, რომ 2026 წელს თბილისში პიკის საათებში 900 000 ავტომობილის გადაადგილება დაფიქსირდა.
მან გააკრიტიკა მოსაზრება, რომ საცობების ერთ-ერთი მთავარი მიზეზი ავტობუსებისთვის გამოყოფილი პრიორიტეტული ზოლებია და მაგალითად აღმაშენებლის ხეივანი მოიყვანა. მერის თქმით, ამ მონაკვეთზე ავტობუსის ზოლის არარსებობის მიუხედავად, დღის გარკვეულ მონაკვეთებში გადაადგილება პრაქტიკულად შეუძლებელია.
„ყველაზე დიდი პრობლემა არის ავტომობილებზე დამოკიდებულება და რაოდენობა. და არა ის, რომ მერია არაფერს აკეთებს. შესაძლებელია კონკრეტული გადაწყვეტილებები, როგორც სხვა ქვეყნებში“, – განაცხადა კალაძემ.
წამყვანის მიერ კენტი და ლუწი სანომრე ნიშნების მიხედვით ავტომობილების მოძრაობის შეზღუდვის შესაძლებლობის ხსენების შემდეგ, მერმა ეს ვარიანტი ერთ-ერთ შესაძლო გამოსავლად დაასახელა.
„თუ გვინდა ამ პრობლემის მოგვარება, შეგვიძლია მაგაზეც შევჯერდეთ, რაღაც დღეების განმავლობაში კენტი ან ლუწი ნომრიანი მანქანები იყოს დაშვებული. ან კონკრეტულ უბნებში დავაყენოთ კამერები, ფასიანი შესვლა, როგორც გაკეთდა ეს ბევრ ევროპულ ქალაქში“, – თქვა მერმა.
კალაძის განცხადებით, მსგავსი გადაწყვეტილებების მიღება საზოგადოებისთვისაც რთული იქნება, თუმცა პრობლემის მოგვარება მოქალაქეების მონაწილეობასაც მოითხოვს.
„როდესაც ვიღებთ კონკრეტულ გადაწყვეტილებას, ყველამ ეს უნდა გავითავისოთ. საზოგადოებაც მზად უნდა იყოს ამისთვის. ისე არ გამოვა, რომ მუნიციპალიტეტი არაფერს აკეთებს და პრობლემაა. არა, უნდა მივიღოთ გადაწყვეტილება და ყველამ გავიჭირვოთ“, – განაცხადა კალაძემ.
საცობები და მზარდი ურბანული დატვირთვა
თბილისში საცობები და საზოგადოებრივი ტრანსპორტის გადატვირთულობა წლების განმავლობაში ერთ-ერთ მთავარ სატრანსპორტო პრობლემად რჩება. ქალაქის სწრაფი ურბანული ზრდა, ახალი საცხოვრებელი უბნების განვითარება და კერძო ავტომობილებზე მაღალი დამოკიდებულება არსებულ სატრანსპორტო ინფრასტრუქტურას დამატებით დატვირთვას უქმნის.
თბილისში ყველაზე სწრაფად მზარდი საცხოვრებელი უბანი დიდი დიღომია, რომელსაც ნავთლუღი და ვარკეთილი მოსდევს. დანიური საკონსულტაციო კომპანია „რამბოლის“ კვლევის თანახმად, რომელიც თბილისის მერიის დაკვეთით მომზადდა, 2022-2042 წლებში დიდ დიღომში მოსახლეობის რაოდენობა, სულ მცირე, გაორმაგდება.
კვლევის ავტორები უბანში სატრანსპორტო პრობლემების გრძელვადიანი მოგვარების ერთ-ერთ გზად სარკინიგზო ტრანსპორტის განვითარებას ასახელებენ.
ამ მიმართულებით თბილისის მერია ტრამვაის ხაზის პროექტზე მუშაობს. 2026 წლის 7 სექტემბერს მუნიციპალიტეტმა თურქული კომპანიების ჯგუფ EYE-სთან პროექტირება-მშენებლობის ხელშეკრულება გააფორმა. პროექტის ფარგლებში დიდი დიღმიდან მეტროსადგურ „დიდუბემდე“ ტრამვაის ხაზი უნდა მოეწყოს. კონტრაქტის ღირებულება 287 654 321 ლარია, ხოლო პროექტის დასრულება 2030 წლამდე იგეგმება.
პარალელურად, ბოლო წლებში მერიამ დედაქალაქის რამდენიმე მთავარ ქუჩაზე ავტობუსებისთვის პრიორიტეტული ზოლები გამოყო, რომელთა მიზანი საზოგადოებრივი ტრანსპორტის გადაადგილების დაჩქარება და კერძო ავტომობილების გამოყენების შემცირებაა. მოგვიანებით ამ ზოლებით სარგებლობის უფლება ტაქსების გარკვეულ კატეგორიებსაც მიეცათ.
კალაძის მიერ დასახელებული შესაძლო შეზღუდვები თბილისში ავტომობილების რაოდენობის ზრდის წინააღმდეგ უფრო მკაცრი სატრანსპორტო პოლიტიკის გატარებას გულისხმობს, თუმცა მერს მათი შემოღების კონკრეტული ვადები ან განხორციელების გეგმა ამ ეტაპზე არ დაუსახელებია.
