„რუსეთისა და ევრაზიული ეკონომიკური კავშირის გარკვეული წრეები სომხეთის ოპოზიციის საიდუმლო გეგმას მხარს უჭერენ“ - ფაშინიანი
ფაშინიანი ოპოზიციის საიდუმლო გეგმაზე
„სომხეთი ისტორიულად მნიშვნელოვან ზღვარს მიუახლოვდა. ეს გარდამტეხი ეტაპი იქნება პოლიტიკური, ეკონომიკური და სოციალური თვალსაზრისით“, – განაცხადა სომხეთის პრემიერ-მინისტრმა ნიკოლ ფაშინიანმა 2027 წლის სახელმწიფო ბიუჯეტის პროექტის განხილვისას.
თუმცა, მისი თქმით, არსებობენ ძალები როგორც სომხეთში, ისე მის ფარგლებს გარეთ, რომელთა მთავარი მიზანია, „არ დაუშვან ამ ისტორიული ეტაპის დადგომა“.
ფაშინიანის განცხადებით, მსგავსი ძალები სომხეთის სახელმწიფოებრიობის წინააღმდეგ ადრეც მოქმედებდნენ – ჯერ კიდევ 2018 წლიდან.
საუბარია პერიოდზე, როდესაც სომხეთში „ხავერდოვანი რევოლუცია“ მოხდა და ხელისუფლებაში თავად ფაშინიანი და მისი გუნდი მოვიდნენ. „მაგრამ წელს მათი გეგმები გამოაშკარავდა“, – ხაზი გაუსვა პრემიერმა.
მან განსაკუთრებული ყურადღება გაამახვილა ე.წ. „საიდუმლო გეგმაზე“, რომელსაც ბოლო დროს ოპოზიციურ წრეებში განიხილავენ.
„ამ გეგმის მიზანია, ხელი შეუშალოს სომხეთს ეკონომიკური განვითარების გზაზე სვლაში. სომხეთის შიგნით ამ საიდუმლო გეგმის განსახორციელებლად რესურსები არ არსებობს, ამიტომ მისმა ავტორებმა ყველაფერი უნდა გააკეთონ, რათა გარე რესურსების მოზიდვა შეძლონ“, – განაცხადა მან.
პრემიერი ამ „საიდუმლო გეგმაზე“ ორი კვირის წინაც საუბრობდა. თუმცა, არ დაუკონკრეტებია, რომელ ქვეყნებს გულისხმობდა. ამჯერად კი მან ღიად განაცხადა:
„არ მინდა დავმალო ისიც, რომ ამ გეგმას მხარს უჭერს რუსეთის ხელმძღვანელობით მოქმედი ევრაზიული ეკონომიკური კავშირის გარკვეული წრეები და რუსეთის ფედერაცია. ამას თავისი მიზეზებიც აქვს, რადგან სომხეთში კონკრეტული დაპირებებითა და გარანტიებით გარკვეული პირები მიავლინეს“
სომხეთში ხელისუფლების შეცვლის ე.წ. „საიდუმლო გეგმაზე“ ბოლო დროს არაერთხელ ისაუბრა პრორუსული ოპოზიციური პარტიის, „ძლიერი სომხეთის“, ლიდერმა სამველ კარაპეტიანმა. ასე უპასუხა მან კითხვას, თუ რა ნაბიჯების გადადგმას აპირებს ოპოზიცია მოქმედი ხელისუფლების დასამხობად.
22 ოქტომბერს, ყოველკვირეულ ბრიფინგზე, ნიკოლ ფაშინიანმა განაცხადა, რომ არსებობენ ძალები როგორც სომხეთში, ისე მის ფარგლებს გარეთ, რომლებიც სომხეთის ფაქტობრივად ლიკვიდაციისკენ მიმართულ ნაბიჯებს დგამენ:
„მიზანია სომხეთში შიდა პოლიტიკური არასტაბილურობის პროვოცირება. შედეგად კი, სომხეთის სახელმწიფოზე კონტროლის დამყარებას აპირებენ. სხვა სიტყვებით რომ ვთქვათ, საუბარია სომხეთისთვის დამოუკიდებლობის წართმევაზე – ჯერ დე ფაქტო, შემდეგ კი დე იურე“.
პრემიერმა ასევე განაცხადა, რომ ბოლო სამი წლის განმავლობაში მსგავსი მცდელობა რამდენჯერმე იყო. კერძოდ, მან ახსენა 2023 წლის მოვლენები მთიან ყარაბაღში და 2026 წლის ივნისში გამართული საპარლამენტო არჩევნების დროს სომხეთის წინააღმდეგ განხორციელებული ჰიბრიდული თავდასხმები.
მისი აზრით, ახლა მესამე მცდელობა მზადდება. ამაში ის გულისხმობდა, მათ შორის, ევრაზიული მთავრობათაშორისი საბჭოს ექსპერტთა პროგნოზს, რომლის თანახმადაც, ევრაზიული ეკონომიკური კავშირიდან (ЕАEU) გასვლის შემთხვევაში სომხეთის ეკონომიკას, სავარაუდოდ, კატასტროფული ვარდნა ემუქრება.
„ეს იმ „საიდუმლო გეგმის“ ნაწილია, რომელსაც ახლა აქტიურად განიხილავენ“, – განაცხადა ფაშინიანმა.
- “თუ რუსეთი სამხედრო ბაზას გაიყვანს, წინააღმდეგი არ ვიქნებით” — ფაშინიანმა პუტინთან შეხვედრა შეაჯამა
- „მოსკოვის მთავარი შიშია ის, რომ სომხეთი ევროკავშირს აირჩევს“. ანალიტიკა
„სომხეთის პოლიტიკურმა ძალებმა უნდა გააცნობიერონ, რომ მათი ერთადერთი გარანტი ხალხია“
პრემიერ-მინისტრის თქმით, ზოგიერთ ოპოზიციონერს „გარკვეული გარანტიები მისცეს და სომხეთში მიავლინეს“.
შემდეგ მან კითხვა დასვა: „რატომ არ სრულდება ეს გარანტიები?“ და თავადვე უპასუხა – ოპოზიციას სომეხი ხალხის ისტორიის გახსენება ურჩია.
მისი თქმით, ყველა იმ შემთხვევაში, როდესაც ქვეყანაში „გარანტორები“ ჩნდებოდნენ, ისტორია მორიგი კატასტროფით სრულდებოდა.
„ფაქტობრივად, ჩვენს ოპოზიციონერ კოლეგებს სამსახურს ვუწევ და ვანიშნებ, რომ მათ ჯერ კიდევ აქვთ დრო, მსგავსი კატასტროფა თავიდან აიცილონ. ვსაუბრობ პოლიტიკურ კატასტროფაზე, რომელიც ოპოზიციურ პარტიებს ემუქრება და რომლის შესახებაც ყველამ იცით. იმედი მაქვს, ისინი ამ შესაძლებლობას გამოიყენებენ და საფრთხეს თავიდან აიცილებენ“, – განაცხადა ნიკოლ ფაშინიანმა.
მან გაიხსენა, რომ მანამდე ოპოზიციას უკვე მოუწოდებდა, უარი ეთქვა ამ „გარანტორებზე“ დაყრდნობაზე და ამის ნაცვლად ძალისხმევა სომხეთის დამოუკიდებლობისა და სუვერენიტეტის განმტკიცებისთვის მიემართა. თუმცა მის მოწოდებას პასუხი არ მოჰყოლია.
„ფაქტობრივად, ამ წინადადებას დუმილით უპასუხეს და უარყვეს. მიმაჩნია, რომ შესაძლებლობების ფანჯარა ჯერ კიდევ ღიაა. საბოლოო ჯამში, ჩვენმა პოლიტიკურმა ძალებმა უნდა გააცნობიერონ: არსებობს მხოლოდ ერთი გარანტია – ეს სომეხი ხალხია“, – ხაზი გაუსვა მან.
ფაშინიანი ოპოზიციის საიდუმლო გეგმაზე
