სენატორი რიში: მმართველი პარტია ოპოზიციური ხმის ჩახშობისგან თავს უნდა იკავებდეს
გაზიარება
გაზიარება
საქართველოში მიმდინარე დაძაბულ პოლიტიკურ მოვლენებს აშშ-ის სენატის საგარეო კომიტეტის თავმჯდომარე, ჯიმ რიში ეხმაურება. მისი თქმით, მმართველმა პარტიამ არ უნდა დაუშვას ოპოზიციური პარტიების ხმის ჩახშობა. სენატორმა წერილობითი ინტერვიუ “ამერიკის ხმას” მისცა.
სენატორმა იმ კანონპროექტის შესახებ ისაუბრა, რომელიც “ქართულმა ოცნებამ” პარლამენტში დააინიცირა და რომელიც ოპოზიციური პარტიებისთვის რეგისტრაციის გაუქმებას გულისხმობს.
“ძლიერი დემოკრატია მოიცავს სიტყვის თავისუფლებას. საქართველო უკვე ძალზედ დაზიანდა პოლიტიკური ანგარიშწორებით და ამის მსგავსი კანონპროექტები უთანასწოროს ხდის პირობებს, რომლებითაც ყველა პოლიტიკურმა მონაწილემ უნდა ისარგებლოს”, – ამბობს რიში.
მისი თქმით, მმართველი პარტიები უნდა ეცადონ, რომ ყველა მხარეს დემოკრატიულ პროცესში მონაწილეობის თანასწორი საშუალება ჰქონდეს
როგორც “ამერიკის ხმა” წერს, სენატორმა 31 ოქტომბრის არჩევნებისა და მიმდინარე პოლიტიკური მოლაპარაკებების შესახებ კომენტარი არ გააკეთა.
“ქართული ოცნება” პარლამენტში ახალი ინიციატივით შევიდა – პოლიტიკურ პარტიას, რომელიც სრულად არ აითვისებს არჩევნებში მიღებულ სადეპუტატო მანდატებს, გაუუქმდება პოლიტიკური პარტიის საარჩევნო რეგისტრაცია.
ამ რეგისტრაციის გაუქმება კი, ავტომატურად ნიშნავს იმას, რომ ეს პარტია სახელმწიფო ბიუჯეტიდან დაფინანსებას ვერ მიიღებს.
კანონპროექტი კიდევ ერთ მნიშვნელოვან ცვლილებას ითვალისწინებს – კანონპროექტში წერია, რომ სახელმწიფო დაფინანსება შეუწყდება იმ პოლიტიკურ პარტიას, რომლის ლიდერი არ არის საქართველოს მოქალაქე და აქტიურად მონაწილეობს წინასაარჩევნო აგიტაციაში.