21 არასამთავრობო ორგანიზაცია: დასავლელ პარტნიორებზე ოცნების თავდასხმები შემაშფოთებელია

საქართველოში მოქმედი 21 არასამთავრობო ორგანიზაცია საერთო წერილს ავრცელებს, რომელშიც ვკითხულობთ, რომ “ქართული ოცნების” თავმჯდომარის, ირაკლი კობახიძის 13 ნოემბრის განცხადება დასავლელი პარტნიორებისა და მეგობრების დისკრედიტაციას ემსახურება.

ირაკლი კობახიძემ 13 ნოემბერს ფეისბუქპოსტი გამოაქვეყნა, რომელშიც ამბობს, რომ საერთაშორისო პარტნიორებმა უნდა აჩვენონ, რომ საქართველოს მეგობრები არიან და არა – მიხეილ სააკაშვილის. მისი განმარტებით, ხელისუფლება ვერ ითანამშრომლებს მათთან, ვინც პოლიტმიკერძოების გამო, სახელმწიფოდ არ გვცნობს.

კობახიძე ამბობს იმასაც, რომ ერთ-ერთმა ევროპარლამენტარმა, რომელიც ნაციონალური მოძრაობის დიდი ხნის ლობისტია და ამ პოლიტიკურ ძალას იმ პერიოდშიც ლობირებდა, “როდესაც სააკაშვილის რეჟიმი ადამიანებს კლავდა, აუპატიურებდა, ბიზნესს აყაჩაღებდა, დამოუკიდებელ მედიასაშუალებებს იტაცებდა და ქვეყნის ტერიტორიებს რუსეთს აბარებდა, მიხეილ სააკაშვილს პოლიტპატიმარი უწოდა.”

მმართველი პარტიის თავმჯდომარის თქმით, საკითხი დგას მარტივად – ან ეს ადამიანები აღიარებენ, რომ საქართველო არის სახელმწიფო და სახელმწიფოში კანონი უნდა კანონობდეს, ან ჩვენ მოგვიწევს მათ ვუწოდოთ კრიმინალების მფარველები.

არასამთავრობო ორგანიზაციების განმარტებით, ნაცვლად იმისა, რომ ობიექტური კრიტიკა გაიზიაროს და სხვადასხვა მიმართულებით სიტუაციის გაუმჯობესებისკენ გადადგას კონკრეტული ნაბიჯები, ხელისუფლება ბოლო დროს, სულ უფრო კამპანიურ ფორმას აძლევს ჩვენს დასავლელ მეგობრებზე თავდასხმებს:

“ცალკეული ჯგუფები და ლიდერები არც შეურაცხმყოფელ ტონს ერიდებიან და ხშირად, ადანაშაულებენ ქვეყნის შიდა საქმეებში ჩარევაში მათ, ვის პოლიტიკურ და ფინანსურ მხარდაჭერაზეც საქართველოს სახელმწიფოს გამართული ფუნქციონირება მნიშვნელოვანწილად არის დამოკიდებული. ასეთი რიტორიკით, ქვეყანას, რომლის მოსახლეობის უმრავლესობა განვითარების დასავლურ ვექტორს უჭერს მხარს, სულ უფრო მეტი ზიანი ადგება. ამას ემატება საქართველოს მოქალაქეებისთვის მნიშვნელოვან რეფორმებსა და დასავლეთის ფინანსურ დახმარებებზე საჯაროდ უარის თქმა.”

ენჯეოების თქმით, როგორც ჩანს, მმართველი პარტია არ აპირებს ქვეყანაში დემოკრატიული პროცესების წარმართვას და ამისთვის მზადაა დასავლეთის სახელმწიფოებთან და პოლიტიკოსებთან ურთიერთობაც გაიფუჭოს, ქვეყანას კი ევროატლანტიკური ინტეგრაციის გზაზე სერიოზული პრობლემები შეუქმნას.

“საქართველოს მოსახლეობის ურყევი ნება იყო და არის ევროპულ და ევროატლანტიკურ სტრუქტურებში ჩვენი ქვეყნის ინტეგრაცია. ვფიქრობთ, საქართველოს ხელისუფლება მსგავსი ქმედებებით  და განცხადებებით სულ უფრო გვაშორებს ჩვენს ისტორიულ არჩევანს”, – ვკითხულობთ განცხადებაში.

● შიმშილობის 47-ე დღე: სააკაშვილთან არ შეუშვეს უკრაინის სახალხო დამცველი. ვინ რა იცის მისი ჯანმრთელობის მდგომარეობაზე?
● სააკაშვილის საქმეები. რისთვის ზის ციხეში ყოფილი პრეზიდენტი
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები

ირაკლი კობახიძის ფეისბუქპოსტი მოჰყვა საქართველოში ევროპარლამენტარის, ანა ფოტიგას ვიზიტს, რომელიც მიხეილ სააკაშვილის სანახავად ციხეში არ შეუშვეს. დეპუტატების გზავნილი, წერილის სახით, მიხეილ სააკაშვილს საქართველოს პარლამენტის დეპუტატმა, სალომე სამადაშვილმა გადასცა.

სამადაშვილის თქმით, ეს იყო პირდაპირი ნათქვამი ხელისუფლების მხრიდან, რომ საქართველოს მესამე პრეზიდენტის საქმეს ევროპარლამენტარებს არავინ ეკითხება.

კობახიძის წერილი საგარეო კურსის ცვლილებად შეაფასეს ექსპერტებმა და პოლიტიკოსებმაც. “ნაციონალური მოძრაობის” თავმჯდომარის, ნიკა მელიას თქმით, ეს საგარეო პოლიტიკური კურსის ცვლილების ღია დეკლარაციაა.

“ირაკლი კობახიძის განცხადება არის ღია დეკლარაცია საგარეო პოლიტიკური კურსის ცვლილებისა. ამ რეჟიმმა დღეს უთხრა ყველა ჩვენ ამერიკელ და ევროპელ სტრატეგიულ პარტნიორს, და ყველა საერთაშორისო ორგანიზაციებს, რომლებიც ქომაგობენ ქართული დემოკრატიის დემოკრატიას, რომ ამიერიდან, ყველა თქვენგანი, ვინც ჩათვლით, რომ ქვეყანაში პოლიტიკური მართლმსაჯულება გვაქვს პოლიტიზებული და მიკერძოებული, ვიტოვებთ უფლებას, რომ სახელმწიფოს მტრებად გამოგაცხადოთ“, – განაცხადა ნიკა მელიამ.