„მიმაჩნია, რომ არანაირი კორონავირუსი არ არსებობს“ - ამის დასამტკიცებლად ვლადიკავკაზში საავადმყოფოს შეუტიეს

ჩრდილოეთ ოსეთის რესპუბლიკა ალანიაში, კორონავირუსის დიაგნოზი ცხრა ადამიანს დაუსვეს, ერთი – გარდაიცვალა. მაგრამ, ამავდროულად, სულ უფრო აქტიური ხდება ადამიანების ჯგუფი, რომლებიც ეპიდემიის უარყოფის კამპანიას აწარმოებენ.  

7 აპრილს, რამდენიმე ადამიანი ვლადიკავკაზის სახელმწიფო საავადმყოფოში შეეცადა შეჭრას და COVID-19-ის არსებობის დამადასტურებელი მტკიცებულებების წარდგენა მოითხოვეს.

მობილური ტელეფონით გადაღებულ ვიდეოში ჩანს, როგორ ეკამათება რამდენიმე ადამიანი დაცვის თანამშრომლებს, რომლებმაც მათ შესასვლელი გადაუკეტეს.

კადრს მიღმა, მამაკაცის ხმა კითხვას სვამს:

„მართლა არიან აქ ავადმყოფები? თუკი არიან, მაშინ, როგორ უზრუნველვყო ჩემი და ჩემი ოჯახის უსაფრთხოება? ამ კითხვებზე პასუხს ვერ ვიღებ. სამი შვილი მყავს და არ ვიცი, რა გავაკეთო. მიმაჩნია, რომ კორონავირუსით ინფიცირებულები არ არიან“.

იმ ადამიანებს შორის, რომლებიც საავადმყოფოში შეჭრას ცდილობდნენ, ახალგაზრდა ქალიცაა. ის დაცვის თანამშრომელს ეკითხება:

„როგორ მოვიქცეთ, როგორი სიმპტომები აქვს კორონავირუსს? გვაჩვენეთ კორონავირუსით ინფიცირებულები, სად წვანან?“.

ხულიგნური გამოხტომა კორონავირუსით პირველი პაციენტის გარდაცვალების შესახებ ინფორმაციას დაემთხვა. არსებული ინფორმაციით, ის 83 წლის იყო და სხვადასხვა ქრონიკული დაავადებები აწუხებდა. COVID-19-ის ტესტზე დადებითი პასუხი ჩრდილოეთ ოსეთის ჰიგიენის ცენტრისა და ეპიდემიოლოგიის ლაბორატორიიდან მიიღეს.

გარდაცვლილის ოჯახის წევრები ექიმების დაკვირვების ქვეშ არიან.

• გადაჭედილი სპირტის საწყობები და აფთიაქები, სადაც ანტისეპტიკური საშუალებები არ არის 
• „მიწა დააყარეთ, მოკვდეს“. კადიროვმა კარანტინის დამრღვევები ტერორისტებს გაუთანაბრა 
• მოსკოვის მერი: „სინამდვილეში, კორონავირუსით ინფიცირებულთა რიცხვი გაცილებით მაღალია“ 

ოპერის მომღერალი ჩელდიევი ხალხს მიტინგზე გასვლისკენ მოუწოდებს, „რათა დაასრულონ კორონავირუსის შესახებ ზღაპრები“

თუკი სოციალურ ქსელებში გაკეთებული კომენტარებით ვიმსჯელებთ, ვლადიკავკაზში არცთუ ისე ცოტა ადამიანია ისეთი, ვისაც კორონავირუსის არსებობის არ სჯერა.

ერთ-ერთი ლიდერია – ოპერის ყოფილი მომღერალი, ვადიმ ჩელდიევი. ის სასტიკად აკრიტიკებს ხელისუფლებასა და პოლიციას და მოსახლეობას მოუწოდებს, არ დაიჯერონ „პანდემიის შესახებ ზღაპრები“.

ადრე, ჩრდილოეთ ოსეთის მეთაურმა, ვიაჩესლავ ბიტაროვმა განაცხადა, რომ ექიმებს, რომლებიც კორონავირუსით ინფიცირებულებს მკურნალობენ, 300-300 ათას რუბლს (დაახლოებით, 14 ათას დოლარს) გადაუხდიან.

ჩელდიევი ამტკიცებს, რომ რაკი ექიმებს „კარგად გადაუხადეს – ახლა ისინი დაფარული სახეებით სხედან იქ იზოლაციაში და საკუთარ ფულს გამოიმუშავებენ“.

ჩელდიევი მოუწოდებს ყველას, არ დაიცვან თვითიზოლაციის მოთხოვნა და 20 აპრილს, საპროტესტო მიტინგზე გავიდნენ.

ბევრი ოსი ბლოგერი მას აკრიტიკებს. როგორც ჩანს, 20 აპრილის გამოაჩენს, რამდენად დიდია იმ ადამიანთა წრე, რომელთაც „ხელისუფლების შეთქმულების“ სჯერა.

შეამსუბუქო თვითიზოლაციის რეჟიმი, რომ მხარი დაუჭირო ეკონომიკას

რუსეთის ფედერაციაში, კარანტინის რეჟიმი ოფიციალურად არ არის გამოცხადებული. მაგრამ ცენტრმა რეგიონებს დაუტოვა უფლება, დამოუკიდებლად გადაწყვიტონ, რა ზომები მიიღონ ეპიდემიის წინააღმდეგ.

ჩრდილოეთ ოსეთში, ჯერჯერობით, არასამუშაო დღეებია 19 აპრილამდე გამოცხადებული და მოქალაქეებს შინ დარჩენისკენ მოუწოდებენ.

ადგილობრივმა მსხვილმა ბიზნესმა ექიმების დახმარება გადაწყვიტა და სპეციალური ფონდი შექმნა.

რამდენიმე დეპუტატმა, რომლებიც ბიზნესით არიან დაკავებული, 1-1 მილიონი რუბლი (დაახლოებით 13-13 ათასი დოლარი) შეწირეს ფონდს.

სამი მილიონი რუბლი (დაახლოებით 40 ათასი დოლარი) შეიტანა ფონდში „ბავარია“ ჯგუფში შემავალი კომპანიების ხელმძღვანელობამ, რომელიც ჩრდილოეთ ოსეთის მეთაურის, ვიაჩესლავ ბატიროვის შვილს ეკუთვნის. 

მაგრამ მცირე და საშუალო მეწარმეები ჩრდილოეთ ოსეთში ამბობენ, რომ ისინი დიდ დანაკარგებს ნახულობენ.

რესპუბლიკის ბევრი მცხოვრები შეშფოთებულია პროდუქტებსა და პირველადი მოხმარების საგნებზე ფასების მატებითა და მასობრივი უმუშევრობით.

მხოლოდ ვარაუდი შეიძლება, რომელი მათგანია მზად, შეუერთდეს 20 აპრილის აქციას.

და აი, 7 აპრილს ცნობილი გახდა, რომ მთავრობა თვითიზოლაციის რეჟიმის შემსუბუქებას გეგმავს – რათა მხარი დაუჭიროს ეკონომიკას.

სავარაუდოდ, რამდენიმე ინდუსტრია განაახლებს მუშაობას სანიტარული ნორმების გამკაცრებული კონტროლის პირობებში.

ეს გადაწყვეტილება აშკარად მოსკოვის მოსაზრებას უკავშირდება, რადგან იმავე დღეს, პრეზიდენტმა ვლადიმირ პუტინმა ისაუბრა არასამუშაო დღეების შემცირების შესაძლებლობაზე, მიუხედავად იმისა, რომ რუსეთში სწრაფად იზრდება კორონავირუსით ინფიცირებულთა რაოდენობა.

ერთი დღის განმავლობაში, 7 აპრილს, რუსეთის ფედერაციაში კორონავირუსით 1 124 ადამიანი დაინფიცირდა. საერთო ჯამში, ინფიცირებულთა რიცხვი 7 497-ს შეადგენს, მათგან 58 გარდაიცვალა.

ჩრდილოეთ ოსეთში, 7 აპრილის მონაცემებით, კორონავირუსის 9 შემთხვევაა დარეგისტრირებული, თვითიზოლაციაში იმყოფება – 683, თვითიზოლაციის რეჟიმი დაასრულა 852-მა ადამიანმა.