ინსპექტორის სამსახურმა ლექსო ლაშქარავას საქმეზე შსს და სამედიცინო კლინიკა დააჯარიმა
სახელმწიფო ინსპექტორის სამსახურმა ლექსო ლაშქარავას გარდაცვალების საქმეზე შსს და სამედიცინო კლინიკა დააჯარიმა. როგორც უწყებაში აღნიშნავენ, ლექსო ლაშქარავას გადაადგილების ამსახველი ვიდეოჩანაწერების გასაჯაროებას არ ჰქონდა კონკრეტული და მკაფიოდ განსაზღვრული კანონიერი მიზანი.
ასევე, ადმინისტრაციული პასუხისმგებლობა დაეკისრა იმ სამედიცინო დაწესებულებას, რომლის ვიდეოჩანაწერები შსს-მ გაავრცელა – სადაც, შსს-ს თქმით, ლექსო ლაშქარავა ნარკოტიკების ზედოზირებით მიიყვანეს.
სახელმწიფო ინსპექტორმა შსს-ს ადმინისტრაციული სახდელის სახით 2000-ლარიანი ჯარიმა შეუფარდა, სამედიცინო დაწესებულება კი დაჯარიმდა 500 ლარით პერსონალურ მონაცემთა დაცვის შესახებ საქართველოს კანონის დარღვევისთვის.
-
5 ივლისის მოვლენები და ლექსო ლაშქარავას გარდაცვალება. მოკლე ცნობა
5 ივლისს, თბილისში, Tbilisi Pride-ის კვირეულის ფარგლებში ღირსების მარში უნდა გამართულიყო. მსვლელობა რუსთაველის მეტროსთან 18:00 საათზე დაიგეგმა.
საპატრიარქომ მალევე დააანონსა მარშის საწინააღმდეგო აქცია. იგი თავის მხარდამჭერებს ქუჩაში გამოსვლისკენ და ქვეყნის “გაუკუღმართებული ცხოვრების წესისგან” დაცვისკენ მოუწოდებდა.
5 ივლისს ჰომოფობიურად განწყობილი ჯგუფები დილიდან გამოვიდნენ პარლამენტთან. მათ ჯერ პარლამენტთან თვეების განმავლობაში მდგარი ოპოზიციური კარვები დაარბიეს, ხოლო შემდეგ ამ ამბის გასაშუქებლად მისულ ჟურნალისტებს დაერივნენ.
5 ივლისს თბილისში ნამდვილი ნადირობა მოეწყო ჟურნალისტებზე – რადიკალები 53 ჟურნალისტს დაესხნენ თავს.
შეკრებილ ჯგუფებს ძალადობისკენ მოუწოდებდნენ სასულიერო პირები. “არა ძალადობას კი არა, ვალდებულები ხართ, იძალადოთ სამშობლოსთვის” – ასე მიმართა შეკრებილებს დეკანოზმა სპირიდონმა.
როგორც დამკვირვებლები აღნიშნავენ, მოძალადეთა ქმედებები წააქეზა პრემიერ ღარიბაშვილის მიერ 5 ივლისს გაკეთებულმა განცხადებამ. ღარიბაშვილმა ვითარების შესაძლო გართულებაზე პასუხისმგებლობა დააკისრა არა ძალადობრივი აქციის წევრებს, არამედ “ღირსების მარშის“” ორგანიზატორებს და მოუწოდა მათ, არ ჩაეტარებინათ მსვლელობა რუსთაველის გამზირზე. ღარიბაშვილმა განაცხადა, რომ დაგეგმილი “ღირსების მარში” მისთვის “მიზანშეუწონელი” და საფრთხის შემცველი იყო. ასევე მან თქვა, რომ ღირსების მარშის მიღმა ოპოზიცია დგას.
“ღირსების მარში” გაუქმდა, თუმცა, რუსთაველის გამზირზე ძალადობა კიდევ რამდენიმე საათს გაგრძელდა.
როგორც ჟურნალისტები ამბობდნენ, მთელი დღის განმავლობაში ადგილზე მობილიზებული არასაკმარისი პოლიციელი. ამაზე შს მინისტრმა განაცხადა, რომ იმდენი სამართალდამცველი იქნა მობილიზებული, “რისი საშუალებაც იყო”.
როგორც მედიის წარმომადგენლები აღნიშნავდნენ, ჰომოფობები მათ მიზანმიმართულად დასდევდნენ. ზოგ ჟურნალისტს ქირურგიული ოპერაცია და სერიოზული სამედიცინო ჩარევა დასჭირდა.
მათ შორის იყო ლექსო ლაშქარავა, ტვ პირველის ოპერატორი. ძალადობრივმა ჯგუფები ლაშქარავას და მის კოლეგას, ტვ პირველის ჟურნალისტს მირანდა ბაღათურიას თავს დაესხნენ ორგანიზაციის “სირცხვილიას” ოფისში. როგორც ბაღათურია ამბობს, ლაშქარავას 20 ადამიანი სცემდა. თვითმხილველთა თქმით, მოძალადეებს შორის სასულიერო პირებიც იყვნენ.
ლაშქარავა საავადმყოფოში გადაიყვანეს სახის ძვლების მოტეხილობით, მას ქირურგიული ოპერაცია დასჭირდა.
სამი დღის შემდეგ მან კლინიკა დატოვა. გარდაცვალებამდე ერთი დღით ადრე, 10 ივნისს, იგი ტვ “პირველის” შუადღის გადაცემის სტუმარი იყო, სადაც 5 ივლისის მოვლენები გაიხსენა.
ლაშქარავა 11 ივლისს დედამ საკუთარ ლოგინში გარდაცვლილი იპოვა.
ოჯახის წევრები ამბობენ, რომ ლაშქარავას ცხვირიდან სისხლი სდიოდა. ოჯახის ახლობლების ერთ-ერთი ვერსიაა, რომ იგი მიყენებული დაზიანებების შედეგად, თრომბოემბოლიით გარდაიცვალა.
ახალგაზრდა კაცის ცხედარი კრიმინალისტებმა ექსპერტიზაზე ოჯახის თანხმობის გარეშე გადაიტანეს. მამაკაცის ცხედარი ლურჯ პარკში გახვეული გამოიტანეს სახლიდან, საკაცის გარეშე და სირბილით მიიტანეს მანქანამდე. გარდაცვლილის მიმართ ასეთი მოპყრობა საზოგადოების უკმაყოფილების კიდევ ერთ მიზეზად და სოციალურ ქსელებში განხილვის თემად იქცა.
მომხდართან დაკავშირებით შსს-მ გამოძიება თვითმკვლელობამდე მიყვანის მუხლით დაიწყო.
ლაშქარავას გარდაცვალებიდან ძალიან მალე, ხელისუფლებასთან ასოცირებულმა საიტებმა დაიწყეს გავრცელება ინფორმაციის, თითქოს ლაშქარავა ნარკოდამოკიდებული იყო და იგი ზედოზირებით გარდაიცვალა.
იმავე დღეს, 11 ივლისს საღამოს, შსს-მ გამართა ბრიფინგი, სადაც უწყებამ იგივე ვერსიის გავრცელება დაიწყო, რომ ლაშქარავა “არაფხიზელ მდგომარეობაში” იყო.
ხელისუფლების ვერსიას უნდობლობას უცხადებენ ჟურნალისტები და სამოქალაქო საზოგადოების წარმომადგენლები.
ინსპექტორის განცხადებით, ვინაიდან 11 ივლისს სამინისტროს მიერ გასაჯაროებული ვერც ერთი ვიდეოჩანაწერი ვერ პასუხობდა მთავარ კითხვას გარდაცვალების მიზეზთან დაკავშირებით, ჩანაწერების გასაჯაროება შეფასდა პერსონალურ მონაცემთა დარღვევად.
უწყების განმარტებით, სამინისტრომ შესაბამისი სამართლებრივი საფუძვლის გარეშე მოიპოვა 2021 წლის 12 ივლისის ბრიფინგზე გამოქვეყნებული ერთ-ერთი აუდიო-ვიდეოჩანაწერი, რაც ნიშნავს იმას, რომ სახელმწიფო ინსპექტორის სამსახურმა დაადგინა, რომ აუდიო-ვიდეოჩანაწერი სამედიცინო დაწესებულებიდან მოპოვებულ იქნა სამინისტროს წერილობითი მოთხოვნის საფუძველზე.
ინსპექტორი განცხადებაში საუბრობს ლექსო ლაშქარავას საქმეზე გასაჯაროებულ სხვა ვიდეოჩანაწერებზეც. მათი თქმით, შსს-მ ჩანაწერები სხვადასხვა პირისაგან მოიპოვა სისხლის სამართლის საპროცესო კოდექსის დარღვევით:
“შემოწმების შედეგად გამოვლენილი გარემოებები მიუთითებს ალექსანდრე ლაშქარავას პერსონალური მონაცემების საქართველოს შინაგან საქმეთა სამინისტროს თანამშრომლ(ებ)ის მხრიდან გამჟღავნების ფაქტზე”.
● “ტვ პირველის” ოპერატორი ლექსო ლაშქარავა დღეს დაკრძალეს
● “ანტიეკლესიური ძალების მიერ დაგეგმილი შეთქმულება ვერ შედგა” – ღარიბაშვილი გადადგომას არ აპირებს
● “პრემიერი უნდა გადადგეს” – აქცია საქართველოს პარლამენტთან
● რატომ ვერ ჩატარდა ღირსების მარში – რა აჩვენა ამ დღემ?
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა
![](https://jam-news.net/app/uploads/2021/09/RTXEBKDZ-1024x794-2.jpeg)