საფრანგეთი მთიანი ყარაბაღის დამოუკიდებლობას არ აღიარებს - საგარეო საქმეთა სამინისტროს განცხადება
საფრანგეთი მთიანი ყარაბაღის დამოუკიდებლობას არ აღიარებს. ამის შესახებ საფრანგეთის საგარეო საქმეთა სამინისტროს წარმომადგენელმა განაცხადა.
25 ნოემბერს, საფრანგეთის სენატმა ხმათა აბსოლუტური უმრავლესობით (305-ით ერთის წინააღმდეგ) რეზოლუცია მიიღო მთიანი ყარაბაღის აღიარების აუცილებლობის შესახებ. ეს იყო მოწოდება მთავრობისადმი, რომელიც იურიდიულად მხოლოდ სარეკომენდაციო ხასიათს ატარებდა ანუ მინისტრთა კაბინეტს შეეძლო, ის მხედველობაში მიეღო, მაგრამ არ გაეთვალისწინებინა.
საფრანგეთის საგარეო საქმეთა სახელმწიფო მდივანმა ჟან ბატისტს ლემუანმა ჯერ კიდევ რეზოლუციის განხილვისას განაცხადა, რომ საფრანგეთის მიერ მთიანი ყარაბაღის ცალმხრივი აღიარება ხელს არ შეუწყობს სამშვიდობო პროცესის წინსვლას.
ამასთან, ლემუანის თქმით, საფრანგეთის, როგორც ეუთოს მინსკის ჯგუფის თანათავმჯდომარის პასუხისმგებლობა იმაში მდგომარეობს, რომ იმუშაოს ყარაბაღის კონფლიქტის მოლაპარაკებების გზით დარეგულირებაზე, კერძოდ, მთიანი ყარაბაღის სამომავლო სტატუსზე.
„მაგრამ საფრანგეთი მშვიდობის მიღწევის საქმეში თავისი ვალდებულებების ერთგულია და მტკიცედ სურს ყარაბაღში კონფლიქტის მყარ დარეგულირებას მიაღწიოს, რეგიონის ხალხების ღირსებისა და უსაფრთხოების მოთხოვნების გათვალისწინებით. საფრანგეთი მომავალშიც ყველაფერს გააკეთებს თავისი შესაძლებლობის ფარგლებში, სამხრეთ კავკასიაში სიტუაციის დასტაბილურებისთვის.
ის დარჩება ჩართული მინსკის ჯგუფის თანათავმჯდომარეობის ჩარჩოებში, რათა მიაღწიოს წინსვლას ყველა პარამეტრით, რომლებიც ჯერ კიდევ შესათანხმებელია 9 ნოემბერს ცეცხლის შეწყვეტის შესახებ შეთანხმების მიღწევის შემდეგ, კერძოდ, კონფლიქტის დროს გამოყენებული უცხოელი დაქირავებული მებრძოლების გასვლასა და რეგიონის ისტორიული და კულტურული მემკვიდრეობის დაცვასთან დაკავშირებით“.
სენატის რეზოლუციის შესახებ
რეზოლუცია საფრანგეთის მთავრობას მთიანი ყარაბაღის აღიარებისა და მისი მშვიდობიანი მოსახლეობისთვის მასშტაბური მხარდაჭერისკენ მოუწოდებდა. ასევე, დოკუმენტში საუბარი იყო მთიანი ყარაბაღის მშვიდობიანი მოსახლეობის წინააღმდეგ ჩადენილი ომის დანაშაულების საგამოძიებო საერთაშორისო კომისიის აუცილებლობაზე.
მასში საფრანგეთის მთავრობას მოუწოდებდნენ, გაეღო ყველა ძალისხმევა მოლაპარაკებების პროცესის განახლებისთვის – 1994 წელს ასახული საზღვრების უზრუნველყოფით ანუ ყარაბაღის მეორე ომამდე არსებული, რომელიც 2020 წლის სექტემბერში დაიწყო და ის შეცვალა.
რეზოლუციის საკითხზე მომხსენებელმა, სენატორმა ბრუნო რეტაიომ გამოსვლის დროს განაცხადა, რომ თურქეთის პრეზიდენტის მხრიდან (რომელიც ექსპანსიონისტურ, ნეოოსმალურ და პანისლამურ პოლიტიკას ატარებს) მასიური და გადამწყვეტი დახმარების შემდეგ, კონფლიქტმა დაკარგა ლოკალური ხასიათი:
„სიტყვასიტყვით ვციტირებ ერდოღანის სიტყვებს: „მთიანი ყარაბაღი ისლამური სახელმწიფო გახდა და ნახევარმთვარის ჩრდილქვეშ დაბრუნდა“. კიდევ რამდენი აგრესიაა საჭირო, რომ ევროპამ, ბოლოს და ბოლოს, დაუწესოს რეალური სანქციები – დიპლომატიური და, პირველ რიგში, ეკონომიკური? როდის შევწყვეტთ, ვიყოთ გულუბრყვილოები?“.
რეზოლუციის პროექტი სენატში 18 ნოემბერს სხვადასხვა ფრაქციის ხუთმა სენატორმა შეიტანა, მათ შორის იყო რესპუბლიკელების ლიდერი ბრუნო რეტაიო და ცენტრისტების ჯგუფის კავშირის ხელმძღვანელი ერვე მარსელი.
ოქტომბერში, მთიანი ყარაბაღის აღიარების შესახებ კანონპროექტი საფრანგეთის პარლამენტის ქვედა პალატაშიც წარადგინეს. ის მთიანი ყარაბაღის აღიარების შეთავაზებას ითვალისწინებს, რათა დაიცვას მთიანიყარაბაღელი ხალხი აზერბაიჯანის მხრიდან მომავალი სამხედრო საფრთხისგან, რომელმაც სამხედრო აგრესია დაიწყო 27 სექტემბერს.
