სომხეთის ყოფილი პრეზიდენტის, სერჟ სარგისანის ძმისშვილი მკვლელობის მიზნით თავდასხმაშია ეჭვმიტანილი

სომხეთის სამართალდამცავმა ორგანოებმა 11 წლის წინანდელი სისხლის სამართლის საქმის გამოძიება განაახლეს. აიკ სარგსიანი, სომხეთის მესამე პრეზიდენტის, სერჟ სარგსიანის ძმისშვილი მკვლელობის მიზნით თავდასხმაშია ეჭვმიტანილი.

საგამოძიებო კომიტეტს ამ ინციდენტის წვრილმანები მოჰყავს. 2007 წლის 1 აპრილს პოლიციის განყოფილებაში ერევნის მაცხოვრებლის დავიდ სიმონიანის ჰოსპიტალიზაციის შესახებ ცნობა შევიდა. იმავე დღეს პოლიციის განყოფილებაში გამოცხადდა ერევნის სხვა მოქალაქე, არტურ გევონდიანი, რომელმაც იარაღი წარადგინა და განაცხადა, რომ მან ეს იარაღი იპოვა, შემდეგ კი მასთან გაუფრთხილებელი მოპყრობის შედეგად მეგობარს, დავიდ სიმონიანს ესროლა.

აღიძრა სისხლის სამართლის საქმე, თუმცა შემდეგ საჩივრის არარსებობისა და მხარეთა მორიგების საფუძველზე, დაიხურა.

11 წლის შემდეგ სომხეთის გენერალურმა პროკურორმა სისხლის სამართლის ამ საქმის განახლება გადაწყვიტა, რადგან გამოვლენილია ახალი, მანამდე უცნობი გარემოებები. კერძოდ, გაირკვა, რომ დაზარალებულს არტურ გევოდიანმა კი არ ესროლა, არამედ აიკ სარგსიანმა, სერჟ სარგსიანის ღვიძლი ძმის ვაჟმა. დაპირისპირების შედეგად აიკ სარგსიანი ამ საქმეში ეჭვმიტანილი გახდა.

ხელისუფლების შეცვლისა და პრემიერ-მინისტრად ნიკოლ ფაშინიანის არჩევის შემდეგ ექს-პრეზიდენტ სერჟ სარგსიანის ახლობლები და მომხრეები მუდმივად კორუფციული მხილებებისა და სისხლის სამართლის საქმეების ცენტრში იმყოფებიან.

ყველაზე გახმაურებულია გენერალ მანველ გრიგორიანის საქმე, რომელიც პარლამენტის დეპუტატიც იყო. მის სახლში აღმოაჩინეს ათობით ძვირად ღირებული მანქანა, უძრავი ქონების მფლობელობის დამადასტურებელი საბუთები, იარაღი, ასევე ჯარისთვის განკუთვნილი საკვები პროდუქტები, და პირადი ზოოპარკიც კი.

 •   სომხეთის უდიდესი კორუფციული მხილების შესახებ: ცნობილი დეპუტატი სავარაუდოდ ჯარისკაცების საკვებს იპარავდა 

გუშინ მთელი დღის განმავლობაში ეროვნული უშიშროების სამსახური ყოფილი პრეზიდენტის, სერჟ სარგსიანის ძმის სახლში იმყოფებოდა. ჯერჯერობით არ განუცხადებიათ, თუ კერძოდ რა ქმედებები ჩატარდა სამსახურის თანამშრომლების მიერ და რა სტატუსით დატოვა საკუთარი სახლი თავად ალექსანდრ სარგსიანმა.

სერჟ სარგისანის ერთ-ერთმა თანაპარტიელმა, იუსტიციის ყოფილმა მინისტრმა დავიდ არუთიუნიანმა განაცხადა, რომ ხელისუფლება „კონკრეტული ადამიანების მიმართ წერტილოვან დარტყმებს ახორციელებს და კონსტიტუციას არღვევს”. ამავე დროს, მისი აზრით, ახალმა ხელისუფლებამ უკანონო ქმედებებით საკუთარი მნიშვნელოვანი ნაბიჯები არ უნდა გააუფასუროს.

კერძოდ, დავიდ არუთიუნიანმა განაცხადა, რომ გამდიდრება, რომელიც განმარტებას არ ექვემდებარება და დეკლარაციაში მითითებული არ არის, 2017 წლის 1 ივნისამდე დანაშაულს არ წარმოადგენდა. კონსტიტუციის 72-ე მუხლის მიხედვით კი, არ შეიძლება პირის მოგვიანებით დასჯა იმ საქმის გამო, რაც ჩადენის მომენტში დანაშაულად არ მიიჩნეოდა.

„მესმის, რომ ხელისუფლებას ყოველდღიურად სჭირდება დაძაბულობის შენარჩუნება, მაგრამ არ მგონია, რომ ამის გაკეთება ასეთ ფასად ღირდეს“, – განცხადა არუთიუნიანმა.