თბილისში რუსი აქტივისტი გაუჩინარდა - ის მოგვიანებით რუსეთის ციხეში იპოვეს. საქმეში ფიგურირებს სოფელი კირბალი და ლომისის ეკლესია
თბილისში გაუჩინარებული რუსი აქტივისტი
საქართველოს შინაგან საქმეთა სამინისტროში აცხადებენ, რომ თბილისიდან გაუჩინარებული რუსი აქტივისტი, გაუჩინარების დღეს, 12 ოქტომბერს, ცხინვალის რეგიონში ე.წ. საზღვართან მდებარე სოფელ კირბალთან ნახეს. სოფელში იგი ტაქსით მივიდა და ლომისის ეკლესიას ეძებდა.
● რუსეთის ბავშვთა ყოფილი ომბუდსმენი პაველ ასტახოვი საქართველოში არ შემოუშვეს
● რუსმა მწერალმა ვიქტორ შენდეროვიჩმა საქართველოში არშეშვების გამო სარჩელი შეიტანა
● აშშ-ის მოქალაქე საქართველოში არ შემოუშვეს. სუს-ის ამბობს, რომ ის დესტრუქციული ჯგუფების ტრენინგებთან იყო კავშირში
რუსული მედია და რუსი უფლებადამცველები წერენ რუსი აქტივისტის, თბილისში მცხოვრები რაფაილ შეპელევის გაუჩინარების შესახებ.
“მედიაზონის” ცნობით, შეპელევი თბილისში, მთაწმინდაზე მდებარე ნაქირავები ბინიდან 12 ოქტომბერს გავიდა საყოფაცხოვრებო საქმეებზე, რის შემდეგაც არ დაბრუნებულა. მისი ნივთები სახლში დარჩა. შეპელევის მეგობარი ირინა რუჩკო ამბობს, რომ “მას არაფერი დაუბარებია იმ ადამიანებისთვის, ვისთან ერთადადც ცხოვრობდა”. აქტივისტის თანამოაზრეები და მეგობრები ირწმუნებიან, რომ ის რუსეთში დაბრუნებას არ აპირებდა და საკუთარი ინიციატივით ამას არასოდეს გააკეთებდა, რადგან მის წინააღდეგ რუსეთში სისხლის სამართლის საქმე იყო აღძრული.
შეპელევის თბილისიდან გაუჩინარების მეორე დღეს, 13 ოქტომბერს, ვლადიკავკაზის სოვეცკი რაიონის სასამართლომ თავის ვებ-გვერდზე გამოაქვეყნა ინფორმაცია, რომ რაფაილ შეპელევს ადმინისტრაციული პასუხისმგებლობა დაეკისრა „წვრილმანი ხულიგნობის“ მუხლით. მოგვიანებით კი, როგორც “მედიაზონა” წერს, ის წინასწარი დაკავების იზოლატორში გადააგზავნეს ტერორისტული დანაშაულის ჩადენის ბრალდებით.
საქართველოს შინაგან საქმეთა სამინისტროში რუსულ უფლებადამცველ ორგანიზაციას, „თავისუფალ რუსეთს“ განუცხადეს, რომ 12 ოქტომბერს შეპელევი ტაქსით წავიდა კონფლიქტის ზონაში, სოფელ კირბალში. შსს-ში აცხადებენ, რომ აქტივისტის გადაადგილება დასტურდება სათვალთვალო კამერების ჩანაწერებით, ასევე ტაქსის მძღოლისა და სოფლის მაცხოვრებლების ჩვენებით. თვითმხილველებმა პოლიციას განუცხადეს, რომ შეპელევი სოფელში ეძებდა ეკლესიაში, სადაც “რუსები იმყოფებოდნენ”. შსს-ს ცნობით, სწორედ საოკუპაციო ძალების წარმომადგენლებმა გადაიყვანეს აქტივისტი რუსეთის მიერ კონტროლირებად ტერიტორიაზე. როგორც შსს ვარაუდობს, ისენი იყვნენ FSB სასაზღვრო სამსახურის თანამშრომლები.
გორის მუნიციპალიტეტის სოფელ კირბალში 6 ნოემბერს რუსმა საოკუპაციო ძალებმა საქართველოს მოქალაქე, თამაზ გინტური მოკლეს და ერთი მოქალაქე დააკავეს. გინტური და მისი თანხმლები პირები წმინდა გიორგის სახელობის ლომისის ეკლესიაში შესვლას ცდილობდნენ. ლომისის ეკლესია ადგილობრივი მოსახლეობისთვის წმინდა სალოცავია. მისი შესასვლელი რუს სამხედროებს აქვთ აჭედილი. კირაბალის ტერიტორიას რუსი სამხედროები „სამხრეთ ოსეთის სახელმწიფო საზღვარს“ უწოდებენ და იქ მოსახლეობას თავისუფლად გადაადგილების საშუალებას არ აძლევენ.
რაფაილ შეპელევი ეკატერინბურგის მკვიდრია. იგი ულტრამემარცხენე, ანარქისტული მოძრაობის „არტპოდგოტოვკას“ წევრი იყო. აღნიშნული ორგანიზაცია, რომლის ლიდერია ვიაჩესლავ მალცევი, აკრძალულია რუსეთში. შეპელევი საქართველოში 2021 წლიდან ცხოვრობდა.
![თბილისში გაუჩინარებული რუსი აქტივისტი](https://jam-news.net/app/uploads/2023/11/ubFuBp_A39Y49sGOFRnt8.jpeg)
რუსეთში ცხოვრების დროს აქტივისტს ხშირად აკავებდნენ საპროტესტო აქციებში მონაწილეობის გამო. მათ შორის ალექსეი ნავალნის მხარდასაჭერად გამართულ აქციებზე.
2021 წლის სექტემბერში შეპელევმა ეკატერინბურგში, ადგილობრივი ხელისუფლების წინააღმდეგ გამართა პიკეტი. მორიგი დაკავებისა და გათავისუფლების შემდეგ, იგი საქართველოში გადავიდა საცხოვრებლად.
აქტივისტის შვილი დანიელ შეპელევი, რომელიც რუსეთში ცხოვრობს, უყვება “მედიაზონას”, რომ მაისში მასთან სახლში გამომძიებელი იყო და მამისის ადგილსამყოფელით ინტერესდებოდა.
„[მათ მკითხეს], ვიცოდი, სად იყო, რას აკეთებდა, რას აპირებდა, სად აპირებდა წასვლას, რა ვიდეოებს აქვეყნებდა [სოციალურ ქსელებში]. როგორც გამომძიებლის სიტყვებიდან მივხვდი, მან საკუთარ გვერდზე ვიღაცის ვიდეო გადააქვეყნა და ამ ვიდეოსთვის მის წინააღმდეგ საქმე აღძრეს. მკითხეს, ნანახი მაქვს თუ არა ეს ვიდეო და ვეთანხმები თუ არა მის შინაარსს.“, – ამბობს დანილ შეპელევი.
აქტივისტის შვილი ამბობს, რომ საუბარი იყო „ტერორიზმზე“. გამომძიებელს არ უთქვამს, თუ რომელი ვიდეო გახდა საქმის მიზეზი, თუმცა ამბობდა, რომ ის შეიცავს “ვაენკომატების” გადაწვის მოწოდებას.
რუსული უფლებადამცველი ორგანიზაციის,”პირველი განყოფილების” წარმომადგენლები აცხადებენ, რომ „ეს არ არის პირველი შემთხვევა, როდესაც რუსული ანარქისტული ორგანიზაციის წევრები უჩინარდებიან სხვადასხვა ქვეყნებიდან, სადაც ისინი იმალებოდნენ და შემდგომ მათ რუსეთში, წინასწარი დაკავების იზოლატორებში პოულობენ“. ოქტომბერში ყირგიზეთიდან გაიტაცეს მემარცხენე ბლოკის აქტივისტი, ლევ სკორიაკინი. მოგვიანებით სკორიაკინი მოსკოვის ბუტირკის ციხეში იპოვეს. უფლებადამცველების თქმით, სკორიაკინი გატაცების შემდეგ აწამეს.