სამი ახალი შემთხვევა სომხეთში - კორონავირუსით ინფიცირებულთა საერთო რაოდენობამ ოთხს მიაღწია

სომხეთში, 11 მარტს, კორონავირუსით ინფიცირების კიდევ სამი შემთხვევა დარეგისტრირდა. სამივე მათგანი იტალიიდან 10 მარტს, სპეციალურად ორგანიზებული რეისით დაბრუნდა.

ამრიგად, კორონავირუსით ინფიცირებულთა საერთო რიცხვმა ქვეყანაში ოთხს მიაღწია.

პრემიერ-მინისტრმა ნიკოლ ფაშინიანმა Facebook-ის საკუთარ გვერდზე დაწერა: „ორი ახალი ინფიცირებული – სომხეთის მოქალაქეა (45 და 27 წლის), ერთი – იტალიის მოქალაქე (51 წლის), რომელიც სომხეთში მუშაობს“.

ახლა არკვევენ იმ პირთა წრეს, რომელთანაც ამ ადამიანებს ჰქონდათ ურთიერთობა. წინასწარი მონაცემებით, ეს წრე არც ისე დიდია.

• ვიდეო: როგორ უნდა დავიცვათ თავი კორონავირუსისგან

• ყველაფერი კორონავირუსის შესახებ

10 მარტს, სომხეთში იტალიიდან ერთდროულად ორი თვითმფრინავი ჩამოფრინდა – რომიდან და მილანიდან. გავრცელდა ინფორმაცია, რომ აეროპორტში შემოწმების შემდეგ, მათ სახლში გაუშვებდნენ კარანტინის გასავლელად.

„ფინანსურ ხარჯებს დაფარავს სომხეთის მთავრობა, ავიაკომპანია Atlantis European Airways და კომპანია „სომხეთის საერთაშორისო აეროპორტი“, – დაწერა Facebook-ის საკუთარ გვერდზე ვიცე-პრემიერმა ტიგრან ავინიანმა.

სომხეთში, კორონავირუსით ინფიცირების პირველი შემთხვევა 1 მარტს დარეგისტრირდა. სომხეთის 29 წლის მოქალაქე სამშობლოში თეირანიდან დაბრუნდა.

23 თებერვალს, ირანში პირველი ინფიცირებულების გამოვლენის შემდეგ, სომხეთმა ორი კვირით ჩაკეტა საზღვარი ამ ქვეყანასთან, რათა ვირუსის შემოღწევა შეეჩერებინა. მაგრამ სპეციალურად აღინიშნა, რომ არანაირი შეზღუდვები არ შეეხებოდათ ირანისა და სომხეთის მოქალაქეებს, რომლებიც სამშობლოში ბრუნდებიან.