გახარია: ჯანდაცვის სისტემის რესურსი არ არის შეუზღუდავი

მიუხედავად იმისა, რომ ინფიცირების შემთხვევების გაზრდილი რაოდენობის და სწრაფი გავრცელების მართვასთან დაკავშირებით პრობლემები არ არის, ეს არ ნიშნავს იმას, რომ საქართველოს ჯანდაცვის სისტემის რესურსი არის შეუზღუდავი – ამის შესახებ 5 ოქტომბერს საქართველოს პრემიერ-მინისტრმა გიორგი გახარიამ განაცხადა.

„ყველას უნდა ავუხსნათ რომ ნებისმიერ რესურსს და პირველ რიგში ჯანდაცვის სისტემის რესურსს აქვს თავისი შეზღუდვები, რომლებიც უნდა გავითვალისწინოთ. შეზღუდვებს რომ თავი ავარიდოთ, უნდა დავიცვათ ელემენტარული ნორმები – პირბადე, დისტანცია, ჰიგიენის ნორმები და განსაკუთრებით ხანდაზმულ ადამიანებზე ზრუნვა, განსაკუთრებით აჭარაში“, – განაცხადა პრემიერ-მინისტრმა.

გახარიას თქმით, ყველა დაწესებულებას თავისი პასუხისმგებლობა უნდა ჰქონდეს, რათა განახორციელონ თერმოსკრინინგი, უზრუნველყონ ელემენტარული სადეზინფექციო საშუალებები და კონტროლი თავიანთ თანამშრომლებზე, იმისთვის, რომ საჭიროების შემთხვევაში სწრაფად მოხდეს მედიკოსების რეაგირება.

„ვაგრძელებთ ეკონომიკის მუშაობას, განათლების სისტემის მუშაობას, მიმდინარეობს პოლიტიკური პროცესი, შესაბამისად, არანაირი საფუძველი და სურვილი დღეს ეს შევზღუდოთ არ გვაქვს“, – აღნიშნა მთავრობის მეთაურმა.

პრემიერ-მინისტრის თქმით, საჭიროა, რომ სამმა კომპონენტმა იმუშაოს ერთად – მოქალაქემ, სახელმწიფომ და დაწესებულებებმა, ყველას ჰქონდეს გადანაწილებული შესაბამისი პასუხისმგებლობა.

„ფაქტია, მიუხედავად იმისა, რომ ვირუსის დაწყებიდან დაახლოებით 8 თვე გავიდა, თანამედროვე მსოფლიომ ახალი ვერაფერი შემოგვთავაზა ვირუსის წინააღმდეგ ბრძოლაში. ისევ პირბადე, ისევ დისტანცია, ისევ დიდი რაოდენობის არასაჭირო სოციალური თავშეყრებისგან თავის არიდება და ა.შ.“, – განაცხადა გახარიამ.