სამი მიზეზი, რის გამოც ევროპამ საქართველოს ყურადღება უნდა დაუთმოს - რა წერია ევროპელი ლიდერებისთვის გაგზავნილ წერილში
ევროპელი ლიდერებისთვის გაგზავნილი წერილი
“რუსეთის მიერ მხარდაჭერილ დიქტატორს არ უნდა მიეცეს საშუალება უგულებელყოს ევროპელი და ამერიკელი პარტნიორები, შეცვალოს მტკიცედ პროევროპული მოსახლეობის კურსი და ევროკავშირის კანდიდატი ქვეყანა რუსეთის სატელიტად აქციოს”, – ეს არის ამონარიდი წერილიდან, რომელიც საქართველოს მეხუთე პრეზიდენტის, სალომე ზურაბიშვილისა და პროდასავლური ოპოზიციის კოორდინირებით ევროკავშირის ლიდერებთან გაიგზავნა.
- ევროპელ ლიდერებთან გაიგზავნა წერილი, ევროპული საბჭოს შეხვედრაზე საქართველოს საკითხიც განიხილონ: სალომე ზურაბიშვილი
- ვენეციის კომისია მანიფესტაციებზე ოცნების დრაკონულ კანონებს შეუსაბამოდ მიიჩნევს
გუშინ, 19 მარტს, სალომე ზურაბიშვილმა განმარტა, რომ ამ წერილის მიზანია ევროპული საბჭოს 21 მარტის შეხვედრაზე საქართველოს საკითხიც დადგეს დღის წესრიგში.
დღეს ამ წერილის სრული ვერსია გასაჯაროვდა.
წერილის დასაწყისში ნათქვამია, რომ ის იგზავნება საქართველოს პროევროპული პარტიებისა და სამოქალაქო საზოგადოების სახელით.
“მოგიწოდებთ სათანადო ყურადღება დაუთმოთ საქართველოში არსებულ საგანგაშო მოვლენებს, სადაც რუსეთის მიერ შთაგონებული რეჟიმი ყოველდღიურად აფართოებს რეპრესიულ ზომებს საქართველოს დემოკრატიის, სუვერენიტეტისა და მისი ევროპული მომავლის წინააღმდეგ“.
წერილში დასახელებულია სამი მიზეზი, რის გამოც ევროპამ განსაკუთრებული ყურადღება უნდა დაუთმოს საქართველოში მიმდინარე პროცესებს.
პირველი მიზეზი – “დემოკრატიის კუთხით”
ერთ-ერთი მიზეზი, სამიდან, ქვეყანაში დემოკრატიის მდგომარეობაა. წერილში ნათქვამია, რომ საქართველოს მმართველი ძალა ანგრევს ყველა ინსტიტუტს და არღვევს ფუნდამენტურ უფლებებს, რომლებიც ოც წელზე მეტია ევროპის აქტიური ჩართულობით შენდებოდა და დაცული იყო:
“რუსეთის მიერ მხარდაჭერილ დიქტატორს არ უნდა მიეცეს საშუალება უგულებელყოს ევროპელი და ამერიკელი პარტნიორები, შეცვალოს მტკიცედ პროევროპული მოსახლეობის კურსი და ევროკავშირის კანდიდატი ქვეყანა რუსეთის სატელიტად აქციოს.
საფრთხის ქვეშ დგას არა მხოლოდ საქართველოს მომავალი, არამედ ევროპული საგარეო პოლიტიკის სანდოობა“, – ნათქვამია წერილში.
მეორე მიზეზი: “სუვერენიტეტის კუთხით”
ევროპელი ლიდერებისთვის გაგზავნილ წერილში ახსნილია, რომ საქართველოში განვითარებული მოვლენები, სხვა არაფერია თუ არა რუსეთის მიერ ალტერნატიული ჰიბრიდული ინსტრუმენტის გამოყენების მცდელობა, რათა ხელახლა მოიპოვოს გავლენა სუვერენულ, დამოუკიდებელ და პროევროპულ ქვეყანაზე.
ამ კონტექსტში ნახსენებია 28 ოქტომბრის არჩევნები და პრემიერ -მინისტრის ირაკლი კობახიძის 28 ნოემბრის გადაწყვეტილება ევროკავშირთან მოლაპარაკების შეჩერებაზე:
“სამხედრო აგრესია, რომელიც კრემლის მიერ დაპყრობის ინსტრუმენტია, რუსეთმა საქართველოში 2008 წელს დატესტა, ხოლო უკრაინაში 2014 და 2022 წელს გამოიყენა მაღალი დანახარჯებითა და მოსალოდნელი დომინაციის მიღწევის გარეშე.
საქართველოში (ისევე როგორც რუმინეთში, მოლდოვასა და თუ არ შეაჩერებთ, სამომავლოდ, შესაძლოა, უკრაინაშიც) მიმდინარეობს ჰიბრიდული ომის ტესტირება არჩევნების მანიპულაციის გზით, რომელიც ნაკლებად აგრესიული სურათის შემქმნელი და ნაკლები დანახარჯების შემცველია და რაც გზას უხსნის მარიონეტულ მთავრობას. წარმატების შემთხვევაში კი, შესაძლოა, ეს ევროპის საზღვრებსაც გასცდეს.
ამგვარი ახალი ტენდენცია ყველასთვის შემაშფოთებელი უნდა იყოს და არა მხოლოდ მათთვის ვინ რუსეთის საზღვრებთან ახლოს ცხოვრობს”
მესამე მიზეზი: “სტრატეგიული კუთხით”
წერილში ხაზგასმულია, რომ საქართველოს ბედი არ უნდა გაიმიჯნოს უკრაინისგან, ისევე როგორც არ უნდა მოხდეს საქართველოს ამოღება უკრაინაში მშვიდობის შესახებ დისკუსიებიდან.
“როდესაც საუბარია ოკუპირებულ ტერიტორიებზე არ შეიძლება აფხაზეთისა და ცხინვალის რეგიონის იგნორირება. როდესაც საუბარია შავი ზღვის უსაფრთხოებასა და თანამშრომლობაზე არ შეიძლება საქართველოს მივიწყება, მაშინ როცა დე ფაქტო ხელისუფლება გეგმავს ანაკლიის ახალ პორტში ჩინეთის, როგორც მთავარი პარტნიორის, შეყვანას.
საქართველოს ბედი, (რაც რუსეთს უკეთ ესმის ვიდრე ბევრ სხვას), განაპირობებს კავკასიის მომავალს და ევროპა-ცენტრალური აზიის კავშირებს.
მაშინ როცა სომხეთსა და აზერბაიჯანს შორის სამშვიდობო მოლაპარაკებები ახალ შესაძლებლობებს აჩენს მშვიდობიანი კავკასიისთვის, როდესაც თურქეთი უფრო და უფრო უახლოვდება ევროპას და მასტაბილიზებელ როლს თამაშობს შავ ზღვაში, საქართველოს დაკარგვა, ამ რეგიონში რუსეთის დომინანტობის ტოლფასია. ეს არ არის ძლიერი ევროპა, არც ძლიერი ამერიკა.
ევროპელ ლიდერებს წერილის ავტორები მოუწოდებენ, გამოწვევებისა და მათ წინაშე მდგარი პრიორიტეტების მიუხედავად, ყურადღება მომართონ საქართველოსკენ: “საქართველო იმსახურებს თქვენს ჩართულობას, თუ ამ რეგიონში სტაბილურობა გაღელვებთ.“
წერილი ეხება ოთხთვიანი უწყვეტი პროტესტს, რომელიც ქვეყანაში მიმდინარეობს. ახსნილია, რომ საქართველო ღრმა კრიზისშია. მმართველი ძალა არ მართავს ქვეყანას, ისინი მხოლოდ რეპრესიებს რეპრესიებზე ამატებენ, პროტესტი არც ნებდება, არც ეგუება. ღრმავდება ეკონომიკური და სოციალური კრიზისი. მმართველი ძალა არ აწარმოებს დიალოგს ოპოზიციასთან, რათა იპოვოს კრიზისიდან გამოსავალი. ამგვარი კრიზისი კი მხოლოდ და მხოლოდ დესტაბილიზაციას გამოიწვევს, რაც შესაძლოა, უმნიშვნელო ინციდენტით დაიწყოს მიუხედავად საზოგადოების მშვიდობიანი განწყობისა:
“არსებული ჩიხიდან ერთადერთი მშვიდობიანი გამოსავალი ახალი არჩევნებია. ამ გამოსავლის მიღწევა შესაძლებელია მხოლოდ ევროპული (და საბოლოოდ ამერიკული) მაღალი დონის მედიაციის გზით.
მოგიწოდებთ, რომ სათანადო ყურადღება მიაქციოთ ამ გამოწვევას და განიხილოთ ჩართულობის ყველა გზა, ოპოზიციასთან და მმართველ ძალასთან, რათა შედგეს მაღალი დონის განხილვა საქართველოში ახალი არჩევნების ჩატარებისთვის. ამავდროულად, გვჭირდება თქვენი პირდაპირი მხარდაჭერა სამოქალაქო საზოგადოების ყველაზე მეტად მოწყვლადი სეგმენტებისათვის: სინდისის პატიმრები, რეგიონული და ცენტრალური მედია“.
წერილში ასევე ნათქვამია, რომ როცა ამერიკა გადის, ევროპამ უნდა აიღოს საკუთარ თავზე არამხოლოდ თავდაცვის საკითხები, არამედ სამოქალაქო საზოგადოებისა და ძირითადი თავისუფლებების მხარდაჭერა.
“ჩვენ მტკიცედ ვუჭერთ მხარს ინიციატივას „ევროპის ხმა”, რომ ევროპამ გადაიბაროს თავისუფლებისა და ევროპული ღირებულებების მხარდაჭერისთვის საინფორმაციო ბრძოლა.
მოგიწოდებთ, რომ საქართველოს საკითხი შეიტანოთ ევროპული საბჭოს მომდევნო სესიის დღის წესრიგში. მომდევნო სესიამდე კი, მზად ვარ წარვდგე, პროევროპულ პარტიებთან ერთად, ევროპული პარლამენტის წინაშე მიმდინარე მოვლენებთან დაკავშირებული საკითხების განსახილველად“, – ნათქვამია წერილში.
ევროპელი ლიდერებისთვის გაგზავნილი წერილი
