სომხეთში უქმე დღეებში პოლიკლინიკებში მორიგე ექიმები იმუშავებენ

სომხეთის ჯანდაცვის მინისტრმა არსენ ტოროსიანმა რესპუბლიკის მოსახლეობას მიმართა კითხვით – არსებობს თუა რა უქმე დღეებში პოლიკლინიკებში მორიგეობის დაწესების აუცილებლობა. მინისტრმა სოციალური ქსელ Facebook-ის საკუთარ გვერდზე გააკეთა ჩანაწერი:

„რას იტყვით, თუკი უქმე დღეებში პოლიკლინიკებში ერთი ექიმისა და მედდის მორიგეობა დაწესდება?“

მოცემულ საკითხთან დაკავშირებით მომხმარებელთა აზრები გაიყო:

„ასეთ აუცილებლობას ვერ ვხედავ. თუკი საქმე ქრონიკულ დაავადებებს ეხება, მაშინ ეს ორშაბათამდეც მოიცდის, და თუ არა – სასწრაფო დახმარება და საავადმყოფოები არსებობს“.

 „თუ მორიგეს ამისთვის ხელფასს მოუმატებენ, მაშინ ღირს. და თუ არა, მაშინ ამის გაკეთება საჭირო არ არის, რადგან გამოვა, რომ ექიმებს დატვირთვა გაეზრდებათ, მათი ხელფასი კი იგივე დარჩება“.   

 „რასაკვირველია, ეს კარგი იდეაა. მაგრამ ჯერ მთლიანობაში პოლიკლინიკების მომსახურების ხარისხი უნდა ამაღლდეს“.

ეს ახლახან დანიშნული მინისტრის პირველი ინიციატივა არ არის. არსენ ტოროსიანმა სამედიცინო სფეროში არსებული კორუფციისა და უსამართლობის წინააღმდეგ ბრძოლა თავიდანვე გამოაცხადა:

 „სომხეთში საავადმყოფოებს შორის ფული უსამართლოდ ნაწილდება. სისიანის სამედიცინო ცენტრს სახელმწიფო ბიუჯეტიდან 2,5 დრამი (დაახლოებით 5 ათასი დოლარი) გამოეყოფა, ერევნის ერთ-ერთი საავადმყოფო კი – 5 მილიარდ დრამს იღებს“.

შედეგად, სომხეთის საავადმყოფოებსა და პოლიკლინიკებში დაიწყო შემოწმებები, რაც აქამდე გრძელდება.

არსენ ტოროსიანს ქვეყნის მაცხოვრებლებისთვის სხვა რეზონანსული საკითხისთვისაც არ აუვლია გვერდი. მან წამლების რეცეპტებით გაყიდვის თაობაზე წინა მთავრობის მიერ მიღებული გადაწყვეტილება ჯერჯერობით ძალაში დატოვა. თუმცა, მისი თქმით, სამინისტრო საკანონმდებლო დებულების დახვეწას აპირებს. საბოლოოდ, ზოგიერთი წამლის რეცეპტებით გაყიდვა ერთი წლით გადაიდო.