საზოგადოება და ექსპერტები უკმაყოფილებას გამოთქვამენ, ხელისუფლება კი ირწმუნება, რომ ეს საკითხი არც კი შეიძლება დღის წესრიში დადგეს" />

რუსეთი სომხეთს რუსული ენისთვის ოფიციალური სტატუსის მინიჭებას ისევ სთავაზობს

საზოგადოება და ექსპერტები უკმაყოფილებას გამოთქვამენ, ხელისუფლება კი ირწმუნება, რომ ეს საკითხი არც კი შეიძლება დღის წესრიში დადგეს

რუსეთის სახელმწიფო დუმის სპიკერმა ვიაჩესლავ ვოლოდინმა სომხეთის ხელისუფლებას რუსული ენისთვის ოფიციალური სტატუსის საკანონმდებლო დონეზე მინიჭება შესთავაზა. ვოლოდინმა თქვა, რომ ასეთ შემთხვევაში, რუსეთის ტერიტორიაზე შესაძლებელი იქნება სომხეთში გაცემული მართვის უფლებების გამოყენება.

2017 წლის 1 ივნისს რუსეთში ძალაში შევიდა კანონი, რომელიც მძღოლებს რუსეთის ტერიტორიაზე უცხოური მართვის უფლებებით მუშაობას უკრძალავს. 14 ივლისს მიღებულ კანონში არის მუხლები, რომელთა თანახმად, ევრაზიის ეკონომიკური კავშირის იმ  წევრი ქვეყნების მოქალაქეებს, სადაც რუსულ ენას ოფიციალური სტატუსი აქვს მინიჭებული, რუსეთში თავიანთი ეროვნული მართვის უფლებებით შეუძლიათ მუშაობა. ამგვარად, სომხეთის მოქალაქეები, მართალია, ევრაზიის ეკონომიკური კავშირის წევრი ქვეყნის მოქალქეები არიან, მაგრამ  სომხეთში მიღებული მართვის უფლებებით რუსეთში მუშაობას ვერ შეძლებენ.

ვიაჩესლავ ვოლოდინის განცხადებამ საექსპერტო წრეებსა და მთლიანად ქვეყანაში უკმაყოფილება გამოიწვია.

პოლიტოლოგი სტიოპა საფარიანი, მაგალითად, იხსენებს, რომ რუსული მხარე  ჯერ კიდევ 2011 წლიდან დაუფარავად და „არაწესიერი“ მეთოდებით ცდილობს სომხეთში რუსული ენის სტატუსის დამკვიდრებას.

პოლიტოლოგს მიაჩნია: თუნდაც ის გარემოება, რომ სომხეთში რუსულ სკოლებს სომხური სკოლების თანაბარი სტატუსი აქვთ, იმაზე მეტყველებს, რომ სომხეთის ხელისუფლება რუსეთის ამგვარი პოლიტიკის წინააღმდეგი არ არის.

„ ეს სომხურ ენისა და სომხეთის სუვერენიტეტის აშკარა ხელყოფაა, რადგან რუსეთს უფლება არ აქვს, რომ ეს ყველაფერი თავს მოგვახვიოს.  ჩვენი სომეხი მიგრანტები, რომლებიც დღეს რუსეთში მუშაობენ, რუსეთის მხრიდან,  ფაქტობრივად, მძევლებად განიხილებიან, და მათი პრობლემები ოფიციალურ ერევანსა და სომხეთის რესპუბლიკაზე ზეწოლის მოხდენის მცდელობისთვის გამოიყენება“, – აღნიშნა საფარიანმა.

მმართველი რესპუბლიკური პარტიის სახელით, სომხეთის რესპუბლიკური პარტიის უმაღლესი ორგანოს წევრმა, არმენ აშოტიანმა განაცხადა, რომ რუსული ენის სტატუსის საკითხი სომხეთის ხელისუფლების არც დღის წესრიგში დგას და მოსალოდნელიც კი არ არის.

რაც შეეხება სომხური მართვის უფლების რუსეთში გამოყენებას, არმენ აშოტიანმა აღნიშნა, რომ ორი ქვეყნის საპარლამენტო დელეგაციები შეთანხმდნენ, რომ მსჯელობა გააგრძელონ და ოპტიმალური გადაწყვეტილება მიიღონ, კერძოდ – საპარლამენტო მოსმენების დროს.

ამ საკითხთან დაკავშირებით აზრი გამოთქვეს ასევე ფეისბუკის სომეხმა მომხმარებლებმა. აი, რამდენიმე მათი პუბლიკაცია:

„მართვის უფლებების აღიარებას რუსული ენისთვის სტატუსის მინიჭებასთან საერთო არაფერი აქვს. ამით მძღოლების ენობრივი შესაძლებლობები არ გაუმჯობესდება. მხოლოდ მართვის უფლების თარგმნაზე შეიძლება დაფიქრება… მაგრამ ხვალ რაიმე ახალ მიზეზს მოიფიქრებენ რუსული ენისთვის ოფიციალური სტატუსის მისანიჭებლად“.

“რა პასუხი გასცა სომხეთის ხელისუფლებამ? სწორი იქნებოდა ასე ეპასუხათ: მსგავსი საკითხის დასმის თავხედობაც კი არავის  უნდა ეყოს…“

„ისინი იმდენად გათავხედდნენ, რომ ჩვენი ხალხისთვის ასეთ მტკივნეულ და მნიშვნელოვან საკითხსაც შეეხნენ, და ეს მხოლოდ იმისთვის, რომ ადამიანებს მძღლებად მუშაობის უფლება მისცენ“.

„ო, ეს უსაზღვრო სიყვარულის გამოვლინება იქნებოდა! დიდი მადლობა“.

„ჩვენს მოქალაქეებს, რომლებიც რუსეთში აპირებენ მუშაობას, ჯობს, რუსული ენის ტესტი ჩააბარებინონ, და ენობრივი მოთხოვნების დაკმაყოფილების შემთხვევაში, მისცენ მუშაობის უფლება; სომხეთში რუსული ენისთვის ოფიციალური სტატუსის მინიჭება კი, სხვა რომ არაფერი ვთქვათ, არანაირ ლოგიკაში არ თავსდება“.

Facebook Comments

ასევე წაიკითხეთ