ქართველმა ჩოგბურთელმა როჯერ ფედერერი დაამარცხა. თუმცა, საქართველოში ეს ყველას არ გაუხარდა
ქართველმა ჩოგბურთელმა ნიკოლოზ ბასილაშვილმა სენსაციური გამარჯვება მოიპოვა დოჰაში გამართულ ტურნირზე – მან დიდი სლემის ტურნირების ოცგზის გამარჯვებული, მსოფლიო ჩოგბურთის ლეგენდა, 39 წლის შვეიცარიელი როჯერ ფედერერი დაამარცხა.
ეს ყველაზე დიდი მიღწევაა 29 წლის ქართველი ჩოგბურთელის კარიერასა და ზოგადად ქართული ჩოგბურთის ისტორიაში.
თუმცა, ბასილაშვილის გამარჯვებას ქართულ ფეისბუკზე არაერთგვაროვანი რეაქცია, დისკუსია და დაპირისპირება მოჰყვა.
საქმე იმაშია, რომ ცნობილი ქართველი ჩოგბურთელი, ქვეყნის ერთ-ერთი ყველაზე პოპულარული სპორტსმენი ნიკოლოზ ბასილაშვილი ყოფილ მეუღლეზე ძალადობაშია ეჭვმიტანილი. მან 100 ათას ლარიანი (32 ათას დოლარამდე) გირაო გადაიხადა იმისთვის, რომ სამდღიანი პატიმრობის შემდეგ წინასწარი დაკავების საკნიდან გამოეშვათ.
საზოგადოების ნაწილი მიიჩნევს, რომ ბასილაშვილის გამარჯვების გამო საყოველთაო სიხარული ახალისებს მოძალადე კაცებს.
“ბასილაშვილი ცოლზე ძალადობაშია ეჭვმიტანილი და მაინც გმირია ამ ქვეყანაში. მერე გვიკვირს ბერა რატომ გვაზის თავზე ან კაცები რატომ კლავენ ქალებს. უპრინციპოები ხართ ყველა და ძალადობასაც ახალისებთ, ვინც ბასილაშვილის გამარჯვებას აფრიალებთ აჟიტირებულები”, – წერს ფეისბუკზე ფემინისტი იდა ბახტურიძე.
____________________________________
