ნაციონალური მოძრაობა შარლ მიშელის დოკუმენტს ხელს არ მოაწერს, მაგრამ პარლამენტში შევა
“ერთიანი ნაციონალური მოძრაობა” პარლამენტში შევა. პოლიტსაბჭოს გადაწყვეტილება პარტიის თავმჯდომარემ, ნიკა მელიამ გამოაცხადა.
ასევე, მელიას თქმით, პარტია შარლ მიშელის შემოთავაზებულ დოკუმენტს ხელს არ მოაწერს და არ დაიკავებს არცერთ საპარლამენტო თანამდებობას. მიშელის დოკუმენტში მთავარი წინაღობა 20 ივნისის საქმეზე ამნისტიის შესახებ პუნქტია.
“ევროპული მედიაციით შემოთავაზებულ დოკუმენტს ხელს არ მოვაწერთ. მაგრამ აქვე მინდა უდიდესი პატივისცემა დავუდასტურო ევროკავშირს, პერსონალურად პრეზიდენტ მიშელს, ბატონ დანიელსონს, აშშ-ის ელჩს, ქალბატონ დეგნანს და ევროკავშირის ელჩს, კარლ ჰარცელს. არის ამ დოკუმენტში ერთი პუნქტი, რომელიც ჩვენთვის კატეგორიულად მიუღებელია. ამ ყველაფრის გათვალისწინებით, მით უმეტეს პოსტ ფაქტუმ, ჩვენ ხელმოწერას ამ დოკუმენტზე ვერ დავსვამთ. თუმცა, რა თქმა უნდა, სხვა საკითხებთან მიმართებაში, ჩვენ თავიდან ბოლომდე ჩავერთვებით საკანონმდებლო საკითხების გადაწყვეტილებაში და ვიბრძოლებთ, სხვა ოპოზიციურ პარტიებთან ერთად, ეს მავნებლობა შევბოჭოთ”, – ამბობს ნიკა მელია.
პარტიის თავმჯდომარის განმარტებით, “ნაციონალური მოძრაობა” არ აპირებს დანებებას და ბიძინა ივანიშვილის წინააღმდეგ იბრძოლებს ყველგან:
„ჩვენ მას ბრძოლას გავუმართავთ ყველგან, იქნება ეს საპარლამენტო სხდომათა დარბაზი, საკომიტეტო დარბაზები, აჭარის უმაღლესი საბჭოს დარბაზები, მოედნები, ქუჩები, სოფელში, რაიონში, მთაში, ბარში, ყველგან ბიძინა ივანიშვილს ექნება წინააღმდეგობა, იმიტომ, რომ წელს ბიძინა ივანიშვილის ოლიგარქიული რეჟიმი უნდა დამარცხდეს.”
მისივე თქმით, მოცემულ მომენტში მიიღეს ყველაზე სწორი გადაწყვეტილება, რომელიც არც ერთი კომფორტის ზონას არ დაუტოვებს ბიძინა ივანიშვილს:
“უკან დასახევი გზა არ არსებობს. რჩება ორი არჩევანი: საქართველო იმარჯვებს ან იცლება – საქართველო გაიმარჯვებს.”
როგორც მელიამ აღნიშნა, საჭიროა, ოპოზიციამ კვლავ აჩვენოს ერთობა.
“მინდა მივმართო ჩვენს მეგობრებს ოპოზიციური პარტიებიდან, მე არ ვმალავ, ბევრ მათგანთან მეგობრული ურთიერთობა ჩამომიყალიბდა, ჩვენ კვლავ უნდა გავაერთიანოთ საერთო ძალისხმევა, ყველა ჩვენგანს გვყავს ოჯახში დედა, მამა, შვილები, შვილიშვილები, თანამოქალაქეები, რომლებსაც ვაკვირდებით, რამდენად სიდუხჭირეს განიცდიან და უნდა დავივიწყოთ წყენა, ყველა წვრილმანი, რომელზეც შესაძლოა ვკონცენტრირდებოდით”, – განაცხადა მელიამ.
“ნაციონალური მოძრაობა – ძალა ერთობაშია” სიის წევრი გუბაზ სანიკიძე ამბობს, რომ ენმ-ის გადაწყვეტილება პარლამენტში შესვლაზე ტაქტიკური გადაწყვეტილებაა, სტრატეგია კი უცვლელი რჩება – ხელისუფლების შეცვლა.
“უბრალოდ ახლა არის ფანჯარა, საშუალება, მექანიზმი, რომ ადგილობრივი არჩევნების შემდეგ მოხდეს რიგგარეშე არჩევნების დანიშვნა. რეალური შანსი არსებობს, ოღონდ კარგა გვარიანი მუშაობა დაგვჭირდება მთლიანად ოპოზიციას და საზოგადოებასაც. ამიტომ მივიღეთ ეს გადაწყვეტილება”, – თქვა სანიკიძემ.
პარლამენტში შესვლასთან დაკავშირებით “ერთიანი ნაციონალური მოძრაობის” გადაწყვეტილებას “ქართული ოცნება” Twitter-ზე ეხმაურება:
“რადიკალურმა ნაციონალურმა მოძრაობამ ეფექტურად აღიარა დესტრუქციული პოლიტიკური დღის წესრიგის დამარცხება და იკავებენ ადგილს საქართველოს პარლამენტში. მიუხედავად ამისა, ენმ უარს ამბობს, რომ ხელი მოაწეროს, ევროკავშირის მედიაციით შექმნილ პოლიტიკურ შეთანხმებას, რომელიც პოლიტიკური კრიზისის დასრულების საფუძველია”, – წერია განცხადებაში.
__________________________________
● ნიკა მელიამ საპატიმრო დატოვა – მას გირაო ევროკავშირმა გადაუხადა. პირველი კომენტარები
● გიორგი რურუა პრეზიდენტმა შეიწყალა. მან ციხე უკვე დატოვა
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
_________________________________
საქართველოს პარლამენტში ოპოზიციური პარტიების დეპუტატების ნაწილმა მას შემდეგ დაიწყო მუშაობა, რაც ევროპული საბჭოს პრეზიდენტის, შარლ მიშელის ჩართულობით ხელისუფლებასა და ოპოზიციას შორის შეთანხმება შედგა, რის შემდეგაც საპატიმრო დატოვეს “მთავარი არხის” მეწილემ გიორგი რურუამ და “ერთიანი ნაციონალური მოძრაობის” თავმჯდომარემ ნიკა მელიამ. ამ შეთანხმების ერთ-ერთი მთავარი ნაწილი ასევე იყო საპარლამენტო საქმიანობის დაწყება.
30 აპრილს, საქართველოს მესამე პრეზიდენტმა მიხეილ სააკაშვილმა “ნაციონალურ მოძრაობას” მოუწოდა, ხელი მოაწეროს შარლ მიშელის მიერ შემოთავაზებულ დოკუმენტს მას შემდეგ, რაც ნიკა მელია საპატიმროს დატოვებს.
“ერთიანმა ნაციონალურმა მოძრაობამ” ცესკოს მიერ გამოცხადებული შედეგებით, 2020 წლის საპარლამენტო არჩევნებში ამომრჩეველთა ხმების 27.18% აიღო, რაც 523 127 მოქალაქის ხმაა. პარტიამ მე-10 მოწვევის პარლამენტში 36 მანდატი მოიპოვა.
