ლენტეხში კარანტინი გამოცხადდა

ლენტეხის მუნიციპალიტეტის სოფელ მელეში მცხოვრებ 4 ადამიანს covid-19 დაუდასტურდა. ისინი იმ მამაკაცის ოჯახის წევრები და ნათესავები არიან, რომელსაც კორონავირუსი გუშინ, 9 აპრილს დაუდასტურდა. კორონავირუსის შიდა გავრცელების პრევენციის მიზნით ლენტეხში კარანტინი გამოცხადდა. 

10 აპრილის მონაცემებით, საქართველოში კორონავირუსით ინფიცირების 227  შემთხვევაა დადასტურებული. კარანტინის რეჟიმშია 4829 ადამიანი, ხოლო სტაციონარში მეთვალყურეობის ქვეშ – 410 პირი. კორონავირუსით ინფიცირებულთაგან 51 გამოჯანმრთელდა და 3  გარდაიცვალა.

მელეში მცხოვრები, კორონავირუსით ინფიცირებული პაციენტები ახლა თბილისში გადმოჰყავთ. 

ამავე სოფელში 50-ზე მეტი ადამიანი თვითიზოლაციაში იმყოფება. 

კარანტინის ფარგლებში, დღეიდან ლენტეხში შესვლა და გამოსვლა აიკრძალა. ადგილობრივ მოსახლეობას გარეთ გამოსვლა მხოლოდ აუცილებელი საჭიროებისთვის – საკვების და წამლების შესაძენად, ან ექიმთან წასასვლელად შეეძლება. 

მარნეულისა და ბოლნისის მსგავსად, მოსახლეობას აქვს უფლება, რომ სპეციალური რეჟიმის დაცვით საგაზაფხულო სამუშაოები აწარმოოს. 

• საქართველოში საგანგებო რეჟიმი გამკაცრდა. რა უნდა ვიცოდეთ
• ახლობლები რომ მირეკავდნენ, ზოგს ეტირებოდა – რას ჰყვება კორონავირუსით ინფიცირებული სტუდენტი
• საქართველოში საყოველთაო კარანტინი ცხადდება
• საქართველოში კორონავირუსზე პაციენტის შემოწმების წესი შეიცვალა: ვის გაუკეთებენ ტესტს?

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს ქვეყანაში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.