„იმუშავე საქართველოდან“ - უცხოელების მოსაზიდად საქართველოს მთავრობამ ახალი პროექტი დაიწყო
პროექტის – „იმუშავე საქართველოდან“ (Remotely from Georgia) ფარგლებში, საქართველოს ხელისუფლება 95-ზე მეტი ქვეყნის, მათ შორის: აშშ-ის, ევროკავშირის და სპარსეთის ყურის ქვეყნების მოქალაქეებს დისტანციური მუშაობისთვის საქართველოში ჩამოსვლას და აქ 180-ზე მეტი დღით დარჩენას სთავაზობს.
ამ შეთავაზებით სარგებლობა შეუძლიათ თვითდასაქმებულებს, ანდა სრული განაკვეთით დასაქმებულებს, რომლებიც დისტანციური ფორმატით იმუშავებენ, ასევე მეწარმეებს, რომელთაც საშუალება აქვთ, რომ საკუთარი ბიზნესი მსოფლიოს ნებისმიერი წერტილიდან მართონ.
“ეს ჩვენი ტურიზმის ინდუსტრიისთვის ინოვაციური პროექტია. ეს პროექტი გიდების, ტურისტული ტრანსპორტის, ბინების გაქირავების, ტურისტული კომპანიებისა და სასტუმროებისთვის იქნება მნიშვნელოვანი შემოსავლის წყარო. ახალი პროექტით საქართველოში კიდევ უფრო მეტად მხარჯველუნარიანი ტურისტები შემოვლენ და რაც მთავარია, მოგზაურები დარჩებიან ბევრად უფრო ხანგრძლივი პერიოდით, ვიდრე გასულ წლებში,” – ამბობს ტურიზმის ეროვნული ადმინისტრაციის ხელმძღვანელი, მარიამ ქვრივიშვილი.
• PCR-ტესტი, კარანტინი და თვითიზოლაცია – რა უნდა იცოდეთ, თუ საქართველოში შემოსვლას ან საქართველოდან წასვლას აპირებთ
საქართველოში ჩამოსვლის და აქედან დისტანციურად მუშაობის მსურველმა stopcov.ge-ზე არსებული სპეციალური აპლიკაცია უნდა შეავსოს და არგუმენტირებულად დაასაბუთოს, რომ აქვს ქვეყანაში ცხოვრების ფინანსური შესაძლებლობა და საქართველოში ყოფნის პერიოდში შეძლებს ყველა გადასახადის გადახდას.
გარდა ამისა, საქართველოში ჩამოსვლის შემთხვევაში, უნდა გაიაროს
12-დღიანი სავალდებულო კარანტინი და კარანტინის ხარჯი თვითონ აანაზღაუროს. სავალდებულო იქნება ჯანმრთელობის დაზღვევაც.
ქვრივიშვილის თქმით, ეს პროექტი დაეხმარება კერძო სექტორს გაყიდვების ზრდასა და სამუშაო ადგილების შენარჩუნებაში და ხელს შეუწყობს საქართველოს, როგორც „უსაფრთხო მიმართულების“ ქვეყნის იმიჯის განმტკიცებას.
ახალი პლატფორმის ბმული stopcov.ge-ს გვერდზე აიტვირთება.
რა ოდენობის შემოსავლის მიღებას ელის ამ პროექტიდან საქართველოს მთავრობა, უცნობია.
