"მართლა გინდათ პუტინის ვასალები იყოთ?" - გამოხმაურება სააკაშვილის პროცესზე
გამოხმაურება სააკაშვილის პროცესზე
უკრაინისა და ევროპარლამენტის მაღალჩინოსნები მიხეილ სააკაშვილის დღევანდელ სასამართლო პროცესს ეხმაურებიან. უკრაინის პრეზიდენტის მრჩეველი მიხაილო პოდოლიაკი აცხადებს, რომ საქართველოში მესამე პრეზიდენტის მიხეილ სააკაშვილის წამება გრძელდება. ხოლო ევროპარლამენტარი პეტრას აუსტრევიჩიუსი ამბობს, რომ “საქართველო კარგავს პატრიოტებს.”
პატიმრობაში მყოფი მესამე პრეზიდენტი დღევანდელ სასამართლო პროცესს დისტანციურად ჩაერთო.
მიხეილ სააკაშვილმა სასამართლოზე სიტყვით გამოსვლისას საკუთარ ჯანმრთელობის მდგომარეობაზე ისაუბრა და ფიზიკური მდგომარეობის საჩვენებლად მაისური აიწია.
მაისურის აწევის შემდეგ გამოჩნდა, რომ მიხეილ სააკაშვილს მკვეთრად აქვს წონაში დაკლებული, რაზეც მეტყველებდა გამოკვეთილი ნეკნები და მუცელი.
უკრაინის პრეზიდენტის ადმინისტრაციის უფროსი ანდრეი ერმაკი: “გაათავისუფლეთ მიხეილ სააკაშვილი უკანონო პატიმრობიდან. სააკაშვილი არის თავისუფლებისთვის ბრძოლის, სამართლიანობისა და დემოკრატიის სიმბოლო. მისი დაკავება და პატიმრობა არის ადამიანის უფლებების დარღვევა”
ევროპარლამენტარი პეტრას აუსტრევიჩიუსი: “საქართველოს ყოფილი პრეზიდენტი მიხეილ სააკაშვილი დღეს სასამართლო სხდომაზე. ამ მძიმედ დაავადებულს უარი ეთქვა ევროკავშირის სამედიცინო ექსპერტების მონახულებაზე. საქართველო კარგავს თავის პატრიოტებსა და ოცნებას.”
The former President of Georgia Micheil #Saakashvili at the court hearing today. This seriously ill man us denied permission for EU medical experts examination. #Georgia is loosing its patriots and dream…. pic.twitter.com/T8bUsHvLj5
— Petras Austrevicius (@petras_petras) July 3, 2023
უკრაინის პრეზიდენტის მრჩეველი მიხაილო პოდოლიაკი: “საქართველო აგრძელებს ყოფილი პრეზიდენტის მიხეილ სააკაშვილის ნელ და ცინიკურ წამებას. წარმოუდგენელი ისტორიული… თვითმკვლელობა. რა არის ეს? თქვენ ნამდვილად ასე ძალიან გსურთ რუსების მხარდაჭერის მიღება? თქვენ ნამდვილად გინდათ პუტინის საყვარელი და მორჩილი ვასალები იყოთ? ნუთუ თქვენ ასე ძალიან მოგწონთ ღიად აფუჭოთ საკუთარი ევროპული პერსპექტივა? დამკვეთების და შემსრულებლების მოტივი ნათელია. ნუთუ ასეთი აუცილებელია “საქართველო” კანიბალიზმის სინონიმად იქცეს?”
ევროპარლამენტარი რასა იუკნევიჩიენე: “ის, რასაც “ქართული ოცნება” სჩადის ყოფილი პრეზიდენტის მისამართით, არაადამიანურია. ეს მთელი ერის პასუხისმგებლობაა. წამება საერთაშორისო სამართლით არის აკრძალული. ჯერ კიდევ მაქვს იმის იმედი, რომ პრეზიდენტ სალომე ზურაბიშვილს ექნება საკმარისი სიმამაცე, მიხეილ სააკაშვილს აპატიოს.”
● სააკაშვილის საქმეები. რისთვის ზის ციხეში ყოფილი პრეზიდენტი
● მიხეილ სააკაშვილის სტატია Politico-ზე: მე პოლიტპატიმარი ვარ და ვკვდები
● “სააკაშვილი, შესაძლოა, მალე საწოლს მიჯაჭვული გახდეს” – ომბუდსმენის კონსილიუმი საგანგაშო დასკვნას აქვეყნებს
● 16 ივნისს მიხეილ სააკაშვილმა განაცხადა, რომ ის აპირებს “ძალიან” აქტიურად ჩართვას ქართულ პოლიტიკაში.
● მიხეილ სააკაშვილი პატიმრობაში 2021 წლის შემოდგომიდან იმყოფება. იგი მას შემდეგ დააკავეს, რაც საქართველოს საზღვარი უკანონოდ გადაკვეთა და საქართველოში დაბრუნდა.
● ციხეში სააკაშვილის ჯანმრთელობის მდგომარეობა გაუარესდა. 2022 წლის მაისიდან პოლიტიკოსი თბილისში, კლინიკა „ვივამედში“ იმყოფება. 20-ზე მეტი დამოუკიდებელი ექიმი აცხადებს, რომ სააკაშვილი მძიმე მდგომარეობაშია.
● მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.
● 2023 წლის 12 მაისს მიხეილ სააკაშვილს სტრასბურგის სასამართლომ პოლონეთში სამკურნალოდ გადაყვანაზე უარი უთხრა. სააკაშვილის ადვოკატის, შოთა თუთბერიძის განმარტებით, სტრასბურგის სასამართლოს სააკაშვილის საქმეზე საბოლოო გადაწყვეტილება არ მიუღია და ეს პასუხი მხოლოდ “ე.წ. დროებით ღონისძიებას ეხება” მიხეილ სააკაშვილის სამკურნალოდ გადაყვანის თაობაზე.
● საქართველოს იუსტიციის მინისტრის თქმით, ეს მეტყველებს იმაზე, რომ “სახელმწიფოს ყველა მოქმედება მიხეილ სააკაშვილის შემოსახლების დღიდან იყო კორექტული და ადამიანის უფლებების უმაღლესი სტანდარტების შესაბამისი.”
