საგარეო საქმეთა სამინისტრო უარყოფს 3+3 ფორმატში მონაწილეობას
საქართველოს საგარეო საქმეთა სამინისტრო უარყოფს 3+3 ფორმატში მონაწილეობას და აცხადებს, რომ დავით ზალკალიანის გუშინდელი კომენტარი არასწორად იქნა ინტერპრეტირებული.
უწყების განცხადებაში ნათქვამია, რომ მინისტრს საზოგადოებრივი მაუწყებლის ეთერში ინტერვიუს დროს არ უთქვამს, რომ საქართველო აღნიშნულ ფორმატში უნდა იყოს წარმოდგენილი.
3+3 ფორმატის იდეა 2020 წლის მთიანი ყარაბაღის კონფლიქტის შემდეგ, თურქეთის პრეზიდენტმა, რეჯეფ თაიფ ერდოღანმა წამოაყენა.
ფორმატი გულისხმობს ექვსი ერის პლატფორმის შექმნას, რომელშიც მონაწილეობა თურქეთის, აზერბაიჯანის, სომხეთის, საქართველოს, რუსეთისა და ირანის ხელისუფლებებმა უნდა მიიღონ, რათა – როგორც ერდოღანი ამბობს – რეგიონში მშვიდობა დამყარდეს.
აქამდე, ქართული მხარე უარს ამბობდა 6 ერის პლატფორმაში მონაწილეობაზე. თუმცა ერდოღანმა ეს ინიციატივა კიდევ ერთხელ გაიმეორა 2021 წლის ივნისში, აზერბაიჯანში ვიზიტის დროს.
თურქეთის პრეზიდენტმა მაშინ განაცხადა, რომ კავკასიის რეგიონში მშვიდობის დამყარება რეგიონული კოოპერაციითაა შესაძლებელი და ეს მთელი მსოფლიოსთვის სასიკეთო იქნება.
“არა მხოლოდ აზერბაიჯანი, არამედ რეგიონის ყველა ქვეყანა, სომხეთის ჩათვლით, ასევე მთელი მსოფლიო, მოგებული დარჩება კავკასიაში მშვიდობისა და სიწყნარის არსებობით”, – თქვა ერდოღანმა.
საგარეო საქმეთა სამინისტრო განმარტავს, რომ მათ არაერთხელ დაუფიქსირებიათ პოზიცია იმასთან დაკავშირებით, რომ საქართველო არ განიხილავს რუსეთის ფედერაციასთან ერთად 3+3 ფორმატში მონაწილეობას.
ამასთან, მათი თქმით, საქართველოს რეგიონში მნიშვნელოვანი როლი და ფუნქცია აქვს და აქ იგულისხმება იმ სტრატეგიულად მნიშვნელოვან პროექტებში მონაწილეობა, რომლებიც მნიშვნელოვან როლს ასრულებენ აზიისა და ევროპის დაკავშირებაში და მნიშვნელოვნად უწყობენ ხელს ქვეყნის ეკონომიკურ და პოლიტიკურ დამოუკიდებლობას.
“უფრო მეტიც, საქართველოს პრემიერმინისტრმა გაეროს გენერალურ ასამბლეაზე წამოაყენა კონკრეტული იდეა – მშვიდობიანი სამეზობლო ინიციატივა, რომელიც ეფუძნება ურთიერთპატივისცემისა და თანასწორობის პრინციპებს და მიზნად ისახავს რეგიონში მშვიდობისა და სტაბილურობის აღდგენას”, – ნათქვამია საგარეო საქმეთა სამინისტროს განცხადებაში.
● ერთი წელი ყარაბაღის მეორე ომიდან – მთავარი მოვლენები ერთ ვიდეოში
● სომხურ-თურქული ურთიერთობების ნორმალიზაცია: პერსპექტივები და საფრთხეები
● ფაშინიანი აცხადებს, რომ მზად არის აზერბაიჯანთან მოლაპარაკების პროცესი განაახლოს
გუშინ, საქართველოს საგარეო საქმეთა მინისტრმა დავით ზალკალიანმა ე.წ. 3+3 ფორმატის შესახებ საზოგადოებრივი მაუწყებლის ეთერში ისაუბრა.
მინისტრის თქმით, აღნიშნულ ფორმატში საქართველომ რაღაც ფორმით მაინც უნდა მიიღოს მონაწილეობა, რათა ქვეყანამ რეგიონში ფუნქცია არ დაკარგოს, მიუხედავად იმისა, რომ რუსეთთან თანამშრომლობა რთული იქნება.
“მინდა საზოგადოებას ფიქრისთვის ასეთი პოზიცია მივაწოდო, რომ ჩვენ ამ დიდ გეოპოლიტიკურ პროექტებსა და ურთიერთობებში რაღაც ფორმით [უნდა ვიყოთ], რა თქმა უნდა, არა სახელმწიფო ინტერესებისა და არა ოკუპანტთან დათმობის ხარჯზე. რა თქმა უნდა, ჩვენი ქვეყნის სუვერენიტეტი და ტერიტორიული მთლიანობა წითელი ხაზია”, – თქვა ზალკალიანმა.
მინისტრის სიტყვები კრიტიკულად შეაფასა საქართველოში ამერიკის შეერთებული შტატების ყოფილმა ელჩმა, იან კელიმ, რომელმაც ტვიტერზე დაწერა:
“ძალიან რთული?” რუსეთი შემოიჭრა და დაგიპყროთ. თქვენს მეგობრებს ერჩივნათ მოესმინათ, რომ “შეუძლებელია.”
