გარდაბნის სოფელი ყარაჯალარი ჩაიკეტა. ლილოში კი მასობრივი ტესტირება დაიწყო
ბოლო რამდენიმე დღეა, საქართველოში კოვიდინფიცირებულთა რაოდენობა ორნიშნა ციფრით იზრდება.
დღეს, 24 ივლისს 19 ახალი შემთხვევა გამოვლინდა.
ბოლო დღეებში გამოვლენილ შემთხვევათა უმეტესობა ქვემო ქართლის რეგიონიდან, გარდაბნის მუნიციპალიტეტიდანაა.
გარდაბნიდან ვირუსი ლილოს ბაზრობაზეც გავრცელდა – 8 ახალი შემთხვევა სწორედ ლილოს მოვაჭრეები არიან, რის გამოც ლილოში მასობრივი PCR ტესტირება დაიწყო.
დამძიმებული ეპიდმდგომარეობის გამო 24 ივლისიდან კარანტინზე ჩაიკეტა სოფელი ყარაჯალარი. ამ სოფელში მასობრივი ტესტირებაც ჩატარდა და რამდენიმე ათეულ ადამიანს გამოუვლინდა ვირუსი.
მდგომარეობას ისიც ართულებს, რომ ადგილობრივების დიდი ნაწილი ეპიდემიოლოგებთან არ თანამშრომლობს და კორონავირუსზე შემოწმებისთვის ნაცხის აღებაზე უარს ამბობს.
გუშინ ამ სოფელში PCR-ტესტი 203 ადამიანს გაუკეთდა, არადა გაცილებით მეტი ნიმუშის არება იყო დაგეგმილი.
- კარანტინი და ადამიანის უფლებები. საუბარი ანა არგანაშვილთან
- კარანტინი აზერბაიჯანში: სუიციდი, პოლიციის მხრიდან სექსუალური შევიწროება და სხვა შედეგები
სოფელ ყარაჯალარის შესასვლელსა და გასასვლელში საკონტროლო გამშვები პუნქტები მოეწყო – შინაგან საქმეთა სამინისტროს თანამშრომლები საკარანტინო შეზღუდვებს 24 საათის განმავლობაში გააკონტროლებენ.
სამართალდამცველების მიერ კონტროლდება სოფელთან მისასვლელი მეორეხარისხოვანი გზებიც.
სოფელში პოლიცია პატრულირებს და ტერიტორიის კონტროლის პროცესში ჩართულია დრონები.
ამგვარი მკაცრი კონტროლი იმის გამო გახდა საჭირო, რომ ქვემო ქართლიდან ვირუსი უკვე გავრცელდა თბილისში – ლილოს ბაზრობაზე.
ლილოს ბაზრობა ერთ-ერთი დიდი სავაჭრო ცენტრია თბილისის შემოგარენში, სადაც დღეში ათასობით ადამიანი ირევა. ლილოს ბაზრობაზე ბევრი გარდაბნის მაცხოვრებელი მუშაობს.
24 ივლისს გამოვლენი 19 შემთხვევიდან 8 ლილოს ბაზრობაზე მომუშავე პერსონალია. ისინი სწორედ გარდაბნის მუნიციპალიტეტიდან არიან და იქ დაინფიცირდნენ.
ლილოს ბაზრობაზე 24 ივლისიდან ფართომასშტაბიანი სკრინინგი დაიწყო.
ბაზრობის პრესსამსახურის ინფორმაციით, ლილოს ბაზრობაზეუსაფრთხოების ზომები გამკაცრებულია და ეპიდემიოლოგიური კვლევა მიმდინარეობს.
თუმცა, მათივე განცხადებით, მომხმარებლებს კვლავინდებურად შეუძლიათ ბაზრობაზე მისვლა და ვაჭრობა უსაფრთხოების ზომების დაცვით.
“კიდევ უფრო მეტად გამკაცრებულია უსაფრთხოების ზომები, მკაცრი კონტროლი მიდის. შესაბამისად, უსაფრთხოა მომხმარებლებისთვის ბაზრობაზე მოსვლა და ვაჭრობა. ლილოს ბაზრობის დახურვა ამ ეტაპზე არ იგეგმება. ყველა სტანდარტს ვაკმაყოფილებთ“- განაცხადეს პრესსამსახურში.
____________________
საერთო ჯამში, 26 თებერვლიდან დღემდე საქართველოში კორონავირუსის 1104 დადასტურებული შემთხვევაა აღრიცხული. აქედან 16 ადამიანი გარდაიცვალა, 912 კი გამოჯანმრთელდა.
