მიხეილ სააკაშვილი - მე ვბრუნდები
საქართველოს ყოფილი პრეზიდენტი და ამჟამად უკრაინის რეფორმების აღმასრულებელი კომიტეტის თავმჯდომარე, მიხეილ სააკაშვილი აცხადებს, რომ საქართველოში ბრუნდება.
განცხადებაში, რომელიც სააკაშვილმა საკუთარ ფეისბუკზე გამოაქვეყნა, ამბობს, რომ 7 წელი საკმარისი დრო იყო დაფიქრებისა და ბევრი საკითხის გასაანალიზებლად. ის ბოდიშს იხდის იმ შეცდომებისთვის, რაც ხელისუფლებაში ყოფნის დროს დაუშვა:
„წლების გადმოსახედიდან ვიცი, თუ უკეთესად როგორ უნდა ვემსახურო ჩვენს ქვეყანას, როგორ ავიცილოთ თავიდან შეცდომები… და შეცდომები რა თქმა უნდა იყო და იყო ძალიან მძიმე შეცდომებიც, მაგრამ ღმერთია მოწამე, ყველაფერი საუკეთესო მინდოდა ჩემი ხალხისთვის. მინდოდა რომ ჩემს ხალხს ეცხოვრა უკეთესად, ბევრად უფრო მდიდრულად და მაინც ამ წლების გადმოსახედიდან ამ შეცდომების გამო, რომელიც დავუშვი იმის გამო, რაც ბოლომდე ვერ გავაკეთე, მინდა ყველას საჯაროდ მოგიხადოთ ბოდიში“.
სააკაშვილი აცხადებს, რომ უსაზღვროდ მადლიერია ქართველი ხალხის, რომელმაც ის ქართული სახელმწიფოს მშენებლობის წარმატებული ისტორიული პროცესის მონაწილედ აქცია:
• მოსაზრება: სააკაშვილის “მესამედ მოსვლა” უკრაინაში
• ბრიყვული და სამარცხვინო – ასე აფასებენ ექსპერტები თბილისის რეაქციას სააკაშვილის შესაძლო დანიშვნაზე უკრაინაში
„ამ შვიდი წლის განმავლობაში არ ყოფილა არც ერთი დღე რომ მე არ დავინტერესებულიყავი საქართველოს ამბებით და ვიცი ზუსტად, რომ ჩემს მუშაობას პრეზიდენტის თანამდებობაზე ფუჭად არ ჩაუვლია და ბევრი რამე რაც ჩვენ შევქმენით დღესაც შენარჩუნებულია და მუშაობს, მაგრამ ამავე დროს, როდესაც საქართველოს ამბებს ვისმენ ზუსტად ვხვდები და ვიცი რომ ჩვენ შეგვიძლია ვიცხოვროთ ბევრად უფრო მაგრად, ბევრად უკეთესად და თითოეულ ქართველს შეუძლია იყოს მდიდარი და ეს ჩვენ ერთად გამოგვივა! მე ვბრუნდები!“
საქართველოს მესამე პრეზიდენტი, მიხეილ სააკაშვილი ამჟამად უკრაინის მოქალაქეა.
ის უკრაინის რეფორმების ეროვნულ საბჭოს აღმასრულებელი კომიტეტის თავმჯდომარედ უკრაინის პრეზიდენტმა ვოლოდიმირ ზელენსკიმ 7 მაისს დანიშნა.
უკრაინაში სააკაშვილის თანამდებობაზე დანიშვნის გამო უკრაინაში საქართველოს ელჩი, თეიმურაზ შარაშენიძე კონსულტაციისთვის თბილისში გამოიძახეს.
მიხეილ სააკაშვილმა 11 ივნისს, ფეისბუკზე გავრცელებულ ვიდეომიმართვაში განაცხადა, რომ საქართველოს განადგურებას მშვიდად ვერ უყურებს და ის ხელისუფლების შეცვლისთვის ბრძოლაში წინა ხაზზე იქნება.
საქართველოში რომ “დიდი გეგმები აქვს” და შემოდგომაზე “გადამწყვეტი გარღვევისათვის” ემზადება, ამის თაობაზე სააკაშვილმა ფეისბუკის საკუთარ გვერდზე 14 ივლისსაც დაწერა.
მიხეილ სააკაშვილზე საქართველოს ხელისუფლებას ძებნა აქვს გამოცხადებული. მას საქართველოში დაუსწრებლად აქვს მისჯილი პატიმრობა სანდრო გირგვლიანის მკვლელობისა და დეპუტატ ვალერი გელაშვილის ცემის საქმეებზე.