სააკაშვილის პირადი ექიმი: ასე მკურნალობა შეუძლებელია, ეს საავადმყოფო არაა

გლდანის ციხიდან გამოსული საქართველოს მესამე პრეზიდენტის, მიხეილ სააკაშვილი მკურნალი ექიმი ამბობს, რომ სააკაშვილს აქვს მაღალი წნევის პრობლემა და სააკაშვილის მდგომარეობა დღითიდღე უარესდება. ასევე, ნიკოლოზ ყიფშიძის თქმით, ამის გაგრძელება და ასე მკურნალობა შეუძლებელია.

“მქონდა შესაძლებლობა, რომ მენახა პრეზიდენტი, პრეზიდენტს ჰქონდა პრობლემა წნევასთან დაკავშირებით, ამ საღამოს დარეგულირდა. არაუშავს, მაგრამ კიდევ ერთხელ ვიმეორებ, ამის გაგრძელება, ასე მკურნალობა შეუძლებელია, ყოველდღე ვიძახი ამას, მაგრამ რატომღაც საქართველოს მოსახლეობას ეს არ ესმის ან მე ვლპარაკობ ცუდად, ყოველდღე იქნება უარესი და უარესი, ასე თუ გაგრძელდა. მაღალი წნევა ჰქონდა დღესაც და გუშინაც, ამჟამად დავასტაბილურეთ მაგრამ ეს არ ნიშნავს, რომ ხვალ არ ექნება ეს პრობლემა ისევ. ადამიანი შიმშილობს, სჭირდება მკურნალობა, არც შიმშილობას წყვეტს, მკურნალობა არ მიმდინარეობს, ეს დაწესებულება არ არის საავადმყოფო, როგორ უნდა მოველოდოთ კარგ შედეგს” ,- ამბობს ნიკოლოზ ყიფშიძე.

● სააკაშვილის საქმე: რა წერია სტრასბურგის სასამართლოს გადაწყვეტილებაში
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
●  სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე

მიხეილ სააკაშვილი პალატაში მოინახულა “ნაციონალური მოძრაობის” წევრმა ეკა ხერხეულიძემაც, რომელმაც ტელეკომპანია “პირველის” ეთერში განაცხადა, რომ მიხეილ სააკაშვილი გადაყვანილია არა გლდანის ციხის სამედიცინო ნაწილში, არამედ კლინიკის მეხუთე სართულზე, ოთახში სადაც მას სიცოცხლისთვის საჭირო არც ჟანგბადი აქვს და არც სამედიცინო აღჭურვილობა.

ეკა ხერხეულიძის ნათქვამიდან ვიგებთ, რომ:

● მესამე პრეზიდენტი ხშირად ხდება ცუდად და არის სრულიად მარტო ამ დროს, თუ ვიზიტორი არ ჰყავს, ანუ ყურადღებასაც არავინ აქცევს. არ აქვს ღილაკი, რომ გამოიძახოს მედპერსონალი;
● მისი მედპერსონალი შემოიფარგლება ერთი ექიმით, რომელიც შიშველი ხელებითაა წარმოდგენილი და რომელიც გვერდით ოთახშია. ცუდად გახდომის შემთხვევაში, სააკაშვილმა ხმით უნდა გააგებინოს ექიმს;
● მის ოთახში არის მხოლოდ ერთი წნევის აპარატი;
● მას იცავს ერთი შეუიარაღებელი ადამიანი;
● კალიუმი აქვს იმ დონეზე, რომ ნებისმიერ დროს შეიძლება განუვითარდეს ინფარქტი;
● იმისთვის, რომ ქვედა სართულზე ჩაიყვანონ სადაც პალატებია განთავსებული და სადაც შესაძლებელია მარტივი მანიპულაციის ჩატარება, ჯერ იმ სართულზე დანარჩენი პატიმრების ევაკუაცია უნდა მოახდინონ.
● სააკაშვილი ქვედა სართულზე აქამდე არ ჩაუყვანიათ.

“მიხეილ სააკაშვილი გადაყვანილი კი არ არის მულტიპროფილურ კლინიკაში, მულტიპროფილურ ჯოჯოხეთშია გადაყვანილი და რატომ, პირველ რიგში მას სჭირდება ჟანგბადი. ფანჯარა არის სრულად დაგმანული, არ იღება. ჟანგბადი იქ არ შედის და არ შედის მზის სხივი, როგორც კი ამ ფანჯარას აწევს მიხეილ სააკაშვილი, ჟანგბადის მიღების მიზნით, ცარიელ საკანში სადაც არანაირი დახმარების ინსტრუმენტი არ არსებობს, მაშინვე ტყდება გინება და ისტერიკა პატიმრების მხრიდან და ის იძულებულია ჩამოწიოს ის ფანჯარა. ადამიანს, რომელიც ამდენი დღე შიმშილობს არ აქვს ჟანგბადის მიღების შესაძლებლობა“, – ამბობს ეკა ხერხეულიძე.

დეპუტატის თქმით, ადამიანი რომელიც “ვითომ გადაიყვანეს სამკურნალოდ კონსილიუმის დასკვნის და საგანგაშო მაჩვენებლების საფუძველზე”, რომელსაც სჭირდება სასწრაფო დახმარება, აღმოჩნდა ადამიანების პირისპირ, ვინც მას მუდმივად სიკვდილს უსურვებენ. როგორც ხერხეულიძე აღნიშნავს, თუ მიხეილ სააკაშვილი ცუდად გახდა ამ ცარიელ საკანში შეჰყავთ ექიმი ან ექთანი, რომელიც იქ უსინჯავს წნევას და აუღებს სისხლს საჭიროების შემთხვევაში.

ეკა ხერხეულიძე თქმით, სააკაშვილის ამბობს იმასაც, რომ მას რუსთავში უკეთესი პირობები ჰქონდა და სამედიცინო ოთახში იღებდა კარგ დახმარებას, რადგან ის იყო მედპუნქტი.

● არასამთავრობოები ევროპის წამების კომიტეტს სააკაშვილისადმი მოპყრობის შეფასებას სთხოვენ
● “პუტინის ჯალათები ხართ” – პენიტენციური სააკაშვილის მორიგ კადრებს ავრცელებს

10 ნოემბერს სტრასბურგის სასამართლომ გამოაქვეყნა გადაწყვეტილება იმ “დროებითი ზომების შესახებ”, რომელიც მიხეილ სააკაშვილის შიმშილობას, მის ჯანმრთელობასა და უსაფრთხოებას ეხება.

სტრასბურგში მოქმედმა სასამართლომ საქმეს პრიორიტეტი მიანიჭა და “დროებითი ზომები” მიიღო. “დროებითი ზომების” შინაარსიდან გამომდინარე, სტრასბურგის სასამართლოს ეს გადაწყვეტილება ნიშნავს იმას, ევროპის ადამიანის უფლებათა სასამართლომ სააკაშვილის სიცოცხლის და ჯანმრთელობის მიმართ გამოუსწორებელი ზიანის დადგომის საფრთხე დაინახა.

სააკაშვილმა 11 ნოემბერს განაცხადა, რომ მზადაა შიმშილობა შეწყვიტოს, თუ ხელისუფლება სტრასბურგის გადაწყვეტილებას შეასრულებს და შიმშილობის შემდეგ, მის რეაბილიტაციას უზრუნველყოფს.

საქართველოს მესამე პრეზიდენტი უკვე 40 დღეზე მეტია შიმშილობს, მას შემდეგ, რაც ის პირველ ოქტომბერს დააკავეს.

8 ნოემბერს “ჯანმრთელობის გაუარესების პრევენციის” მიზნით, იგი რუსთავის ციხიდან გლდანის ციხის საავადმყოფოში გადაიყვანეს მისი ნების საწინააღმდეგოდ. თავად სააკაშვილი, მისი ოჯახი, მკურნალი ექიმები და ასევე სახალხო დამცველის აპარატი ციხის საავადმყოფოში მისი გადაყვანის წინააღმდეგნი იყვნენ იმ მოტივით, რომ ციხის საავადმყოფოში არ იყო სააკაშვილის მკურნალობისთვის საჭირო სამედიცინო აღჭურვილობა და ასევე არ იყო უსაფრთხო.

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

სააკაშვილის სამოქალაქო კლინიკაში გადაყვანის მოთხოვნით, პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო.

გლდანში სააკაშვილი მალულად გადაიყვანეს. ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.