საფრანგეთის პრეზიდენტმა ისლამურ სეპარატიზმს ომი გამოუცხადა
წყარო: BBC
ემანუელ მაკრონმა განაცხადა, რომ საფრანგეთში, ისლამისტი რადიკალების მიერ შიდა „კონტრ-სახელმწიფოს“ შექმნის საფრთხე არსებობს. მან ყველა გააფრთხილა, რომ წლის ბოლომდე მკვეთრად გამკაცრდება კანონები, რომელიც ფრანგი მუსლიმების ცხოვრებას არეგულირებს.
კერძოდ, უფრო მკაცრად გაკონტროლდება მეჩეთებისა და რელიგიური სასწავლო დაწესებულებების დაფინანსების წყაროები.
ასევე, რელიგიურ სასწავლებლებში მუშაობის უფლება არ ექნებათ უცხოეთიდან ჩამოსულ მასწავლებლებს.
საფრანგეთის პრეზიდენტის თქმით, რადიკალური ისლამი საფრთხეს წარმოადგენს ქვეყნისთვის, რადგან მისი მიმდევრები „კონტრ-სახელმწიფოს“ ქმნიან.
![](https://jam-news.net/app/uploads/2020/10/RTX7ZJJF-1024x547.jpg)
ისინი ბავშვებს საჯარო სკოლებში სწავლის შესაძლებლობას არ აძლევენ და იყენებენ სოციალური ცხოვრების სხვადასხვა ფორმებს, რათა ხელი შეუწყონ იდეების პოპულარიზაციას, რომელიც შეუთავსებელია საფრანგეთის პრინციპებთან.
საფრანგეთში, დასავლეთ ევროპის ქვეყნებს შორის, ყველაზე დიდი ისლამური მოსახლეობაა, 6 მილიონზე მეტი ადამიანი.
და ეს არის ქვეყანა, სადაც რელიგიისა და სახელმწიფოს გაყოფის პრინციპი მკაცრად არის დაცული.
თუმცა, ბოლო წლებში, საფრანგეთში გახშირდა ტერორიზმის შემთხვევები ისლამური საზოგადოების წარმომადგენლების მონაწილეობით. ყველაზე ცნობილი – 2015 წელს, პარიზში, სატირულ ჟურნალ „შარლი ებდოს“ რედაქციაზე მომხდარი სისხლიანი თავდასხმაა.
• რატომ ებრძვიან ჩეჩნები არაბებს საფრანგეთში და რა შუაშია აქ პუტინის მხარდამჭერი ლოზუნგები
• ერდოღანი დასავლეთის წინააღმდეგ: “ისინი პრობლემას ვერ წყვეტენ“
ერთი კვირის წინ, პარიზში, დანით შეიარაღებულმა ისლამისტმა მძიმედ დაჭრა ორი პირი.
საფრანგეთში, ისლამთან დაკავშირებით კანონი აქამდეც გაუმკაცრებიათ. კერძოდ, უფრო მკაცრი შეზღუდვები დაწესდა საზოგადოებრივ ადგილებში ჰიჯაბის ტარებაზე.
საფრანგეთში, მუსლიმებმა მკაცრად დაგმეს ძალადობა, ზოგიერთები კი აღაშფოთა პრეზიდენტის ინიციატივამ.
„მუსლიმების წინააღმდეგ რეპრესიები საფრთხე იყო, ახლა ეს დაპირებაა“, – დაწერა ტვიტერზე ფრანგმა უფლებადამცველმა, იასირ ლუატიმ.
ემანუელ მაკრონის კრიტიკოსები ამტკიცებენ, რომ მისი განცხადება – ეს არის მცდელობა მოიპოვოს კონსერვატორულად განწყობილი ამომრჩევლის სიმპათია 2022 წლის საპრეზიდენტო არჩევნების წინ.