კორონავირუსი მსოფლიოში: ესპანეთში სამუშაოს უბრუნდებიან, ჩინეთი რუსეთთან საზღვარს კეტავს

რიცხვები: 

14 აპრილისთვის, მთელ მსოფლიოში, COVID-19-ით დაინფიცირდა 1.9 მილიონზე მეტი ადამიანი და გარდაიცვალა – სულ მცირე, 119 ათასი

წყაროები – CNN, BBC

ჩინეთში ახალი ინფიცირებულების დიდი ნაწილი რუსეთიდან ჩავიდა

ჩინეთში, ვირუსის გავრცელების ძირითადი წყარო რუსეთიდან დაბრუნებული ადამიანები გახდნენ.

409 ადამიანი შევიდა ორი დღის განმავლობაში ჩინეთში, მხოლოდ ქალაქ სუიფენჰეს გავლით, რომელიც ტრანსსასაზღვრო ვაჭრობის ცენტრია. 21 მათგანი კორონავირუსით ინფიცირებული აღმოჩნდა.

საერთო ჯამში, პროვინციაში 197 შემთხვევაა და ყველა მათგანი ჩამოსულია, მათი უმრავლესობა მოსკოვიდან ჩამოფრინდა. ჩინეთმა 14-დღიანი კარანტინი დააწესა რუსეთიდან ჩასული ყველა ადამიანისთვის, სუიფენჰეს გადასასვლელი კი ჩაიკეტა.

რუსეთის ჯანდაცვის სისტემა ზღვარზე მუშაობს

რუსეთში, დღე-ღამის განმავლობაში, 2 774 ადამიანი დაინფიცირდა. საერთო ჯამში, ინფიცირებულთა რიცხვმა 21 102-ს მიაღწია.

ეს ოფიციალური ინფორმაციაა, მაგრამ ადგილობრივი და საერთაშორისო სპეციალისტები ამბობენ, რომ, სავარაუდოდ, გაცილებით მეტი შემთხვევაა, რადგან ათასობით ადამიანს უსვამენ პნევმონიის დიაგნოზს.

ეპიდემიის ეპიცენტრად მოსკოვი რჩება, სადაც, დაახლოებით, ორი ათასი ადამიანი დაინფიცირდა 24 საათში. სასწრაფო დახმარების მანქანები 8-9 საათი დგანან რიგში, რათა ავადმყოფი სტაციონარში მოათავსონ.

ვიცე-პრემიერმა, ტატიანა გოლიკოვამ, რომელიც ჯანდაცვის სექტორზეა პასუხისმგებელი, განაცხადა, რომ „სისტემა ზღვარზეა“.

• რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს 
• კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი 
• „მიმაჩნია, რომ არანაირი კორონავირუსი არ არსებობს“ – ამის დასამტკიცებლად ვლადიკავკაზში საავადმყოფოს შეუტიეს 

ეპიდემიოლოგები ამბობენ, რომ პანდემიის განვითარების ტემპით რუსეთი იტალიას უახლოვდება, დაახლოებით, ერთი თვის ჩამორჩენით.

15 აპრილიდან, მოსკოვის მცხოვრებლებს მხოლოდ სპეციალური საშვით ექნებათ გადაადგილების უფლება.

ამავე დროს, სხვა რეგიონებში იზოლაციის წესები თანდათან სუსტდება, მაგრამ არა იმიტომ, რომ ეპიდემიოლოგიური ვითარება უმჯობესდება – თუკი ადამიანებს მუშაობის უფლებას არ მისცემენ, ცოტა ხანში, ისინი არსებობის საშუალების გარეშე დარჩებიან.

თურქეთი ციხეებს ათავისუფლებს 

თურქეთის ხელისუფლებამ ეპიდემიის პირობებში, ციხიდან 90 ათასი პატიმრის გათავისუფლების შესახებ განაცხადა – მათ ნაწილს ამნისტია შეეხო, ნაწილი კი შინაპატიმრობაში გადაჰყავთ.

ადგილობრივი მედია ყურადღებას ამახვილებს იმაზე, რომ მათი დიდი ნაწილი – ოპოზიციონერები, სამოქალაქო აქტივისტები, ჟურნალისტები და ბლოგერები არიან, რომლებიც „პანიკის გავრცელების“ გამო გაასამართლეს.

• „მაგრამ ბიზნესს მაინც არ დავხურავთ“ – თურქეთი პირველ ადგილზეა მსოფლიოში კორონავირუსის გავრცელების ტემპით 
• კიევ-პეჩერის ლავრა მას შემდეგ დაიხურა, რაც მონასტერში კორონავირუსის 90 შემთხვევა გამოავლინეს 
• ბელარუსული ფლეშმობი: „რას იტყოდა შენს სიკვდილზე ლუკაშენკო“ 
• „გადაწყვიტონ, ვინ უნდა იცოცხლოს და ვინ უნდა მოკვდეს – ის არ არის, რასაც მე მასწავლიდნენ“ – ნიუიორკელი ექიმის ისტორია 

თურქეთში, 14 აპრილის მონაცემებით, 61 049 ინფიცირებული და თითქმის 1 300 გარდაცვლილია.

ქვეყნის შინაგან საქმეთა მინისტრმა, სულეიმან სოილუმ საკუთარ თავზე აიღო ვირუსის გავრცელებაზე პასუხისმგებლობა, რადგან, მისი თქმით, ვერ შეძლო კომენდანტის საათის დაცვის უზრუნველყოფა. მან თანამდებობიდან გადადგომის შესახებ დაწერა განცხადება, მაგრამ პრეზიდენტმა ერდოღანმა არ დაუკმაყოფილა.

ესპანეთი, ევროპის სხვა ქვეყნების შემდეგ, მუშაობას უბრუნდება

ესპანეთი ევროპაში პირველ და მსოფლიოში მეორე ადგილზეა კორონავირუსით ინფიცირებულთა რაოდენობით. 

საერთო ჯამში, 14 აპრილისთვის, აქ 172 541 ადამიანი დაინფიცირდა და 18 ათასზე მეტი გარდაიცვალა.

თუმცა, ახალი შემთხვევებისა და გარდაცვალების რიცხვის შემცირების განუხრელი დინამიკა ხელისუფლებისთვის საკარანტინო ზომების თანდათანობით შემცირების საფუძველი გახდა. მხოლოდ მადრიდსა და მის გარეუბნებში, ამ კვირაში 300 ათასი ადამიანი დაუბრუნდა სამუშაოს.

ჯერჯერობით საუბარია მხოლოდ „სასიცოცხლოდ მნიშვნელოვან“ წარმოებებზე. ისეთი ობიექტები კი, როგორებიც რესტორნები, კაფეები და კინოთეატრებია, კვლავინდებურად დაკეტილი რჩება.

ესპანეთი საკარანტინო ზომების შემცირებაზე წავიდა ავსტრიის, ჩეხეთისა და გერმანიის კვალდაკვალ. 

საფრანგეთი აცხადებს, რომ შეზღუდვების მოხსნას 1 მაისიდან დაიწყებს – პირველ რიგში, გაიხსნება სკოლები.

აშშ პანდემიის პიკის მოლოდინში

აშშ-ში, მიმდინარე კვირაში, პანდემიის პიკს ელიან – ამის შემდეგ კი იმედი აქვთ, რომ ინფიცირების შემთხვევათა რაოდენობა კლებას დაიწყებს.

14 აპრილისთვის, აშშ-ში კორონავირუსით ინფიცირებული 587 173 ადამიანი და 23 644 გარდაცვლილი ჰყავთ. 

ხელისუფლებამ პირველადი პროგნოზი დააკორექტირა, რომლის თანახმადაც, მსხვერპლი, შესაძლოა, 100-დან 240 ათასამდე ყოფილიყო. ახალი პროგნოზით, მსხვერპლი, დაახლოებით, 60 ათასი იქნება.

დიდი ბრიტანეთი – ქვეყანაში მედიკოსთა მესამედი კორონავირუსით არის ინფიცირებული

საყოველთაოდ ცნობილი გახდა სახელმწიფო ჯანდაცვის სისტემაში მომუშავე სამედიცინო პერსონალის ტოტალური ტესტირების შედეგები. კორონავირუსით ინფიცირებული აღმოჩნდა მედიკოსთა მესამედი.

სპეციალისტების მტკიცებით, ამის მიზეზი, შესაძლოა, საავადმყოფოებში, პერსონალის პირადი თავდაცვის საშუალებების მწვავე დეფიციტი გახდა. 

14 აპრილისთვის, დიდ ბრიტანეთს 88 621 ინფიცირებული ჰყავს, რომელთაგან 11 329 გარდაიცვალა.