70 მილიონ დოლარამდე ზარალი მიადგა აფხაზეთს სტიქიური უბედურების შედეგად. ვიდეო

ქარიშხალი და წყალდიდობა აფხაზეთში 

დღე-ნახევრის განმავლობაში, 4-დან 5 ივლისამდე, აფხაზეთში ქარიშხალი მძვინვარებდა, რომელსაც თან ახლდა ჭექა-ქუხილი და ძლიერი ღვარცოფი. წაიქცა ხეები, სახლებს სახურავები მოსძვრა, ბევრი მანქანა დაზიანდა. გაწყვეტილი გადამცემი ხაზების გამო, 24 საათზე მეტი ხნის განმავლობაში არ იყო ელექტროენერგია და ინტერნეტი. წინასწარი დათვლებით, ზარალი, დაახლოებით, რამდენიმე ასეული მილიონი რუბლით (70 მილიონ დოლარამდე) ფასდება.

მხოლოდ 5 ივლისს, გვიან ღამით მოახერხეს საქალაქო სამსახურებმა სოხუმის გაწმენდა წაქცეული ხეებისგან, ელექტროენერგიის მიწოდებისა და საავტომობილო მოძრაობის აღდგენა. თუმცა, დაზიანების მასშტაბი იმდენად დიდია, რომ მის სრულ ლიკვიდაციას რამდენიმე კვირა დასჭირდება. 

სულ, აფხაზეთის სანაპიროს ტერიტორიას ერთი დღის ინტერვალით ორმა ქარიშხალმა გადაუარა. ათამდე მრავალსართულიანი საცხოვრებელი სახლი დარჩა სახურავის გარეშე. ძლიერმა ქარმა სახურავი მოხადა სასტუმრო კომპლექსს, ბავშვთა პოლიკლინიკასა და საბავშვო ბაღს. 

ელექტროენერგიის მიწოდების აღდგენა 5 ივლისის საღამოს მოხერხდა, მაგრამ ოპტიკურ-ბოჭკოვანი კავშირის აღდგენისთვის ადგილობრივ პროვაიდერებს, სულ მცირე, ერთი კვირა დასჭირდებათ. 

პრეზიდენტმა ასლან ბჟანიამ, აღდგენითი სამუშაოების დათვალიერებისას, სტიქიით დაზარალებულთათვის დახმარების პირობა დადო. თუმცა, ჯერჯერობით გაურკვეველია, ვინ და რა მოცულობით აუნაზღაურებს ზარალს, მათ შორის, ავტომობილების მფლობელებს, რომელთა მანქანებიც წაქცეულმა ხეებმა დააზიანა. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო