"სააკაშვილი საქართველოს მთავრობის წინააღმდეგ" - ევროსასამართლომ სარჩელი წარმოებაში მიიღო

„ერთიანი ნაციონალური მოძრაობის“ ინფორმაციით – “მიხეილ სააკაშვილი – საქართველოს მთავრობის წინააღმდეგ” – ევროსასამართლომ სარჩელი წარმოებაში მიიღო.

საქართველოს მესამე პრეზიდენტის ადვოკატის, გიორგი ჩივიაშვილის განმარტებით, საუბარია ორ საქმეზე – ერთია ვალერი გელაშვილის ცემის ფაქტი და მეორე – შეწყალების საქმესთან დაკავშირებული.

„ორივე საქმეზე მიმდინარეობს განხილვა, შესაბამისი კითხვები გადმოგზავნილია პროკურატურაში და შემდგომ ეტაპზე ჩვენ მოგვიწევს კონკრეტულ პოზიციებზე დაზუსტებული პასუხების გაგზავნა“, – განაცხადა ჩივიაშვილმა  „ტვ პირველთან“ საუბარში.

ადვოკატის თქმით, სააკაშვილის მიმართ საქართველოში, ეროვნული სასამართლოების დონეზე გამოტანილია არაობიექტური განაჩენები. მისი განმარტებით, ვინაიდან საქმეში არ არსებობს პირდაპირი მტკიცებულებები, საქმე შესწავლილი იყო არაჯეროვნად და სწორედ ამიტომ დადგა გამამტყუნებელი განაჩენი.

ევროსასამართლოსთან დაკავშირებით კომენტარი გააკეთა თავად მიხეილ სააკაშვილმაც. მისი თქმით, “საერთოდ არ არის საჭირო სტრასბურგი, იმისათვის რაც იცის თითოეულმა ქართველმა, რომ ეს არის თავიდან ბოლომდე ივანიშვილის „კაპრიზებზე“ რუსეთის დაკვეთით შექმნილი ყალბი, ცრუ საქმეები”.

სააკაშვილმა აღნიშნა ისიც, რომ ევროსასამართლოს კითხვები არის სრულიად არაორაზროვანი, ძალიან ნათელი და კონკრეტული.

“საქართველოს არ სჭირდება ბატონი, საქართველოს სჭირდება პატრონი, ახლა არის ბატონის ქვეშ, ოღონდ უპატრონოდ.

მე მაქვს დაგეგმილი, რომ ძალიან აქტიურად ჩავერთო პროცესებში, რომელიც უკავშირდება შემოდგომის რეფერენდუმს და ამჯერად ნიკა მელიას ციხიდან დახსნას და სხვა რეპრესიების შეწყვეტას“, – განაცხადა სააკაშვილმა.

_____________________________

• მოსაზრება: სააკაშვილის “მესამედ მოსვლა” უკრაინაში
• ბრიყვული და სამარცხვინო – ასე აფასებენ ექსპერტები თბილისის რეაქციას სააკაშვილის შესაძლო დანიშვნაზე უკრაინაში
• უკრაინული მიშა

_______________________________

საქართველოს მესამე პრეზიდენტი მიხეილ სააკაშვილი ამჟამად უკრაინის მოქალაქეა. ის უკრაინის რეფორმების ეროვნული საბჭოს აღმასრულებელი კომიტეტის თავმჯდომარედ უკრაინის პრეზიდენტმა ვოლოდიმირ ზელენსკიმ 2020 წლის 7 მაისს დანიშნა. 

ბოლო განცხადება, სადაც ექსპრეზიდენტი ამბობდა, რომ საქართველოში ბრუნდება, მიხეილ სააკაშვილმა გასული წლის 27 აგვისტოს გაავრცელა. 

მიხეილ სააკაშვილზე საქართველოს ხელისუფლებას ძებნა აქვს გამოცხადებული. მას საქართველოში დაუსწრებლად აქვს მისჯილი პატიმრობა სანდრო გირგვლიანის მკვლელობისა და დეპუტატ ვალერი გელაშვილის ცემის საქმეებზე. საქართველოს კანონმდებლობით კი პატიმრობაში მყოფ და ნასამართლევ ადამიანს საჯარო სამსახურში მუშაობა ეკრძალება.