სააკაშვილის ამერიკელი ადვოკატი: ზრუნვის ვალდებულება გლდანში ადეკვატურად ვერ სრულდება

საქართველოს მესამე პრეზიდენტის, მიხეილ სააკაშვილის ამერიკელი ადვოკატი ჯონ სენდვიჯი, რომელიც საქართველოში დღეს ჩამოფრინდა, აცხადებს, რომ ეს არ არის სათანადო დაწესებულება და აქ ექსპრეზიდენტის უსაფრთხოების საკითხი სერიოზულად შემაშფოთებელია.

გლდანის მე-18 დაწესებულებიდან გამოსულმა ადვოკატმა აღნიშნა ისიც, რომ ხლა მთავარი სააკაშვილის ჯანმრთელობის მდგომარეობაა. 

“ეს არ არის დაწესებულება, სადაც მიხეილ სააკაშვილი უსაფრთხოდ იქნება. არ ვარ ქართული სამართლის სპეციალისტი, თუმცა, საერთაშორისო სამართლის მიხედვით, სახელმწიფოს აქვს დაკავებულის ზრუნვის ვალდებულება, რაც ამ დაწესებულებაში ადეკვატურად ვერ შესრულდება”. – ამბობს ადვოკატი. 

რაც შეეხება ექსპრეზიდენტის მიმართ არსებულ საქმეებს – სენდვიჯი ამბობს, რომ მსგავსი ბრალდებები არასდროს მოიაზრება სისხლის სამართლით არც აშშ-ის და არც საერთაშორისო სამართლის პრაქტიკაში. 

ადვოკატი გამოეხმაურა 11 ნოემბერს პენიტენციური სამსახურის მიერ გავრცელებულ ვიდეომასალასაც. მისი თქმით, ძალიან შემაშფოთებელია ის, როგორც ქვეყნის მესამე პრეზიდენტს ექცევიან.

“მისი ძველი პოზიციიდან გამომდინარე, მოვალეობა მეტი პასუხისმგებლობით უნდა შესრულდეს. არ ვამბობ, რომ პრივილეგიით უნდა ისარგებლოს, თუმცა, რაც მე ვნახე ამ დაწესებულებაში – ვერ წარმომიდგენია, როგორ უნდა ჰყავდეთ აქ უსაფრთხოდ”. – ამბობს ჯონ სენდვიჯი.

● სააკაშვილის საქმე: რა წერია სტრასბურგის სასამართლოს გადაწყვეტილებაში
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
●  სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე

10 ნოემბერს სტრასბურგის სასამართლომ გამოაქვეყნა გადაწყვეტილება იმ “დროებითი ზომების შესახებ”, რომელიც მიხეილ სააკაშვილის შიმშილობას, მის ჯანმრთელობასა და უსაფრთხოებას ეხება.

სტრასბურგში მოქმედმა სასამართლომ საქმეს პრიორიტეტი მიანიჭა და “დროებითი ზომები” მიიღო. “დროებითი ზომების” შინაარსიდან გამომდინარე, სტრასბურგის სასამართლოს ეს გადაწყვეტილება ნიშნავს იმას, ევროპის ადამიანის უფლებათა სასამართლომ სააკაშვილის სიცოცხლის და ჯანმრთელობის მიმართ გამოუსწორებელი ზიანის დადგომის საფრთხე დაინახა.

სააკაშვილმა 11 ნოემბერს განაცხადა, რომ მზადაა შიმშილობა შეწყვიტოს, თუ ხელისუფლება სტრასბურგის გადაწყვეტილებას შეასრულებს და შიმშილობის შემდეგ, მის რეაბილიტაციას უზრუნველყოფს.

საქართველოს მესამე პრეზიდენტი უკვე 40 დღეზე მეტია შიმშილობს, მას შემდეგ, რაც ის პირველ ოქტომბერს დააკავეს.

8 ნოემბერს “ჯანმრთელობის გაუარესების პრევენციის” მიზნით, იგი რუსთავის ციხიდან გლდანის ციხის საავადმყოფოში გადაიყვანეს მისი ნების საწინააღმდეგოდ. თავად სააკაშვილი, მისი ოჯახი, მკურნალი ექიმები და ასევე სახალხო დამცველის აპარატი ციხის საავადმყოფოში მისი გადაყვანის წინააღმდეგნი იყვნენ იმ მოტივით, რომ ციხის საავადმყოფოში არ იყო სააკაშვილის მკურნალობისთვის საჭირო სამედიცინო აღჭურვილობა და ასევე არ იყო უსაფრთხო.

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

სააკაშვილის სამოქალაქო კლინიკაში გადაყვანის მოთხოვნით, პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო.

გლდანში სააკაშვილი მალულად გადაიყვანეს. ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.