„შინ ევროპისკენ“ მოუწოდებს მმართველ პარტიას, შეწყვიტოს პროვოკაციები
„შინ ევროპისკენ“ მმართველ პარტიას მიმართავს
მოძრაობა „შინ ევროპისკენ“ სპეციალურ განცხადებას ავრცელებს და შეშფოთებას გამოხატავს იმის გამო, რომ 3 ივლისის დაგეგმილი აქციის წინ, თბილისსა და რეგიონებში მოსახლეობასთან შეხვედრებისას, ხდება ხელის შეშლა მმართველ პარტიასთან აფილირებული საჯარო მოხელეების მიერ.
მათი ცნობით, “ქართული ოცნება” მოძრაობის კამპანიის ფარგლებში დაგეგმილი შეხვედრების ჩაშლას მიზანმიმართულად ცდილობს.
როგორც მოძრაობის მიერ გავრცელებულ განცხადებაშია აღნიშნული, რეგიონებში ხელისუფლების პარტიული აქტივი სიტყვიერად და ფიზიკურად უპირისპირდება “შინ ევროპისკენ” წევრებს, რათა შეიქმნას სურათი, თითქოს საქართველოს ევროპულ ინტეგრაციასთან დაკავშირებით საზოგადოებაში ორი დაპირისპირებული ჯგუფი არსებობს, რაც სიყალბეა.
“საქართველოს მოქალაქეთა აბსოლუტური უმრავლესობა თანხმდება ქვეყნის ევროპულ მომავალზე, ეს ფაქტი მართული პროცესებით ვერ გადაიფარება.” – ვკითხულობთ განცხადებაში.
მოძრაობის თანახმად, მათ წინააღმდეგ მოქმედებები შეიცავს დანაშაულის ნიშნებს და სახეზეა “სისხლის სამართლის კოდექსის 161-ე მუხლით გათვალისწინებული შეკრების უფლების ხელყოფა“.
“შინ ევროპისკენ” ცნობით, კამპანიის ფარგლებში დაგეგმილი აქტივობები მშვიდობიანია და ძალადობის ელემენტებს გამორიცხავს. მოძრაობა მიმართავს შინაგან საქმეთა სამინისტროს, უზრუნველყონ საჯარო დისკუსიაში მონაწილე ადამიანების უსაფრთხოება.
დღეს, 29 ივნისს, თბილისის სახელმწიფო უნივერსიტეტის მაღლივ კორპუსთან სტუდენტებს ფიზიკურად დაუპირისპირდნენ.
სტუდენტები ამბობენ, რომ სამოქალაქო მოძრაობის “შინ ევროპისკენ” ბროშურებს არიგებდნენ და 3 ივლისს დაგეგმილ აქციაზე საინფორმაციო შეხვედრები ჰქონდათ, რა დროსაც მათ თავს “ქართული ოცნების” პარტიული აქტივი დაესხა.
ადამიანები, რომლებიც აქტივისტებს დაუპირისპირდნენ, ამბობენ, რომ სტუდენტები არიან, ერთ-ერთის სიტყვებით, სტუდენტები “ნაცებს ყოველთვის შეეწინააღმდეგებიან.”
“ქართული ოცნების” აქტივისტები დაუპირისპირდნენ მოძრაობის წევრებს ხონში, ზუგდიდში და თელავშიც. საჯარო მოხელეები მოაბილიზეს ბათუმშიც, სადაც სიტყვიერი დაპირისპირება მოხდა.
ახალი სახალხო მოძრაობა “შინ ევროპისკენ” წევრებმა 24 ივნისს, რუსთაველის გამზირზე შეკრებილ აქციის მონაწილეებს მათი პირობები, მოთხოვნები და გეგმები გააცნეს. მათ მთავრობისა და პირადად ბიძინა ივანიშვილის მისამართით ორი პირობა წამოაყენეს:
- გადადგეს ირაკლი ღარიბაშვილი;
- ეროვნული თანხმობით შეიქმნას მთავრობა, რომელიც ევროკავშირის მიერ მოცემულ 12-პუნქტიან რეკომენდაციებს შეასრულებს წლის ბოლომდე.
შემდეგი აქცია 3 ივლისს საღამოს 8 საათზე დაიგეგმა.
