სამეგრელო-ზემო სვანეთში საგანგებო რეჟიმი გამკაცრდა

29 მარტიდან  სამეგრელო-ზემო სვანეთში, კორონავირუსის პანდემიის გავრცელების მაღალი რისკის გამო,  საგანგებო მდგომარეობის რეჟიმი გამკაცრდა. 

მოქალაქეებს გადაუდებელი აუცილებლობის გარეშე გარეთ გასვლა ეკრძალებათ. 

ყველა მუნიციპალიტეტის შესასვლელ-გასასვლელთან ბლოკ-პოსტები მოეწყობა და მუნიციპალიტეტებში შესვლისა და გასვლის  ყველა მსურველი მკაცრად გაკონტროლდება. 

რაიონულ ცენტრებსა და სოფლებს შორის არანაირი საზოგადოებრივი ტრანსპორტი აღარ ივლის – აიკრძალა მგზავრების ავტობუსებით და სამარშრუტო ტაქსებით გადაყვანა.

აკრძალულია ავტომობილში 3-ზე მეტი ადამიანის ყოფნა. 

მანქანაში მყოფ ყველა მგზავრს აუცილებლად უნდა ეკეთოს პირბადე. 

საგანგებო რეჟიმის წესების შესრულებას გააკონტოლებენ მობილური ჯგუფები, სადაც პოლიციელებთან ერთად სამხედროები და ექიმებიც იქნებიან. 

სამეგრელო-ზემო სვანეთის გუბერნატორი, ალექსანდრე გაწერილია აცხადებს, რომ საგანგებო რეჟიმის ზომების გამკაცრება კორონავირუსის პანდემიის გავრცელების რისკის გაზრდის გამო გახდა საჭირო.

“არსებობს საფრთხეები და ეს საფრთხეები ძალიან დიდია. ამავე დროს, ჩვენ ვართ საოკუპაციო ხაზთან ძალიან ახლოს. სამწუხაროდ, ის ინფორმაცია, რაც იქიდან გვაქვს, არ არის სახარბიელო. მოსალოდნელია აფხაზეთში მცხოვრები ჩვენი თანამოქალაქეების სამკურნალოდ გადმოსვლა. ყველა მოქალაქეს შესაბამისი დახმარება გაეწევა”,  – აღნიშნა მოწერელიამ.

ზუგდიდის საავადმყოფოში ამ დროისთვის კორონავირუსით ინფიცირებული ერთი ადამიანი მკურნალობს. 

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 23 მარტს კი კორონავირუსის შიდა გავრცელების გამო მარნეული და ბოლნისი დაიკეტა.

• რას ნიშნავს საგანგებო მდგომარეობა – რისი უფლება გვაქვს და რისი არა
• მარნეული და ბოლნისი დაიკეტა
• მარნეული ეპიდაფეთქების მოლოდინში. რა ხდება დახურულ ქალაქში
• აფხაზეთი კორონავირუსს მოუმზადებელი ხვდება
• 15 კილომეტრი ბავშვებითა და ჯვრებით კორონავირუსის წინააღმდეგ – მარში აფხაზეთში, ვიდეო