აფხაზეთში კორონავირუსით დაავადებულთა თხოვნით ექიმებს ხელფასებს გაუზრდიან
კორონავირუსით დაავადებულმა აფხაზმა პაციენტებმა ექიმების ხელფასის გაზრდა მოითხოვეს. ამ თხოვნით მათ პრეზიდენტს მიმართეს. შედეგად, მოსკოვის აფხაზურმა დიასპორამ თანხა გამოყო ექიმების ხელფასების გასაზრდელად.
გუდაუთის ცენტრალური საავადმყოფოს პაციენტებმა, სადაც COVID-19– ით ინფიცირებულები მკურნალობენ, აფხაზეთის პრეზიდენტს ასლან ბჟანიას წერილით მიმართეს და გუდაუთის კლინიკის ექიმებისა და მომსახურე პერსონალის ხელფასების გაორმაგება სთხოვეს.
• აფხაზეთი: რატომ არ სურთ ექიმებს კორონავირუსით ინფიცირებულთა მკურნალობა
”ჩვენ ვიკითხეთ მათი [ექიმების] შრომის ანაზღაურების თაობაზე და გაკვირვებულები დავრჩით: სტაჟის მიხედვით, ხელფასი თვეში 6 ათასიდან 9-10 ათას რუბლს შეადგენს ($ 80-130). მაგრამ ეს მიზერული ხელფასიც კი ხშირად აგვიანებს“, – ნათქვამია წერილში.
პრეზიდენტს წერილისთვის ოფიციალურად არ უპასუხია, თუმცა აფხაზეთის ჯანდაცვის სამინისტრომ მოსკოვის აფხაზური დიასპორის ხელმძღვანელს, ცნობილ ბიზნესმენ ბესლან აგრბას ფინანსური დახმარება სთხოვა.
დიასპორა მიმართვას დაუყოვნებლივ გამოეხმაურა და დახმარება გამოყო, რომელსაც ეპიდემიოლოგიური მდგომარეობის სტაბილიზაციამდე გასცემს.
ოქტომბრის პირველმა ყოველთვიურმა ტრანშმა, საავადმყოფოს მენეჯმენტთან შეთანხმებით, თითქმის ორი მილიონი რუბლი (დაახლ. $ 26 ათასი) შეადგინა.
”იმედი გვაქვს, რომ ეს დახმარება იქნება დროული და ეფექტური ღონისძიება და საშუალებას მისცემს რესპუბლიკას გაუმკლავდეს მძიმე ეპიდემიას”, – აღნიშნულია მოსკოვის აფხაზური დიასპორის განცხადებაში.
24 ოქტომბრის მდგომარეობით, გუდაუთის საავადმყოფოში კორონავირუსით ინფიცირებული 141 პაციენტი იმყოფება. მათგან 27 მძიმე მდგომარეობაშია.
24 ოქტომბერს კორონავირუსის გამოვლენილი შემთხვევების რაოდენობამ დღეში 117 ადამიანი შეადგინა. აფხაზეთში სულ 3567 კორონავირუსის შემთხვევა გამოვლინდა. აქედან 1355 ადამიანი გამოჯანმრთელდა და 33 გარდაიცვალა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
