საქართველოში ვაქცინაციის მოწინააღმდეგეთა 37,5%-ი მიზეზად უშვილობას ან სიკვდილს ასახელებს
საქართველოში ვაქცინაციის პროცესი საქსტატმა გამოიკვლია. მათი ინფორმაციით, კორონავირუსის საწინააღმდეგო ვაქცინას რესპონდენტების მხოლოდ 28.8 პროცენტი გაიკეთებდა, 10.4 პროცენტის აზრით ნაკლებად მოსალოდნელია, რომ გაიკეთონ, 31.4 პროცენტისათვის – თითქმის გამორიცხულია, ხოლო 29.5 პროცენტს არ გადაუწყვეტია მისი გაკეთება.
მონაცემები 2021 წლის თებერვალი-მარტის პერიოდში შეგროვდა – სწორედ ამ დროს დაიწყო საქართველოში ვაქცინაციის პროცესი.
აღსანიშნავია ისიც, რომ ვაქცინის გაკეთებაზე თავის შეკავების ან სურვილის არ ქონის ძირითად მიზეზებად რესპონდენტები ვაქცინის გვერდით მოვლენებს, სიკვდილის ან უნაყოფობის საფრთხეს ასახელებენ.
სრული მაჩვენებელი:
საქსტატის მიხედვით, საქართველოში ვაქცინებს ენდობა რესპონდენტების 57.7 პროცენტი.
ეს მაჩვენებელი დასახლების ტიპის მიხედვითაც განსხვავდება: საქალაქო ტიპის დასახლებებისთვის 60.7 პროცენტს, ხოლო სასოფლო ტიპის დასახლებებისთვის 53.4 პროცენტს შეადგენს.
● საქართველოს კლინიკების ასოციაცია: ლეტალობის ასეთი მაჩვენებელი კატასტროფულია
● Covid-19-ის მეოთხე ტალღა – რა ხდება საქართველოში. ბოლო მონაცემები
● საქართველოში საველე ჰოსპიტლებმა დაიწყო მუშაობა
ვაქცინაციის წახალისების მიზნით, საქართველოში კამპანია – “აიცერი და მოიგე” დაიწყო. მთავრობის მიერ დაანონსებულ გათამაშებასთან დაკავშირებით ლატარიის ეროვნული კომპანია განცხადებას ავრცელებს, რომლის მიხედვით, ყველა ადამიანს, ვინც ერთხელ მაინც არის აცრილი ან აიცრება, ფულის მოგების შესაძლებლობა ექნება.
ასევე, ქვეყანაში მუშაობენ აპლიკაციის შექმნაზე, რომელიც QR კოდით მოქალაქის კოვიდსტატუსის იდენტიფიცირებას მოახდენს. აპლიკაციაში იქნება სრული ინფორმაცია მოქალაქის PCR და სწრაფი ტესტის პასუხისა და ვაქცინაციის შესახებ. ასევე, ამ აპლიკაციის მეშვეობით აბსოლუტურად გათვალისწინებულია პერსონალური მონაცემების სრული დაცვა და მისი გამოყენებით მომხმარებელი ადასტურებს, რომ ეთანხმება მისი ინფორმაციის დამუშავებას.
დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, რომ საკოორდინაციო საბჭოს სხდომებზე, რომელიც ახალ შეზღუდვებსა და რეგულაციებს განიხილავს, ექიმები უმცირესობაში არიან და ქვეყანაში პოლიტიკა უფრო მაღლა დადგა ეპიდსიტუაციასთან შედარებით.
ბოლო თვეები განმავლობაში ყოველდღიურად კორონავირუსით 4000-მდე ინფიცირების და 80-მდე გარდაცვალების შემთხვევა იყო, საქართველოში ვაქცინაციის პროცესი კი საკმაოდ შენელდა.
ბოლო 24 საათში ქვეყანაში კორონავირუსის 2 515 ახალი შემთხვევა გამოვლინდა და 60 პაციენტი გარდაიცვალა.
15 სექტემბრის მონაცემებით სულ ჩატარებულია 1 561 228 აცრა:
სულ მცირე 1 დოზით ვაქცინირებულია 919 876 ადამიანი – მოზრდილი მოსახლეობის 32.2%;
სრულად ვაქცინირებულია 641 352 ადამიანი – მოზრდილი მოსახლეობის 22.5%.
