საქართველოს პრეზიდენტი: დღეს პატრიოტიზმი და ვაჟკაცობა გადის ვაქცინაციაზე

ბოლო დღეებში დამძიმებულ ეპიდსიტუაციაზე კომენტარი გააკეთა საქართველოს პრეზიდენტმა სალომე ზურაბიშვილმა. მისი თქმით, ვაქცინაციის მოწინააღმდეგეებს უნდა ესმოდეთ, რომ მათი ქცევა სხვას უქმნის საფრთხეს:

“ვირუსის გავრცელების დღევანდელი ციფრები უნდა გვაშფოთებდეს. ვაქცინაციის მოწინააღმდეგეებს უნდა ესმოდეთ, რომ მათი დამოკიდებულება არც რაღაც პიროვნული არჩევანია, არც რამე თავისუფლების გამოხატულება, მათი ქცევა პირდაპირ საფრთხეს უქმნის სხვას, საკუთარი ოჯახის წევრს, მეზობელს, ნაცნობს და სინამდვილეში ამ პატარა ქვეყნის მოსახლეობას, მის ჯანმრთელობას, მის სიცოცხლისუნარიანობას, ე.ი. მის მომავალს. ნამდვილი პატრიოტიზმი არც ტრაბახია, არც ძალადობა და არც კუნთების თამაში. დღეს პატრიოტიზმი და ვაჟკაცობა გადის ვაქცინაციაზე, საზოგადოებრივ თვითშეგნებასა და პასუხისმგებლობაზე.”

გუშინ საქართველოში რეკორდული, 4827 შემთხვევა დაფიქსირდა და გარდაიცვალა 34 ადამიანი. კორონავირუსის ამხელა მაჩვენებელი ქვეყანაში გასული წლის ნოემბრის მერე არ ყოფილა

განცხადება გაავრცელა ტოლერანტობისა და მრავალფეროვნების ინსტიტუტმაც (TDI).

ორგანიზაციის მიმართვაში ვკითხულობთ, რომ  საქართველოში მცხოვრებ უსაბუთო მიგრანტებს აცრის შესაძლებლობა უნდა მიეცეთ.

როგორც ისინი აღნიშნავენ, 22 ივლისიდან ამოქმედდა რეგულაცია, რომელიც საშუალებას აძლევს საქართველოში მყოფ უცხოელებს, ისარგებლონ იმუნიზაციის სახელმწიფო პროგრამით და ჩაიტარონ Covid-19-ის საწინააღმდეგო ვაქცინა, თუმცა, აღნიშნული ბრძანება ითვალისწინებს კონკრეტულ პირობებს და ვრცელდება მხოლოდ უცხოელ ბენეფიციართა გარკვეულ ჯგუფზე.

ამასთან, ვაქცინაციას ვერც ის უცხოელები შეძლებენ, რომლებიც საქართველოში კანონიერად იმყოფებიან – მათ ბოლო სამი თვის განმავლობაში, კანონიერად ყოფნის უზრუნველსაყოფად საქართველოს საზღვრის გადაკვეთა და კვლავ შემოსვლა მოუხდათ. 

“მაგალითად, იმ უცხო ქვეყნის მოქალაქეები, რომლებთანაც საქართველოს დაწესებული აქვს უვიზო მიმოსვლა და რომლებსაც საქართველოში უვიზოდ შემოსვლისა და სრული ერთი წლის ვადით უვიზოდ ყოფნის უფლება აქვთ. არაგონივრულია ამ პირების საქართველოში დროებით შემოსულ ტურისტებთან გათანაბრება, რადგან ისინი ხანგრძლივი პერიოდის განმავლობაში იმყოფებიან საქართველოში და საზღვრის კვეთა ობიექტებური გარემოებების გამო – ქვეყანაში კანონიერად ყოფნის გახანგრძლივების მიზნით მოუხდათ”, – წერია TDI-ის განცხადებაში. 

ორგანიზაცია მოუწოდებს საქართველოს მთავრობასა და უწყებათაშორის საკოორდინაციო საბჭოს: 

1. 1. COVID-19-ის საწინააღმდეგო ვაქცინაციის შესაძლებლობა მიეცეთ საქართველოში მცხოვრებ უსაბუთო მიგრანტებს. გამოინახოს ვაქცინაციის იმგვარი ფორმა, რომელიც მიუხედავად საქართველოში ყოფნის სამართლებრივი სტატუსისა, დაუბრკოლებლად მისცემს მათ ვაქცინაციის შესაძლებლობას;
2. 2. COVID-19-ის საწინააღმდეგო ვაქცინაციის შესაძლებლობა მიეცეთ საქართველოში კანონიერად მყოფ იმ უცხოელებს, რომლებმაც უახლოეს წარსულში ობიექტური მიზეზებით გადაკვეთეს სახელმწიფო საზღვარი;
3. 3. მოიხსნას ინდოელი სტუდენტების საქართველოში დასაბრუნებლად ჩარტერულ რეისთან დაკავშირებული პირობა და მათ მიეცეთ საქართველოში რეგულარული რეისებით ჩამოსვლის საშუალება. 

დღესვე ცნობილი გახდა, რომ 2021 წლის სექტემბრიდან დიდ ბრიტანეთსა და გერმანიაში კორონავირუსი ვაქცინის მესამე დოზით რისკ-ჯგუფების აცრა დაიწყება.

გერმანიის ჯანდაცვის მინისტრის თქმით, ის ადამიანები, რომლებიც AstraZeneca-ს და Jonson&Jonson-ის ვაქცინით აიცრნენ, სექტემბრიდან mRNA ვაქცინის – როგორიცაა ფაიზერი და მოდერნა – დამატებითი დოზის გაკეთებას შეძლებენ.

___________________________________________________

● 2616 ახალი შემთხვევა და გარდაცვლილი 26 პაციენტი – საქართველო პანდემიის მეოთხე ტალღაში შედის
● ევროკავშირმა სომხეთი და აზერბაიჯანი Covid-უსაფრთხო ქვეყნების სიაში შეიყვანა, საქართველო – არა
● საქართველოში ინფიცირების სწრაფი მატება, შესაძლოა კავშირში იყოს „დელტა“ შტამის გავრცელებასთან

______________________________________________________

ივლისის დასაწყისში ჯანდაცვის მინისტრის მოადგილემ თქვა, რომ საქართველო შესაძლოა კორონავირუსის პანდემიის მძიმე მეოთხე ტალღაში შევიდეს. ასევე, ქვეყანაში იზრდება ინფიცირებული ბავშვების რაოდენობა – თბილისში მობილიზებული 200-მდე პედიატრიული საწოლი, რომელიც ეპიდემიის მეორე და მესამე ტალღის დროს პრაქტიკულად დაუტვირთავი იყო, უკვე გადატვირთულია. ინფიცირებული ბავშვების რაოდენობამ უკვე გადააჭარბა სამასს.

ტელეკომპანია “რუსთავი 2”- ის ეთერში დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, რომ საქართველოში 20-30% დელტა შტამი ცირკულირებს, რაც კიდევ უფრო მოიმატებს.

საქართველოში ვაქცინაციის პროცესი 15 მარტიდან დაიწყო და ნელი ტემპით მიმდინარეობს. 23 ივლისის მონაცემებით, საქართველოში ჯამურად ჩატარდა 391 781 აცრა. სრულად ვაქცინირებულია 136 734 ადამიანი.

ბოლო 24 საათში საქართველოში კორონავირუსის 2 460 შემთხვევა გამოვლინდა და 20 ადამიანი გარდაიცვალა. 

ქვეყანაში ამ დრომდე ოთხი ვაქცინაა შემოტანილი – გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.