"ქართული ოცნების" ინიციატივით, პარტია, რომელიც პარლამენტში არ შევა, ბიუჯეტიდან არ დაფინანსდება

მმართველი გუნდი პარლამენტში ახალი ინიციატივით შევიდა – პოლიტიკურ პარტიას, რომელიც სრულად არ აითვისებს არჩევნებში მიღებულ სადეპუტატო მანდატებს, გაუუქმდება პოლიტიკური პარტიის საარჩევნო რეგისტრაცია. ამ რეგისტრაციის გაუქმება კი, ავტომატურად ნიშნავს იმას, რომ ეს პარტია სახელმწიფო ბიუჯეტიდან დაფინანსებას ვერ მიიღებს.

ეს გადაწვეტილება მმართველმა გუნდმა მიიღო იმ ფონზე, როდესაც ოპოზიცია 31 ოქტომბრის არჩევნებს გაყალბებულად მიიჩნევს და საპარლამენტო მანდატებზე უარს ამბობს.

კანონის თანახმად, მანდატებზე უარის თქმის მიუხედავად, პარლამენტში გასული პარტიები მაინც მიიღებდნენ დაფინანსებას ბიუჯეტიდან. ახალი ინიციატივა კი ამ შესაძლებლობას სპობს.

ახალი საკანონმდებლო ინიციატივის შესახებ განცხადება საპარლამენტო უმრავლესობის ლიდერმა, ირაკლი კობახიძემ “ქართული ოცნების” ოფისში გამართულ ბრიფნგზე გააკეთა.

კანონპროექტი კიდევ ერთ მნიშვნელოვან ცვლილებას ითვალისწინებს – კანონპროექტში წერია, რომ სახელმწიფო დაფინანსება შეუწყდება იმ პოლიტიკურ პარტიას, რომლის ლიდერი არ არის საქართველოს მოქალაქე და აქტიურად მონაწილეობს წინასაარჩევნო აგიტაციაში.

აშკარაა, რომ ამ ჩანაწერის პირდაპირი ადრესატი ყველაზე რეიტინგული ოპოზიციური პარტია “ნაციონალური მოძრაობაა”. ფაქტია, რომ ერთადერთი ლიდერი, რომელიც აქტიურად მონაწილეობს საარჩევნო პროცესებში და ამავდროულად არ არის საქართველოს მოქალაქე, მიხეილ სააკაშვილია, ამ პარტიის ლიდერი.

კობახიძის განმარტებით, ეს ჩანაწერი არ ნიშნავს იმას, რომ აღნიშნული პარტია სრულიად აიკრძალება ან კანონგარეშედ გამოცხადდება.

საქმე ეხება საარჩევნო რეგისტრაციის გაუქმებას ანუ პარტიის დატოვებას საბიუჯეტო სახსრების გარეშე.

როგორც კობახიძე ამბობს, აღნიშნული ცვლილებები უკვე ოქტომბერში დანიშნული ადგილობრივი თვითმმართველობის არჩევნების დროს იმოქმედებს.

კანონპროექტი ასევე ითვალისწინებს შრომის საფასურის განულებას იმ პარლამენტარებისთვის, რომლებიც თვის განმავლობაში არც ერთ სხდომას დაესწრებიან.

“პარლამენტისთვის ბოიკოტის გამოცხადება, რომელსაც რადიკალური ოპოზიციური პარტიები და მათი ბულინგის ქვეშ მყოფი სხვა პოლიტიკური ჯგუფები ახორციელებენ, არის სახელმწიფოს წინააღმდეგ მიმართული ქმედება, რაც სათანადო რეაგირებას საჭიროებას”, – განაცხადა კობახიძემ.

საქართველოში დღემდე გრძელდება პოლიტიკური კრიზისი. ოპოზიცია არ აღიარებს 31 ოქტომბრის არჩევნების ლეგიტიმუყრობას, მიიჩნევს მათ გაყალბებულად და უარს ამბობს პარლამენტში შესვლაზე.

შედეგად, 150 დეპუტატიან პარლამენტში მხოლოდ 90 დეპუტატი შევიდა – ყველა “ქართული ოცნებიდან”.

“ქართულ ოცნებასა” და ოპოზიციას შორის, საერთაშორისო პარტნიორების და ფასილიტატორების მონაწილეობით, მოლაპარაკებები მიმდინარეობს. ოთხი რაუნდი გაიმართა, თუმცა კონკრეტული შედეგის გარეშე.

____________________________

● ვის ეხება ამნისტიის შესახებ კანონპროექტი, რომელიც “ქართულმა ოცნებამ” პარლამენტში წარადგინა

● ოთხმა ოპოზიციურმა პარტიამ მანდატებზე ოფიციალურად თქვა უარი

● ცესკომ ოპოზიციური პარტიების საარჩევნო სიები ოფიციალურად გააუქმა