სააკაშვილის გათავისუფლების მოთხოვნით ოპოზიცია მასობრივ შიმშილობას იწყებს
21 დეკემბერს, საქართველოს პარლამენტთან, მიხეილ სააკაშვილის მხარდამჭერი აქცია გაიმართა, სადაც “ნაციონალური მოძრაობის” თავმჯდომარემ, ნიკა მელიამ მასობრივი შიმშილობა დააანონსა. ენმ-ის თავმჯდომარის თქმით, შიმშილობა იქნება უვადოდ, მიხეილ სააკაშვილის გათავისუფლებამდე.
“დღეიდან ჩვენ ვაცხადებთ მასობრივ საპროტესტო შიმშილობას. ეს მძიმე გადაწყვეტილებაა. ეს კონსტიტუციური უფლებაა. ეს პროტესტის არაძალადობრივი მეთოდია, მაგრამ მძიმეა. გადაწყვეტილებების მიღების პროცესში შეიძლება ბევრ ადამიანს არ გამოვადგე რჩევის მისაცემად. ვერავის დავავალდებულებ, რომ გადადგას ეს მძიმე ნაბიჯი, მაგრამ, აქვე დავძენ: რაც უფრო მასობრივი იქნება, რაც უფრო მაღალი იქნება კონსოლიდაცია, შედეგი უფრო მალე იქნება პოზიტიური. მთელმა მსოფლიომ უნდა დაინახოს, რომ არ ვეგუებით ქვეყნის მესამე პრეზიდენტის ტყვედ აყვანას”. – თქვა ნიკა მელიამ.
მისივე განმარტებით, მოშიმშილეები კახეთის გზატკეცილზე, “ნაციონალური მოძრაობის” ოფისთან განთავსდებიან. როგორც მელია ამბობს, შიმშილობას 300-ზე მეტი ადამიანი იწყებს. შიმშილობას აპირებს თავად პარტიის თავმჯდომარეც.
“არ გვინდა, ქალბატონ სალომე ზურაბიშვილს ხელი შევუშალოთ, განავითაროს ის პროცესი, რომელიც წამოიწყო [ეროვნული თანხმობა]. ვიქნებით ძალიან ბევრნი. შესაბამისი ინფრასტრუქტურა იქ ეწყობა. მესმის, ეს რთულია – ადამიანების ჯანმრთელობას ეხება. მაგრამ იქ, სადაც ეროვნული ინტერესია, იქ, სადაც ეგზისტენციალური საფრთხის წინაშე დგას მთელი სახელმწიფო და იქ მცხოვრები ადამიანები; იქ, სადაც ოკუპაციას გადარჩენილი ქართველები იმ ტერიტორიაზე ვართ, სადაც ხდება ის, რაც ხდება ყოველდღიურად“, – განაცხადა ნიკა მელიამ.
მისივე თქმით, ოკუპაციას გადარჩენილ ტერიტორიაზე ვცხოვრობთ და დაგვავიწყდა ოკუპირებულ ტერიტორიაზე მცხოვრები ქართველები, იმიტომ, რომ “ბიძინა ივანიშვილს აწყობს პოლარიზება, რომ ამაზეც ვერ ვისაუბროთ, ჩვენ სხვა უფლება არ გვაქვს.”
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● შიმშილობის შემდეგ. გია ნოდიას თვალსაზრისი
● სააკაშვილის საქმეები. რისთვის ზის ციხეში ყოფილი პრეზიდენტი
საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და გლდანის ციხეში გადაიყვანეს.
დაპატიმრებისთანავე ყოფილმა პრეზიდენტმა პროტესტის ნიშნად შიმშილობა დაიწყო. სააკაშვილი თავს პოლიტიკურ, უფრო კონკრეტულად კი რუსეთის პრეზიდენტის ვლადიმერ პუტინისა და საქართველოს არაფორმალური მმართველის ბიძინა ივანიშვილის პატიმრად მიიჩნევს.
ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. მისი მდგომარეობა დღითიდღე უარესდებოდა. ექიმთა ჯგუფმა, რომელიც სახალხო დამცველმა შექმნა, მისი მდგომარეობა კრიტიკულად შეაფასა.
საქართველოს სამოქალაქო სექტორი, დიპლომატები, რიგითი მოქალაქეები, მსახიობები, მწერლები და საზოგადოების სხვა ცნობილი სახეები ხელისუფლებას ექს-პრეზიდენტის მრავალპროფილურ კლინიკაში გადაყვანას სთხოვდნენ. ამ მოთხოვნით ხელისუფლებას მიმართა საქართველოს სახალხო დამცველმა, სახელმწიფო ინსპექტორის აპარატმა. განცხადება გაავრცელა აშშ-ს სახელმწიფო დეპარტამენტმაც. საბოლოოდ, მესამე პრეზიდენტი გორის სამედიცინო დაწესებულებაში 19 ნოემბერს გადაიყვანეს.
გარდა ამისა, არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილება. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.
