პირბადის ტარება ქუჩაში და კომენდანტის საათი - რა შეზღუდვები მოიხსნა და რა რჩება? მოკლედ

კოვიდპანდემიის გამო დაწესებული შეზღუდვების ნაწილი უქმდება – ცვლილებები პირბადის ტარებასა და ე.წ. “კომენდანტის საათს” შეეხო. დღეიდან, 22 ივნისიდან, ქუჩაში პირბადის გარეშე სიარულის გამო აღარ დაგაჯარიმებენ, თუმცა, დახურულ სივრცეებში მისი ტარება ისევ სავალდებულოა.  1 ივლისიდან მოიხსნება „კომენდანტის საათიც“, თუმცა, კაფეები, რესტორნები და სხვა გასართობი ობიექტები მხოლოდ ღამის 00:00 საათამდე იმუშავებენ.

რა შეზღუდვები მოიხსნა და რა პირობებით

საკოორდინაციო საბჭოს გადაწყვეტილებით, დღეიდან მოიხსნა და მხოლოდ რეკომენდაციად რჩება პირბადის ტარების ვალდებულება ღია სივრცეში. თუმცა, გამონაკლისია საზოგადოებრივი ტრანსპორტის გაჩერებები – აქ პირბადე ისევ უნდა გეკეთოთ. სხვა დახურულ სივრცეებში პირბადის ტარება ისევ სავალდებულოა.

„გასაგებია, რომ პირბადე აუცილებელი არ იქნება გარე სივრცეებში, მაგრამ ის რეკომენდებულია. ამიტომ, ვისაც უნდა და მიზანშეწონილად მიაჩნია, მან უნდა ატაროს და გეტყვით, რომ მიზანშეწონილია ჯერჯერობით პირბადე ვატაროთ“, –  განაცხადა დაავადებათა კონტროლის ეროვნული ცენტრის დირექტორმა ამირან გამყრელიძემ. 

ქუჩაში პირბადის ტარების ვალდებულება ბოლო რამდენიმე თვის განმავლობაში მოქმედებდა. წესის დარღვევისთვის მოქალაქე 20 ლარით ჯარიმდებოდა.

1 ივლისიდან გაუქმდება კომენდანტის საათიც. მაგრამ, შეზღუდვები ისევ რჩება კვების ობიექტებსა და გასართობ დაწესებულებებთან მიმართებით.

საკოორდინაციო საბჭოს გადაწყვეტილებით, კვების ყველა ობიექტი: კაფე, რესტორანი, სასტუმროს რესტორანი, ასევე, გასართობი დაწესებულებები, რომლებიც დაკავშირებულია კვებასთან, ღამის 00:00 საათამდე იმუშავებენ.

​კომენდანტის საათი, ანუ აკრძალვა გადაადგილებაზე, საქართველოში ნახევარ წელიწადზე მეტია რაც მოქმედებს. 23:00 საათიდან 04:00 საათამდე ქუჩაში გადაადგილება აკრძალულია. წესის დარღვევისთვის ჯარიმა 200 ლარია.

 „უნდა ვიპოვოთ ოქროს შუალედი და გავიაროთ დანის წვერზე’, – ასე აფასებს ამირან გამყრელიძე შეზღუდვების შემსუბუქებას.

მისი შეფასებით, ამ შეზღუდვებით ერთი მხრივ არ უნდა გაუარესდეს ეპიდსიტუაცია და მეორე მხრივ, განვითარების შესაძლებლობა უნდა მიეცეს ეკონომიკასა და ტურიზმს.

კოვიდ ინფიცირებისა და ვაქცინაციის სტატისტიკა – 22 ივნისის მონაცემები

გასული დღე-ღამის განმავლობაში, საქართველოში კოვიდით 24 ადამიანი გარდაიცვალა და 914 ახალი შემთხვევა დადასტურდა (27 956 ტესტირებიდან). ბოლო მონაცემებით დადებითობის მაჩვენებელია:

• დღიური – 3.27%;
• ბოლო 7 დღის – 2.55%;
• ბოლო 14 დღის – 2.43%.
  
  სულ საქართველოში კოვიდინფიცირების 360 055 შემთხვევაა აღრიცხული. გარდაცვლილთა რაოდენობამ კი მიაღწია 5199-ს.

_____________________________________________________________

● ვაქცინაცია საქართველოში: ვინ რითი იცრება
● NDI: საქართველოში გამოკითხულთა 53 პროცენტი კორონავირუსის აცრას არ გაიკეთებდა
● როგორ მიმდინარეობს სომხეთში ვაქცინაციის პროცესი
● აფხაზეთში საყოველთაო ვაქცინაცია დაიწყო

____________________________________________________________

კოვიდის საწინააღმდეგო აცრები საქართველოში 15 მარტიდან დაიწყო. 22 ივნისის მონაცემებით, სულ აცრილია 238 220 ადამიანი, ამათგან, ორივე დოზით – 84 756 მოქალაქე.

საქართველოში კოვიდის საწინააღმდეგო აცრები ოთხი ვაქცინით მიმდინარეობს: ასტრაზენეკა, ფაიზერი, სინოვაკი და სინოფარმი.

დღეს, 22 ივნისს, მოქალაქეებმა, რომლებიც „ასტრაზენეკას“ მეორე დოზის რიგში იდგნენ, მიიღეს შეტყობინებები, რომ „ასტრაზენეკას“ ვაქცინის შეფერხების გამო მათი ჯავშნები გაუქმდა. ჯავშნები გაუქმდა იმ საიტზეც, სადაც რეგისტრაცია მიმდინარეობდა.

დაავადებათა კონტროლის ეროვნულ ცენტრში განმარტეს, რომ „ასტრაზენეკას“ დამატებითი დოზები საქართველოში დღეს, 22 ივნისს, გამთენიას უნდა შემოსულიყო.

„მოწოდებაში არის სერიოზული შეფერხება, რომელიც დაკავშირებულია ბევრ ფაქტორთან, რომლებსაც ახლა არ ჩავუღრმავდები, მაგრამ ფაქტი ის არის, რომ ეს მოწოდება ვერ მოხდა და ამიტომ შეგვექმნა, დაახლოებით, 4-5 ათასამდე ვაქცინის დეფიციტი „ასტრაზენეკასი“,“ — განაცხადა ამირან გამყრელიძემ.

მანვე თქვა, რომ ყველა იმ მოქალაქეს, რომლებსაც დაგეგმილი ჰქონდა აცრა “ასტრაზენეკას” ვაქცინით, უახლოეს პერიოდში მიეცემა აცრის ჩატარების შესაძლებლობა, რაზეც დამატებით გაკეთდება განცხადება.

დღესვე, ჯანდაცვის მინისტრის მოადგილემ, თამარ გაბუნიამ განაცხადა, რომ ივლისში საქართველოში ოთხივე ვაქცინა შემოვა, სხვადასხვა დოზით. საუბარია ვაქცინებზე: ასტრაზენეკა, ფაიზერი, სინოვაკი და სინოფარმი. კონკრეტული დეტალები არც გაბუნიას გაუხმაურებია.