სააკაშვილის საქმეზე ბრალი შს მინისტრის ყოფილ მოადგილეს წარუდგინეს

საქართველოს პროკურატურამ შს მინისტრის ყოფილ მოადგილეს, გიორგი ლორთქიფანიძეს ახალი ბრალი წარუდგინა. როგორც უწყებაში აცხადებენ, გიორგი ლორთქიფანიძე ექსპრეზიდენტ მიხეილ სააკაშვილს საქართველოს სახელმწიფო საზღვრის უკანონო კვეთაში ეხმარებოდა.

“გიორგი ლორთქიფანიძისთვის ცნობილი იყო, რომ მიხეილ სააკაშვილი საქართველოს საზღვრის უკანონოდ გადაკვეთას გეგმავდა და მისი დახმარების მიზნით შეიმუშავა და დაგეგმა თუ რა დროს, რა საშუალებით, რა მარშრუტით და რა ხერხით უნდა მომხდარიყო მსჯავრდებულ მიხელ სააკაშვილის მიერ საქართველოს სახელმწიფო საზღვრის უკანონო კვეთა”, — აცხადებს პროკურატურა.

მათივე განმარტებით,  გიორგი ლორთქიფანიძე 2021 წლის აპრილში შეხვდა ამ საქმის ერთ-ერთ ბრალდებულს, ელგუჯა ცომაიას და გარკვეული დახმარების სანაცვლოდ სთხოვა მიხეილ სააკაშვილის საქართველოში გადაყვანა მისი კუთვნილი სატვირთო მანქანით. სექტემბრის შუა რიცხვებში კი ლორთქიფანიძე კვლავ დაუკავშირდა, ამჯერად საქართველოში მყოფ ცომაიას და მოსთხოვა მას უკრაინაში ჩასვლა.

“26 სექტემბერს ჩერნომორსკის პორტის მიმდებარე ტერიტორიაზე გიორგი ლორთქიფანიძის კუთვნილი ავტომანქანით ძებნილი მიხეილ სააკაშვილი მიიყვანეს და ბრალდებულ ე.ც.-ს კუთვნილ სატვირთო ავტომანქანის სალონში არსებულ წინასწარ მოწყობილ სამალავში გადასვეს, რის შემდგომაც გადაკვეთეს უკრაინის სახელმწიფო საზღვარი და სატვირთო ავტომანქანა ბორანის ტიპის გემზე, სახელწოდებით VILNIUS-ი შეიყვანეს”, — აცხადებს პროკურატურა.

● მიხეილ სააკაშვილი სასამართლოს წინაშე პირველად წარდგა. რა თქვა ექსპრეზიდენტმა
● შიმშილობის შემდეგ. გია ნოდიას თვალსაზრისი

პროკურატურის ახალ ბრალს რუსეთის დაკვეთად აფასებს თავად საქართველოს მესამე პრეზიდენტი. სააკაშვილის თქმით, ლორთქიფანიძისთვის ბრალის წაყენება რუსეთის დაკვეთაა. ის ხაზს უსვამს იმას, რომ ლორთქიფანიძეს არაერთი წარმატებული ოპერაცია აქვს ჩატარებული როგორც საქართველოში, ისე უკრაინაში რუსეთის დაზვერვის წინააღმდეგ და რუსეთის სპეცსამსახურების ერთ-ერთ მთავარ სამიზნედ ითვლება:

“მე ნამდვილად არ მიკვირს იმ ხელისუფლებისგან, რომელსაც 9 წელიწადში არცერთი რუსეთის აგენტი არ გამოუვლენია, ლორთქიფანიძისთვის ბრალის წაყენება. პირდაპირ რუსულ დაკვეთად მიმაჩნია და სრულ ლუსტრაციას ახდენს ივანიშვილის კლეპტოკრატიული მმართველობის. პატრიოტული ქართული ხელისუფლება გენერალ ლორთქიფანიძეს საქართველოში უნდა სთხოვდეს დახმარებას და ასევე, აჯილდოებდეს.”

● სააკაშვილის საქმეები. რისთვის ზის ციხეში ყოფილი პრეზიდენტი
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● ირაკლი კობახიძე: ვინც პოლიტმიკერძოების გამო სახელმწიფოდ არ გვცნობს, მათთან ვერ ვითანამშრომლებთ

საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და გლდანის ციხეში გადაიყვანეს.

დაპატიმრებისთანავე ყოფილმა პრეზიდენტმა პროტესტის ნიშნად შიმშილობა დაიწყო. სააკაშვილი თავს პოლიტიკურ, უფრო კონკრეტულად კი რუსეთის პრეზიდენტის ვლადიმერ პუტინისა და საქართველოს არაფორმალური მმართველის ბიძინა ივანიშვილის პატიმრად მიიჩნევს.

ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. მისი მდგომარეობა დღითიდღე უარესდებოდა. ექიმთა ჯგუფმა, რომელიც სახალხო დამცველმა შექმნა, მისი მდგომარეობა კრიტიკულად შეაფასა.

საქართველოს სამოქალაქო სექტორი, დიპლომატები, რიგითი მოქალაქეები, მსახიობები, მწერლები და საზოგადოების სხვა ცნობილი სახეები ხელისუფლებას ექს-პრეზიდენტის მრავალპროფილურ კლინიკაში გადაყვანას სთხოვდნენ. ამ მოთხოვნით ხელისუფლებას მიმართა საქართველოს სახალხო დამცველმა, სახელმწიფო ინსპექტორის აპარატმა. განცხადება გაავრცელა აშშ-ს სახელმწიფო დეპარტამენტმაც. საბოლოოდ, მესამე პრეზიდენტი გორის სამედიცინო დაწესებულებაში 19 ნოემბერს გადაიყვანეს.

გარდა ამისა, არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილება. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.