არჩევნებამდე კვირაზე ნაკლები დარჩა. ქვეყანა ტრადიციულად აჭრელებულია საარჩევნო პლაკატებით " />

საარჩევნო არტი. საპრეზიდენტო კანდიდატების პლაკატები

არჩევნებამდე კვირაზე ნაკლები დარჩა. ქვეყანა ტრადიციულად აჭრელებულია საარჩევნო პლაკატებით

28 ოქტომბერს საქართველოში რიგით მეშვიდე საპრეზიდენტო არჩევნები გაიმართება და საქართველო რიგით მეხუთე პრეზიდენტს აირჩევს.

წელს, ამომრჩეველს 25 კანდიდატიდან მოუწევს არჩევანის გაკეთება. მათგან თითქმის ნახევარი საზოგადოებისთვის სრულიად უცნობი ადამიანები არიან, მეორე ნახევარი კი, პოლიტიკოსები, რომელთა რეიტინგი ჯამში 11 პროცენტს არ აღემატება. 

არჩევნებამდე კვირაზე ნაკლები დარჩა. ქვეყანა ტრადიციულად აჭრელებულია საარჩევნო პლაკატებით.

__ 48 __

ყველაზე მდიდრული და აგრესიული პოლიტიკური არტით დამოუკიდებელი კანდიდატის, სალომე ზურაბიშვილის საარჩევნო  კამპანია გამოირჩევა. მისი პოსტერებია ყველგან, სადაც არ უნდა გაიხედო – ქუჩაში შენობების კედლებზე, მეტროში, ავტობუსებსა და სამარშრუტო ტაქსებზე, მაღალსართულიანი შენობების ფასადებზე, ავტობუსის გაჩერებებზე.

ზურაბიშვილის საარჩევნო ნომერია 48. ყოფილ საგარეო საქმეთა მინისტრს მხოლოდ ფორმალურად ჰქვია დამოუკიდებელი, რეალურად კი, ის მმართველი პარტიის რჩეულია.

ზურაბიშვილის საარჩევნო კამპანიის და პოსტერების ფერი – ლურჯია. ზუსტად ისეთი, როგორიც მმართველ პარტიას – “ქართულ ოცნებას” აქვს. მისი საარჩევნო სლოგანია “ერთად საქართველოსთვის”

ზურაბიშვილის საარჩევნო კამპანიის დაწყებიდან დღემდე ბიზნესმენებმა (და არა მარტო მათ – შემომწირველთა სიაში არიან რიგითი მოქალაქეები,  ექიმები და ა.შ.) 4 მილიონამდე ლარი შესწირეს, რაც  ყველა დანარჩენი კანდიდატისთვის ჯამურად შეწირულ თანხას აღემატება.

ასევე წაიკითხეთ: ვინ არის სალომე ზურაბიშვილი, ქალი, რომელიც საქართველოს პრეზიდენტობისთვის იბრძვის?

 

ხელისუფლება ვარაუდობს, რომ ზურაბიშვილი პირველივე ტურში გაიმარჯვებს – პროსახელისუფლებო სოციოლოგიურმა კვლევამ კონკრეტული ციფრიც დაასახელა – მათი გამოთვლით ზურაბიშვილი ხმათა 53 პროცენტს აიღებს.

თუმცა, რეკლამასთან ერთად, ზურაბიშვილს ამავდროულად ყველაზე დიდი ანტირეკლამაც აქვს. კუთვნილი უფასო სატელევიზიო პოლიტიკური რეკლამა ბევრ ოპოზიციონერ კანდიდატს სწორედ ზურაბიშვილის ანტირეკლამაზე აქვს აგებული.

ოპოზიციის სატელევიზიო კლიპები ამომრჩეველს მოუწოდებენ, არ შემოხაზონ “მოღალატე” სალომე ზურაბიშვილი, რომელიც ფიქრობს, რომ აგვისტოს ომი საქართველომ დაიწყო (ასეთი განცხადება თავად ზურაბიშვილმა გააკეთა) და რომელმაც არ იცის გამართულად სახელმწიფო ენა (ზურაბიშვილი საფრანგეთშია დაბადებული, წლების განმავლობაში იქ ცხოვრობდა და ქართულად საუბრის დროს ბევრ შეცდომას უშვებს).

__ 5 __

ოპოზიციის კანდიდატებს შორის ყველაზე რეიტინგული გრიგოლ ვაშაძეა – ზურაბიშვილის მსგავსად ასევე ყოფილი დიპლომატი და ყოფილი საგარეო საქმეთა მინისტრი.

ის საარჩევნო ბიულეტენში “გაერთიანებული ოპოზიციის” სახელით იასპარეზებს, რეალურად კი, ყველაზე მსხვილი ოპოზიციური პარტიის “ნაციონალური მოძრაობის” კანდიდატი და ექს-პრეზიდენტ მიხეილ სააკაშვილის  რჩეულია.

ასევე წაიკითხეთ: საარჩევნო პლაკატებით მოყოლილი საქართველოს უახლესი ისტორია

 მისი ნომერი ხუთია – “ნაციონალების” ტრადიციული ნომერი, საარჩევნო სლოგანი “ერთად ჩვენ შევხვლით”.

ვაშაძის დიპლომატიური კარიერა რუსეთთანაა დაკავშირებული, ის წლების განმავლობაში ცხოვრობდა და მუშაობდა მოსკოვში. მისი ბიოგრაფიის ამ ნაწილს ოპონენტები მის წინააღმდეგ იყენებენ – რამდენიმე ადგილას ვაშაძის პოსტერებს საბჭოთა უშიშროების კომიტეტის რუსული აბრევიატურა – КГБ დააწერეს, ზოგან კი, ვაშაძე პუტინს ჰყავს ხელში ატაცებული.

__ 2 __

კიდევ ერთი რეიტინგული ოპოზიციური კანდიდატია დავით ბაქრაძე “ევროპული საქართველოდან”.

ამ კანდიდატის წინასაარჩევნო პოსტერები საქართველოში პირველად არ არის გამოკრული. ბაქრაძე 2013 წელსაც საპრეზიდენტო კანდიდატი იყო, ოღონდ მაშინ “ნაციონალური მოძრაობიდან”. მას შემდეგ ბევრი რამ მოხდა – სააკაშვილის “ნაციონალური მოძრაობა” ნაწილებად დაიშალა, ბაქრაძე კი ახლა მისი ერთ-ერთი განშტოების – “ევროპული საქართველოს” ლიდერია.

ბაქრაძის საარჩევნო ნომერია 2. განსხვავებით “ნაციონალური  მოძრაობისგან”, “ევროპული საქართველოს” საარჩევნო კამპანია ნაკლებად აგრესიული და უფრო ზომიერია.

წელს ბაქრაძის მთავარი საარჩევნო დაპირება პენსიების გაზრდაა. საარჩევნო სლოგანი: “ნაბიჯი ევროპისკენ”.

ქუჩაში ასეთ პოსტერებსაც შეხვდებით. სავარაუდოდ, კონკურენტების ნახელავია ან უბრალოდ “კრეატიული” მოქალაქეების.

ამ ვიდეოზე კიდევ ჩანს, როგორ ასუფთავებს მეეზოვე კედელს დავით ბაქრაძის პოსტერებისგან. არადა, ჯერ არცევნები არ დასრულებულა და პლაკატები კანონის სრული დაცვითაა გამოკრული


ასევე წაიკითხეთ