უფლებადამცველებს გამგზავრების ნება დართეს

დღეს აზერბაიჯანელმა უფლებადამცველებმა, არიფ და ლეილა იუნუსებმა, როგორც იქნა, შეძლეს აზერბაიჯანიდან გასვლა და სამკურნალოდ საზღვარგარეთ გამგზავრება.

იუნუსების ადვოკატმა, ელჩინ სადიგოვმა АПА-ს განუცხადა, რომ 18 აპრილს უზენაესმა სასამართლომ მისი დაცვის ქვეშ მყოფი ცოლ-ქმრის საკასაციო საჩივარი დააკმაყოფილა.

როგორც რადიო თავისუფლება იუწყება, დღეს სხიპხოლის აეროპორტში იუნუსებს მათი ქალიშვილი, დინარა იუნისი დახვდათ. დღესვე უფლებადამცველები ნიდერლანდების სამეფოს საგარეო საქმეთა სამინისტროში მიიღეს. ამ უწყების ხელმძღვანელმა, ბერტ კენდერსმა აღნიშნა, რომ იუნუსების ვიზიტის ხანგრძლივობა მათი ჯანმრთელობის მდგომარეობაზე იქნება დამოკიდებული, ხოლო მკურნალობის შემდეგ მათ პოლიტიკური თავშესაფრის თხოვნის უფლება ექნებათ.

• უფლებადამცველები არიფ და ლეილა იუნუსები 2014 წელს დააპატიმრეს. 2015 წლის 13 აგვისტოს ისინი თაღლითობის, უკანონო მეწარმეობის, გადასახადებისთვის თავის არიდებისა და საბუთების გაყალბების ბრალდებით გაასამართლეს და, შესაბამისად, 7.5 და 8 წელი მიუსაჯეს.
• 2015 წლის 9 დეკემბერს, ბრალდებულების ჯანმრთელობის უკიდურესი გაუარესების გამო, სასამართლომ ეს ვადები პირობითი პატიმრობით შეცვალა.
• 2016 წლის 11 თებერვალს ბაქომ არ დააკმაყოფილა ცოლ-ქმარ იუნუსების თხოვნა. არიფი და ლეილა მაშინ ქვეყნის დატოვების ნებართვას ითხოვდნენ.

გამოქვეყნდა 19.04.2016