"გამოდი შვილო, ჩაბარდი პოლიციას" - ბანკზე თავდასხმაში ეჭვმიტანილის მამა შვილს მიმართავს

„შვილო ბადრი, გელოდებოდით გუშინ, არ ჩამოხვედი, სად ხარ? არაფერი ვიცი შენი ადგილსამყოფელის შესახებ. გამოდი შვილო, ჩაბარდი პოლიციას და ყველაფერი ნორმალურად გაირკვევა. გთხოვთ ამას, მეტი არაფერი სათქმელი არ მაქვს. ან დაგვიკავშირდი ან ჩაბარდი პოლიციას. ესაა ჩემი სათქმელი“, – აცხადებს ტარიელ ესებუა ვიდეომიმართვაში.

● შსს-მ ბანკზე თავდასხმაში ბრალდებულის ვინაობა დაასახელა. საქმეს ტერორიზმის მუხლით იძიებენ

● როგორ აფასებენ ზუგდიდის მოვლენებს პოლიტიკოსები და ექსპერტები

● რატომ გარბიან აფხაზი ყაჩაღები საქართველოში, ქართველები კი – აფხაზეთში

21 ოქტომბერს, დაახლოებით 14 საათსა და 20 წუთზე შეიარაღებული პირი შეიჭრა ზუგდიდის ცენტრში, გამსახურდიას გამზირზე მდებარე “საქართველოს ბანკის” შენობაში და მძევლად აიყვანა 43 ადამიანი.

თავდამსხმელი ბანკის შენობაში 8 საათზე მეტხანს იმყოფებოდა. იგი ერთ-ერთი მძევლის დახმარებით დაუკავშირდა ტელეკომპანია “მთავარს” და თავისი მოთხოვნები გააცნო – ნახევარი მილიონი დოლარი, უიარაღო მომლაპარაკებელი და უსაფრთხოების გარანტიები.

საღამოს ათი საათისთვის, თავდამსხმელმა მიიღო მოთხოვნილი თანხა და ყველა მძევალი გაათავისუფლა სამის გარდა. სამ ადამიანთან ერთად, რომელთა შორის იყოს სამხარეო პოლიციის უფროსი ავთანდილ გალდავა, თავდამსხმელმა ბანკის შენობა დატოვა და ავტომობილით გაურკვეველი მიმართულებით წავიდა. მოგვიანებით მან ის სამი მძევალიც გაათავისუფლა, თავად კი, მიიმალა.

მომხდართან დაკავშირებით გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.