გიორგი რურუა პრეზიდენტმა შეიწყალა. მან ციხე უკვე დატოვა
პრეზიდენტმა სალომე ზურაბიშვილმა ტელეკომპანია “მთავარის” მეწილე გიორგი რურუა შეიწყალა. შეწყალების აქტი მან დღეს, 27 აპრილს გამოსცა.
“მივესალმები შეთანხმების პირველი ეტაპის შესრულებას! ჩემი მხრივ შევასრულე ჩემი სიტყვა და ხელი მოვაწერე შეწყალების აქტს!”. – განაცხადა პრეზიდენტმა.
![](https://jam-news.net/app/uploads/2021/04/Screen-Shot-2021-04-27-at-18.10.54-955x1024.png)
ციხიდან გამოსულმა რურუამ განაცხადა, რომ ახლა მთავარია ნიკა მელიამ სასწრაფოდ დატოვოს უკანონო პატიმრობა.
მან განსაკუთრებული მადლობა გადაუხადა ევროპული საბჭოს პრეზიდენტს შარლ მიშელს, აშშ-ის ელჩს კელი დეგნანს, ევროკავშირის ელჩს კარლ ჰარცელს და ასევე “ჩვენს დიდ მეგობრებს სენატში შაჰინს და რიშს.”
მისი თქმით, ახლა, რაც მთავარია, პირველი პუნქტის ნახევარი შესრულდა და კრიზისის დასაძლევად მნიშვნელოვანია, რომ მეორე ნახევარიც შესრულდეს:
“მოგეხსენებათ, წელიწადნახევარი გავატარე აქ [ციხეში], რატომ – არ ვიცი. ტყუილი ბრალდებით და ეს დამტკიცდა და მემგონი, ყველასთვის ნათელია.
ნიშნის მოგებას აღარ ვაპირებ, წინ გავიხედოთ. ვიმუშავოთ, რომ ქვეყანა ამ კრიზისიდან გამოვიყვანოთ.
ასევე მადლობა მინდა ვუთხრა ოპოზიციას, რასაც აკეთებს. მე მათი მჯერა და მწამს. მე მინდა მადლობა გითხრათ თქვენ, ჟურნალისტებს. ასევე მადლობა მინდა ვუთხრა ომბუდსმენის აპარატს, არასამთავრობო ორგანიზაციებს და სამოქალაქო ორგანიზაციებს.“
![](https://jam-news.net/app/uploads/2021/04/Screen-Shot-2021-04-27-at-19.11.21-1024x622.png)
გიორგი რურუას შეწყალება შედიოდა შარლ მიშელის იმ დოკუმენტში, რომელსაც ხელისუფლებამ და ოპოზიციის ნაწილმა ხელი 18 აპრილს მოაწერა.
სალომე ზურაბიშვილმა მაშინ თქვა, რომ შეწყალების აქტს გამოსცემს, თუ ხელისუფლებას და ოპოზიციას შორის შეთანხმება შედგება – ერთი მხრივ, პარტიები ხელს მოაწერენ საბოლოო დოკუმენტს და შევლენ პარლამენტში, მეორე მხრივ კი ევროკავშირისა და აშშ-ის წარმომადგენლები გამოაცხადებენ, რომ შეთანხმება შედგება.
დღეს კი პარლამენტში ოპოზიციის სწორედ ის ნაწილი მივიდა, რომელმაც მიშელის შეთანხმებას ხელი მოაწერა. ამჟამად პარლამენტში მუშაობა 20 ივნისის ამნისტიის შესახებ მიმდინარეობს, რომლიც გამოსვლის შემდეგაც ციხეს “ნაციონალური მოძრაობის” თავმჯდომარე, ნიკა მელია დატოვებს.
_________________________________
● რა წერია შარლ მიშელის ახალ გეგმაში – ხუთივე პუნქტი მოკლედ
● კარტოგრაფების საქმე, გიორგი რურუა და სასამართლო კლანი – საქართველო სახდეპის ანგარიშში
_________________________________
18 აპრილს ევროპული საბჭოს პრეზიდენტმა შარლ მიშელმა წინადადებების ახალი პაკეტი შესთავაზა საქართველოს პოლიტიკურ პარტიებს.
დოკუმენტს ჰქვია “სამომავლო გზა საქართველოსთვის” და იგი რამდენიმე მნიშვნელოვანი დეტალით განსხვავდება ბოლო დოკუმენტისგან, რომელიც შარლ მიშელის წარმომადგენელმა, ქრისტიან დანიელსონმა 31 მარტს წარუდგინა ოპოზიციას.
სიახლეები ეხება ორ ყველაზე მნიშვნელოვან და მხარეებს შორის ყველაზე შეუთანხმებელ პუნქტს – პოლიტიკური ნიშნით დაკავებულ ადამიანებს (ნიკა მელია და გიორგი რურუა) და ახალ საპარლამენტო არჩევნებს, რომელთა რიგგარეშე ჩატარებასაც ითხოვს ოპოზიცია.
ახალი წინადადების შესათანხმებლად 18 აპრილს ევროკავშირის დელეგაციის ოფისში მივიდა ყველა პარტიის წარმომადგენელი, მმართველი პარტიის გარდა. მოგვიანებით მმართველმა პარტიამ გაავრცელა განცხადება, სადაც წერია, რომ ხელისუფლება “მზად არის” მიშელის წინადადებების განსახილველად.
“საქართველოს გაუმარჯოს, ვულოცავ პოლიტიკურ ლიდერებს ხელმოწერას კრიზისიდან გამოსავლელად”, – დაწერა ევროპული საბჭოს პრეზიდენტმა შარლ მიშელმა ტვიტერზე მას შემდეგ, მხარეებმა დოკუმენტს ხელი მოაწერეს.
შეთანხმებაზე ხელი არ მოუწერია “ერთიან ნაციონალურ მოძრაობას” და “ევროპულ საქართველოს”, თუმცა ამ პარტიების ცალკეულმა თუ ყოფილმა წევრებმა შეთანხმებას ხელი მოაწერეს – ასეთია სალომე სამადაშვილი, ხათუნა სამნიძე და დავით ბაქრაძე.
_________________________________
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● მიხეილ სააკაშვილი: მას შემდეგ, რაც მელია ციხეს დატოვებს, ენმ-მ ხელი უნდა მოაწეროს დოკუმენტს
_______________________________
გიორგი რურუას საქმე
გიორგი რურუა ოპოზიციურად განწყობილი ტელევიზიის, ტელეკომპანია “მთავარის” ერთ-ერთი მეწილეა. ასევე, ის ფინანსურად ეხმარებოდა მოძრაობას – “სირცხვილია”.
პირველ ინსტანციაში სასამართლო განხილვების დასრულებამდე დაცვის მხარემ გიორგი რურუას პატიმრობის გირაოთი ჩანაცვლების შუამდგომლობა რამდენჯერმე დააყენა, თუმცა, სასამართლომ ეს შუამდგომლობა არც ერთხელ არ დააკმაყოფილა.
გიორგი რურუა 2019 წლის 18 ნოემბერს, აქციის დარბევამდე რამდენიმე საათით ადრე ცეცხლსასროლი იარაღის უკანონო შეძენა-შენახვის ბრალდებით დააკავეს.
თავად გიორგი რურუა ბრალს არ აღიარებდა და ამბობდა, რომ მისი საქმე პოლიტიზებულია.
მოგვიანებით მის საქმეს კიდევ ერთი მუხლი – სასამართლო გადაწყვეტილების შეუსრულებლობა და მისი შესრულებისთვის ხელის შეშლა დაემატა, რადგან რურუამ სასამართლოს განჩინების მიხედვით, დნმ-ის და თითის ანაბეჭდების ნიმუშების აღებაზე უარი განაცხადა.
“საერთაშორისო გამჭვირვალობა – საქართველო”, რომელმაც გიორგი რურუას საქმის მასალები შეისწავლა, წერს, რომ რურუას არამართლზომიერად შეეზღუდა საქართველოს კონსტიტუციითა და საერთაშორისო აქტებით გარანტირებული უფლებები და თავისუფლებები.
![](https://jam-news.net/app/uploads/2021/04/unnamed-2.jpeg)