ცხინვალი: ომის დამნაშავეები დაისჯებიან ხანდაზმულობის ვადის მიუხედავად

ცხინვალის საოკუპაციო რეჟიმი 9 დეკემბერს, საოკუპაციო ხაზთან სამი ქართველის დაკავებას ეხმაურება და აცხადებს, რომ “ომის დანაშაულები დაისჯება ხანდაზმულობის მიუხედავად”. 

განცხადებაში ნათქვამია, რომ ე.წ საზღვრის უკანონოდ კვეთის ბრალდებით დაკავებულები არიან 1977 წელს დაბადებული კახაბერ ნათაძე და 1983 წელს დაბადებული ვლადიმერ კანიაშვილი.  ომის დანაშაულების შესახებ ჩანაწერი კი სავარაუდოდ ეხება ყოფილ ჯარისკაცს, მამუკა ჩხიკვაძეს, რომელიც ასევე დაკავებულია საოკუპაციო რეჟიმის მიერ.

ცხინვალის კგბ აცხადებს, რომ ერთ-ერთ დაკავებულს თან მარიხუანაც აღმოაჩნდა, შესაბამისად, მათ მიმართ გამოძიება რუსეთის სისხლის სამართლის კოდექსის 322-ე, საზღვრის უკანონო გადაკვეთის და 229.1 – ნარკოტიკების კონტრაბანდის მუხლებით დაიწყო. 

“საზღვრის დამრღვევები დაისჯებიან, მათ შორის, დაისჯებიან ის ადამიანები, რომლებიც მონაწილეობდნენ სამხრეთ ოსეთის წინააღმდეგ აგრესიასა და საომარ მოქმედებებში დონეცკში, ლუგანსკსა და სირიაში, როგორც ნაციონალისტური და ტერორისტული ორგანიზაციების წევრები”, – ნათქვამია განცხადებაში.

● აქცია ენგურის ხიდთან: აქტივისტები აფხაზეთში დაკავებული ირაკლი ბებუას გათავისუფლებას ითხოვენ
● ცხინვალის ციხიდან გამოუშვეს კაცი, რომელსაც ღამურების შეგროვებას აბრალებდნენ
● უსაფრთხოების სამსახურის ანგარიში: უცხო ქვეყნის სპეცსამსახურები შიდა პროცესებში ჩარევას ცდილობდნენ

ცხინვალის რეჟიმის მიერ დაკავებული მამუკა ჩხიკვაძე შავნაბადას ბატალიონში მსახურობდა, ის ასევე მონაწილეობდა საერთაშორისო მისიებში ავღანეთსა და ერაყში. ყოფილი ჯარისკაცი გორის მუნიციპალიტეტის სოფელ ზემო ნიქოზის მიმდებარე ტერიტორიიდან გაიტაცეს. “რადიო თავისუფლების” ცნობით, ვრცელდება ინფორმაცია ცხინვალის ციხეში ჩხიკვაძის ცემის შესახებ. 

მამუკა ჩხიკვაძის საქმეში უკვე ჩართო წითელი ჯვარი. მომხდარზე კომენტარი გააკეთა ამერიკის ელჩმა საქართველოში კელი დეგნანმაც. ელჩი იმედს გამოთქვამს, რომ რუსეთი 2008 წლის ცეცხლის შეწყვეტის შეთანხმებით აღებულ ვალდებულებებს შეასრულებს და სამხედრო ძალებს დააბრუნებს იმ დისლოკაციის ადგილებზე, სადაც ისინი აგვისტოს ომამდე იყვნენ განლაგებულები. 

მომხდარს ციხიდან გამოეხმაურა საქართველოს მესამე პრეზიდენტი მიხეილ სააკაშვილი. ექსპრეზიდენტი საერთაშორისო თანამეგობრობას მოუწოდებს, აქტიურად ჩაერთოს მამუკა ჩხიკვაძის სიცოცხლის გადარჩენისა და გათავისუფლების პროცესში.