მთავარეპისკოპოსი ზენონი, რომელიც საქართველოს პატრიარქმა კათედრიდან გადააყენა, კიევში ჩავიდა

მთავარეპისკოპოსი ზენონი

დმანისისა და აგარაკ-ტაშირის მთავარეპისკოპოსი ზენონი, რომელიც ცოტა ხნის წინ საქართველოს კათოლიკოს-პატრიარქმა ილია მეორემ დიდი ბრიტანეთისა და ჩრდილოეთ ირლანდიის ეპარქიის კათედრიდან გადააყენა, კიევში ჩავიდა.

“სტუმრად უკრაინის სოლიდარობისათვის კიევისა და სრულიად უკრაინის უნეტარეს მიტროპოლიტ ეპიფანესთან”, – წერს მთავარეპისკოპოსი ზენონ იარაჯული და ფოტოებს აქვეყნებს. 

საქართველოს ეკლესია რუსეთის მიერ უკრაინაში შეჭრის შემდეგაც არ აღიარებს კონსტანტინოპოლის მიერ უკრაინისთვის მიერ მინიჭებულ ავტოკეფალიას და კიევის მიტროპოლიტად მოსკოვს დაქვემდებარებული ეკლესიის ლიდერს განიხილავს.

მეუფე ზენონი საქართველოს ეკლესიის პირველი მღვდელმთავარია, რომელიც მიტროპოლიტ ეპიფანეს სრული ტიტულით მოიხსენიებს, რაც მისი მხრიდან კიევის ეკლესიის აღიარებას ნიშნავს.  

აღსანიშნავია ისიც, რომ 2022 წლის 23 ნოემბერს საქართველოს კათოლიკოს პატრიარქმა ილია მეორემ რუსეთის პატრიარქ კირილს დაბადების დღე მიულოცა, სადაც საქართველოს პატრიარქი რუსეთის პატრიარქს უსურვებს, “რაც შეიძლება მალე აღდგენილიყოს სამართლიანობა და მშვიდობა რუსეთსა და უკრაინას შორის”,  მილოცვის ტექსტი რუსეთის საპატრიარქოს ოფიციალურ ვებგვერდზე გამოქვეყნდა.

● დასავლეთი თუ რუსეთი? საით მიყავს ქვეყანა ქართულ ეკლესიას
● საპატრიარქოს კაპიტალი. რა ქონებას ფლობს ყველაზე გავლენიანი ინსტიტუტი საქართველოში?  
● “ვაგროვებთ კომპრომატებს” – გავრცელდა საიდუმლო ფაილები, სადაც სუს-ი მღვდელმთავრებს უსმენს

მთავარეპისკოპოსი ზენონ იარაჯული, რომელიც ამ დრომდე დიდი ბრიტანეთისა და ირლანდიის ეპარქიას მართავდა, კათოლიკოს-პატრიარქ ილია მეორის მიერ შექმნილმა კომისიამ ეპარქიის მართვას ჩამოაშორა და ის მხოლოდ დმანინისა და აგარაკ-ტაშირის ეპარქიას უხელმძღვანელებს.

სინოდის დოკუმენტში ნახსენებია “ეპარქიაში შექმნილი ვითარება”, თუმცა დეტალები განმარტებული არ არის. მანამდე მთავარეპისკოპოსმა ზენონმა თქვა, რომ მას მიტროპოლიტი დიმიტრი შიოლაშვილი და საპატრიარქო ტახტის მოსაყდრე შიო უპირისპირდებოდნენ.

დიდი ბრიტანეთისა და ჩრდილოეთ ირლანდიის ეპარქიაში მრევლის ნაწილსა და მღვდელმთავარს შორის კონფლიქტი თვეებია გრძელდება. მორწმუნეთა ეს ჯგუფი მღვდელმთავარს რამდენიმე კანონიკურ და ზნეობრივ ბრალდებას უყენებს. ამ დროისთვის უცნობია ვინ ჩაიბარებს ეპარქიის მართვას დროებით.

ინფორმაცია მოგვიანებით საპატრიარქომაც დაადასტურა და საზოგადოებასთან ურთიერთობის სამსახურმა ფეისბუქზე ვრცელი პოსტს გამოაქყვეყნა, რომელშიც აღნიშნულია, რომ წმინდა სინოდის წევრები დეტალურად გაეცვნენ არსებულ ვითარებას და მიიჩნიეს, რომ მთავარეპისკოპოსი ზენონი უნდა გათავისუფლდეს საქართველოს ეკლესიის დიდი ბრიტანეთისა და ირლანდიის ეპარქიიდან.