სააკაშვილი მოუწოდებს მოსახლეობას, რუსთავში ბადრი ჯაფარიძეს დაუჭირონ მხარი

სააკაშვილი მოსახლეობას მიმართავს

პატიმრობაში მყოფი საქართველოს მესამე პრეზიდენტი მიხეილ სააკაშვილი მოსახლეობას მიმართავს და მოუწოდებს, რუსთავში ბადრი ჯაფარიძეს დაუჭირონ მხარი.

“ბადრი ჯაფარიძეს დაჩქარებულად მოუხსნეს დეპუტატის სტატუსი, ვინაიდან ის იყო ის 50-ე და გადამწყვეტი ხმა, რომელიც საჭირო იყო ჩემი წამების კომისიის შესაქმნელად.

ამიტომ, მე მის მიმართ განსაკუთრებული დამოკიდებულება მაქვს. მაგრამ ჩემს სუბიექტურ დამოკიდებულებაზე ბევრად მაღლა დგას ყველა ნამდვილი ოპოზიციური ჯგუფის ერთიანობის იდეა. არსად არავის მსოფლიოში არ დაუმარცხებია მაფიოზური რეჟიმები ყველას ერთიანობის გარეშე.

ამიტომ, მინდა მოვუწოდო ყველას, მხარი დაუჭიროს ბადრი ჯაფარიძის კანდიდატურას რუსთავში.

ოღონდ ყველას უნდა გვახსოვდეს, რომ ბათუმშიც და რუსთავშიც გამარჯვება ვერ მიიღწევა, თუ მანამდე ქვეყანაში არ იქნება დიდი ტალღა სიღატაკის, ძარცვის, უსამართლობის, დაცინვის წინააღმდეგ და ეს ტალღა იქნება აუცილებლად უმოკლეს ხანში”. – აცხადებს ექსპრეზიდენტი. 

● პოლიტიკური კრიზისი და პრორუსული განწყობები. საქართველოში არსებული სიტუაცია უკრაინელი ჟურნალისტების თვალით
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● სააკაშვილის საქმეები. რისთვის ზის ციხეში ყოფილი პრეზიდენტი

მას შემდეგ, რაც პარლამენტმა ბადრი ჯაფარიძეს დეპუტატის უფლებამოსილება შეუწყვიტა, “ლელოს” ერთ-ერთმა ლიდერმა გადაწყვიტა, კენჭი რუსთავში, რიგგარეშე არჩევნებში იყაროს. 

საქართველოს პარლამენტმა სამ დეპუტატს – ბადრი ჯაფარიძეს, შალვა ნათელაშვილს და ელენე ხოშტარიას სადეპუტატო უფლებამოსილება 15 თებერვალს შეუწყვიტა.

ბადრი ჯაფარიძისთვის მანდატის შეწყვეტის საფუძვლად საპარლამენტო უმრავლესობამ სასამართლოს გადაწყვეტილება დაასახელა.

პარტია “ლელოს” ლიდერები და TBC ბანკის დამფუძნებლები მამუკა ხაზარაძე და ბადრი ჯაფარიძე, ასევე ბიზნესმენი და ტელეკომპანია TVპირველის დამფუძნებლის, ვახტანგ წერეთლის მამა, ავთანდილ წერეთელი სასამართლომ დამნაშავედ 12 იანვარს ცნო და მათ 7-წლიანი პატიმრობა შეუფარდა, თუმცა საქმის ხანდაზმულობის გამო მათ არ დააპატიმრებენ. 

“ლელოს” ლიდერები ამბობენ, რომ ამ გადაწყვეტილებას გაასაჩივრებენ, რადგან, ბადრი ჯაფარიძის განმარტებით, დანაშაული არ არსებობს.  

მამუკა ხაზარაძის თქმით, სადაც არ არის სამართალი, იქ არ არის მშვიდობა. ასევე, მან მიმართა ბიძინა ივანიშვილს და განაცხადა, რომ ქართველი ხალხი ვერ შეეგუება ასეთ უსამართლობას ამ ქვეყანაში.

● ხაზარაძე-ჯაფარიძე-წერეთლის საქმე

შუალედური არჩევნები საქართველოში 2 აპრილს გაიმართება და საქართველოს პარლამენტის მაჟორიტარს რუსთავში აირჩევენ. პოზიცია მას შემდეგაა ვაკანტური, რაც “ქართული ოცნების” წევრმა ნინო ლაცაბიძემ პარლამენტი რუსთავის მერად არჩევის შემდეგ დატოვა.

2022 წლის 2 აპრილს ამომრჩევლები საკრებულოს მაჟორიტარს ბათუმშიც აირჩევენ.