"ფორმულას" დამფუძნებელს თავდაცვის სამინისტრო სასამართლოში უჩივის

ტელეკომპანია “ფორმულას” დამფუძნებელს და დირექტორს, დავით კეზერაშვილს, არჩევნებამდე ორი დღით ადრე თავდაცვის სამინისტრო სასამართლოში უჩივის. თავდაცვის სამინისტრო უჩივის კეზერაშვილის თავდაცვის მინისტრობის დროს (2006 – 2008 წლები) სახელმწიფო შესყიდვების დეპარტამენტის უფროსს, ალექსანდრე ნინუასაც.

სამინისტრო მიყენებული ზიანის ანაზღაურებას მოითხოვს იმ საქმეზე, რომელზეც უზენაესმა სასამართლომ რამდენიმე კვირის წინ უკვე გამოიტანა გამამტყუნებელი განაჩენი და ამით შეცვალა წინა ორი ინსტანციის გამამართლებელი განაჩენი. კეზერაშვილს 5 მილიონ ევროზე მეტის მიტაცებას ედავებიან.

“სისხლის სამართლის საქმე არ გახლავთ მხოლოდ კორუფციასთან დაკავშირებული შემთხვევა, რადგან აღნიშნული თანხა უბრალოდ გადარიცხულ იქნა ოფშორულ კომპანიაში, ყოველგვარი საქონლის შეძენისა და მიწოდების გარეშე. ეს ქმედება ნათლად ასახავს იმ არაკეთილსინდისიერ დამოკიდებულებას სახელმწიფო ბიუჯეტის მიმართ, რასაც წინა ხელისუფლება მიზანმიმართულად ავლენდა. კიდევ ერთხელ ხაზგასმით აღვნიშნავთ, რომ აღნიშნული სისხლის სამართლის საქმე არ არის მხოლოდ კორუფციული გარიგება, არამედ ეს არის წინა ხელისუფლების მიერ ბიუჯეტიდან ორგანიზებულად თანხის მიტაცების შემთხვევა”, – ვკითხულობთ განცხადებაში.  

დავით კეზერაშვილის ადვოკატის, გიორგი გელხაურის შეფასებით, არჩევნების წინ ძველი საქმის განხილვის გადაწყვეტილება მედიაზე ზეწოლას ემსახურება.

● ინსპექტორის სამსახურმა ლექსო ლაშქარავას საქმეზე შსს და სამედიცინო კლინიკა დააჯარიმა
● “პრემიერი უნდა გადადგეს” – აქცია საქართველოს პარლამენტთან

გამოხმაურება

აღნიშნულ საქმეს მედიაზე ზეწოლად აფასებს ოპოზიციია და არასამთავრობო სექტორიც.

“ევროპული საქართველოს” ერთ-ერთი ლიდერი გიგი წერეთელი ამბობს, რომ კეზერაშვილის წინააღმდეგ ახალი სარჩელი პოლიტიკურად მოტივირებულია.

მისი განმარტებით, ხელისუფლება ყველაფერს ცდილობს წინასაარჩევნოდ იმისათვის, რომ წინა ხელისუფლების წარმომადგენლებზე დამატებითი საქმეები აღძრას, კომპრომატები გამოჩხრიკოს და ეს არის მათი ძირითადი ინსტრუმენტი:

“მე არ ვიცი კონკრეტულად ამ საქმის შესახებ მაგრამ ის ვიცი, რომ დავით კეზერაშვილის მიმართ წარმოებული საქმეები ზოგი შეწყდა, ზოგ საქმეზე ის გამართლდა და კიდევ უფრო მძიმე იყოს ის ფაქტი, რომ ევროპის სასამართლოებმა მათ შორის ლონდონის და საფრანგეთის არ დააკმაყოფილეს ექსტრადიციის მოთხოვნა, იმ მიზეზით, რომ ქართული სასამართლო იყო პოლიტიკურად მოტივირებული და შესაძლოა გამოყენებული ყოფილიყო პოლიტიკური მიზნებისთვის”, – ამბობს გიგი წერეთელი.

“საერთაშორისო გამჭვირვალობა-საქართველოს” ხელმძღვანელი ეკა გიგაური დავით კეზერაშვილის წინააღმდეგ სარჩელზე ამბობს, რომ “ფორმულასა” და მისი დამფინანსებლის წინააღმდეგ მორიგი ნაბიჯები იდგმება:

“დავით კეზერაშვილი პირველ და მეორე ინსტანციაში ვერ მოიგებდა ამ საქმეს, ეს იმიტომ მოხდა, რომ იქ კითხვები არ იყო, მაგრამ როგორც ჩანს, დღეს კონკრეტული ნაბიჯები იდგმება უკვე ფორმულასა და მისი დამფინანსებლის წინააღმდეგ.” 

კეზერაშვილის საქმეს გამოეხმაურა საქართველოს სახალხო დამცველიც. ნინო ლომჯარიას თქმით, კეზერაშვილის საქმეზე უზენაესს სასამართლოს სამოტივაციო ნაწილი არ მიუწოდებია. მისივე თქმით, საქმის გაცნობის გარეშე შეფასებებისგან თავს შეიკავებს.

“როდესაც ჩვენ მივმართეთ უზენაეს სასამართლოს, რომ მოეწოდებინათ მათ გადაწყვეტილება, გვითხრეს, რომ არსებობს მხოლოდ სარეზოლუციო ნაწილი, ანუ სამოტივაციო ნაწილი ამ საქმეზე არ არსებობს, რაც ჩემთვის ცოტა უცნაურია, როდესაც ასეთი მაღალი რეზონანსული მნიშვნელობის საქმეზე იღებ გადაწყვეტილებას, როდესაც წლებია მიმდინარეობს საქმის განხილვა და ძალიან საჩქარო არაა დღეს გადაწყვეტილების მიღება, რატომ არ შეიძლება იყოს ამდენი ხნის განმავლობაში დაწერილი საბოლოოდ გადაწყვეტილება”, – ამბობს ლომჯარია.

● ვითხოვთ უსაფრთხო მედიაგარემოს – მედიისა და საზოგადოების მიმართვა მთავრობას
● “არასწორ მხარეს დგახარ” – თბილისში ჟურნალისტ ვახო სანაიას ფიზიკურად გაუსწორდნენ
● “ფორმულას” თანამშრომლებს თავს დაესხნენ და მანქანა დაუზიანეს

მაშინ როცა დავით კეზერაშვილის საქმის განხილვა დაიწყო, გენერალური პროკურორი შალვა თადუმაძე იყო, დღეს კი იგი უზენაესი სასამართლოს მოსამართლეა. სწორედ მან განიხილა დავით კეზერაშვილის საქმე კიდევ ორ მოსამართლესთან, ლევან თევზაძესთან და მერაბ გაბინაშვილთან ერთად. 

საქმის ხელახლა წამოწევა დროში დაემთხვა პრემიერ ირაკლი ღარიბაშვილის მუქარას – “მე რაც წავედი, მერე გაამართლეთ თქვენ ის. ახლა მიხედავენ, როგორც ჩანს” – ეს განცხადება ირაკლი ღარიბაშვილმა დავით კეზერაშვილის შესახებ პარლამენტის ტრიბუნიდან გააკეთა.