ტრაგედია აფხაზეთში: რუსი დამსვენებელი შვილთან ერთად აღელვებულ ზღვაში დაიხრჩო
აფხაზეთში, ზღვაში რუსი ტურისტები დაიხრჩვნენ
აფხაზეთში ტრაგედია დატრიალდა – რუსი ტურისტების ოჯახი ზღვამ წაიღო. მხოლოდ ორი ბავშვის გადარჩენა მოხერხდა. მანამდე კიდევ ორი რუსი ტურისტი დაიხრჩო. ტურისტები ზღვაში, შტორმის გამო დაწესებული აკრძალვებისა და გაფრთხილებების მიუხედავად ბანაობენ.
ძლიერი შტორმის მიუხედავად, რომელიც რამდენიმე დღის განმავლობაში მძვინვარებდა შავი ზღვის აფხაზურ სანაპიროზე, ზღვაში ექსტრემალურ პირობებში ცურვის მოყვარულები რუსეთიდან აფხაზეთში ჩამოსულ ტურისტებს შორის, საკმაოდ ბევრნი აღმოჩნდნენ.
სანქტ-პეტერბურგელი ტურისტი ტამარა მოლჩანოვა თავის სამ მცირეწლოვან შვილთან ერთად ასევე აპირებდა შტორმში ზღვაში საბანაოდ წასვლას. თუმცა, სასტუმროს ადმინისტრაციამ, სადაც ის ისვენებდა, ამის გაკეთება აუკრძალა, რის შემდეგაც ქალმა შვილებთან ერთად ბანაობა მდინარე ბზიფში გადაწყვიტა.
- მანდარინი, ზღვა და მთა – აფხაზურ ტურიზმს ახალი ლოგო აქვს. თუმცა, იგი ბევრს არ მოსწონს
- რას ყვებინ აფხაზეთში დასასვენებლად ჩასული რუსი ტურისტები. ვიდეო
საბოლოოდ დედა სამ მცირეწლოვან – რვა, ხუთ და სამი წლის შვილთან ერთად მდინარის ძლიერმა დინებამ ზღვისკენ წაიღო. ამის შემსწრე ადგილობრივი მცხოვრები პეტერბურგელების გადასარჩენად გადახტა და უკვე მდინარეში დაიჭირა ერთი ბავშვი.
დანარჩენები კი დინებამ ზღვაში გაიყვანა. იქ უკვე მათ გადარჩენის ოპერაციაში ჩაერთნენ აფხაზეთის საგანგებო სიტუაციების სამინისტროს მაშველები. მათ წყლიდან კიდევ ორი ბავშვის ამოყვანა მოახერხეს. თუმცა, ერთ-ერთი მათგანი უკვე გარდაცვლილი იყო. ბავშვების დედა ტამარა მოლჩანოვა მაშველებმა ვერ იპოვეს.
მანამდე, კიდევ ორი რუსი ტურისტი, რომლებმაც შტორმის დროს ბანაობა გადაწყვიტეს, გაგრის სანაპიროსთან დაიღუპნენ.
აფხაზეთში, ზღვასა და მდინარეებში ბანაობისას რუსების გახშირებული დაღუპვის ფაქტების გამო, აფხაზეთში რუსეთის ფედერაციის საელჩო იძულებული გახდა სპეციალური განცხადებით მიემართა რუსებისადმი, რომლებიც აფხაზეთში შვებულების გასატარებლად ჩავიდნენ:
„ამის გამო მოგიწოდებთ, თავი შეიკავოთ ცურვისგან არახელსაყრელი ამინდის პირობებში, ასევე ადგილებში, სადაც ბანაობა სასტიკად აკრძალულია. წყალში უსაფრთხოების წესების დაუცველობა პირდაპირ საფრთხეს შეიცავს სიცოცხლისა და ჯანმრთელობისთვის. მოუფრთხილდით საკუთარ თავსა და ახლობლებს!“, – ნათქვამია რუსეთის საელჩოს განცხადებაში.
